ئەم هەڵانە زیان بە مێشك دەگەیەنن

خەندان لایف-

ئەو كاتەی لە سەرەتای تەمەنەوە گرنگی بە تەندروستی مێشكت بدەیت ئەوە كاتێك دەچتە تەمەنەوە لە توشبون بە نەخۆشی پارێزراو دەبیت، پارێزگاریكردن لەتەندروستی مێشك دەبێتە هۆی زامنکردنی ژیانێكی زیاتر ئارام و ئاسودە لەكاتی بەساڵاچوندا، هەندێك رەفتار هەیە كە زیانێكی زۆر بە مێشك دەگەیەنێت و دەبێتە هۆی لەناوبردنی كەپێویستە لێی دوربكەوینەوە ئەوانیش.

یەکەم: كەم خەوی، سەرباری زیادبونی ئەرك و كاروبارەكان، نابێت مرۆڤ دەستبەرداری كاتی گونجاوی خەوتن بێت، بەپێی لێكۆڵینەوەكان پەیوەندی هەیە لەنێوان كەم خەوی و زیادبونی مەترسی توشبون بە لەبیرچونەوە و زەهایمەر.

 

دووەم: دابڕان و تەنیایی لەروی كۆمەڵایەتی، ئەو كەسانەی خاوەنی بازنەیەكی كۆمەڵایەتین زیاتر هەست بە دڵخۆشی دەكەن بەراورد بەو كەسانەی دورەپەرێزن و تەنیایی و دابڕان توشبون بە زەهایمەر زیاد دەكات.

 

سێیەم: زیادەڕەویی لەژەمەخۆراكە خێراكان، زیادەڕەویی كردن لەم جۆرە خواردنانە هەڕەشە لەسەر تەندروستی مێشك دروست دەكات و دەبێتە هۆی كەمبونەوەی توانای مێشك و خێراتركردنی پرۆسەی پیربونی مێشك.

 

چوارەم: هێدفۆنی گوێ، زۆر بەكارهێنانی ئەگەر بەكەمترین ئاستی دەنگیش بێت كاریگەری لەسەر مێشك هەیە و زیانی پێدەگەیەنێت،بەپێی لێكۆڵینەوەكان زیادەڕەوەیكردن لەبەكارهێنانی هێدفۆن پەیوەندی هەیە بە لەدەستدانی بیستن لای بەساڵاچوان و زیادبونی توشبون بەزەهایمەر.

 

پێنجەم: تەمەڵی، سەرقاڵبون بە كاروباروكەمی جوڵە و دانیشتن بەدیار تەلەفزیۆنەوە بۆماوەیەكی زۆر زیانی بۆ تەندروستی مێشك هەیە، هەركاتێك جوڵەی جەستە كەم بێت ئەوا مەترسی توشبون بە خەڵەفاویی و چەندین نەخۆشی دیكەی وەك شەكرەو نەخۆشیەكانی دڵ و بەرزەپەستانی خوێن زیاد دەكات.

 

شەشەم: جگەرەكێشان، ئەم خوە خراپە دەبێتە هۆی بچوكبونەوەی قەبارەی مێشك و دروستكردنی كاریگەری لەسەر بیرەوەری و زیادبونی توشبون بە لەبیرچونەوە دو هێندە بەراورد بەو كەسانەی جگەرەناكێشن.

 

حەوتەم: زیادەڕەویكردن لەخواردن، خواردنی برێكی زۆر خۆراك بەیەكجار دەبێتە هۆی كەمبونەوەی توانای مێشك بۆ بنیادنانی تۆڕی بەهێز بۆ بیركەوتنەوەی روداوەكان و بیركردنەوە.


 

هەشتەم: تاریكی، زۆر دانیشتن لە تاریكی و نەچونە بەردەم تیشكی خۆر زیانی بۆ تەندروستی هەیە و دەستنەكەوتنی تیشكی سروشتی دەبێتە هۆی زیادبونی توشبون بەخەمۆكی و ئەوەش كاریگەری لەسەر تەندروستی مێشك دەبێت.

ئه‌م بابه‌ته 12387 جار خوێنراوه‌ته‌وه‌‌

Copyright © 2015 Xendan.org all rights reserved
Created by AVESTA GROUP