بەوێنە.. لێوی فیلەر کرد بۆ ئەوەی جوان بێت



خەندان لایف-

خانمێكی تەمەن 29 ساڵ بە مەبەستی بڵاوكردنەوەی هۆشیاری و پێدانی زانیاری لەبارەی فیلەر لە بەرنامەیەكی تەلەفزیۆنیدا ئاماژە بەوەدەكات بەهۆی ئەنجامدانی فیلەر قەبارەی لێوی چوارهێندە زیادیكردوە.

رەیچڵ ناپییەر، لە بەرنامەی (This Morning)ی تەلەفزیۆنی ITVی بریتانی رایگەیاند "دوای ئەوەی هاوڕییەكی پێشنیاری ئەنجامدانی فیلەر-ی بۆكردوە لە نەخۆشخانەیەك فیلەری بۆ لێوی ئەنجامداوە، بەڵام لەكاتێكدا لێوی بەشێوەیەكی نائاسایی ئاوساوە پەرستارەكانی نەخۆشخانەكە بەو دۆخە پێكەنیون".

رەیچڵ دەڵێت "سەرەتا لێوم ئاسایی بو تا ڕۆشتمە ماڵەوە و خەوتم، بەڵام هەمانشەو كاتژمێر 2 لە خەو هەستام و لێوم بەو شێوەیە بینی كە لە وێنەكاندا دەركەوتوە، قەبارەیان چوارهێندە بو، سەرەڕای ئەوەش بە شێوەیەكی زۆر نائاسایی هەستم بە فشار و سوتانەوەی لێوم دەكرد".

دواتر رەیچڵ بە ترسێكی زۆرەوە بە مەبەستی وەرگرتنی زانیاری و چارەسەر بۆ ئەو حاڵەتە سەردانی هەمان نەخۆشخانە دەكاتەوە، بەڵام بەپێی وتەكانی "باوەڕی بەو هەڵسوكەوتە نەكردوە كە روبەڕوی بوەتەوە" و ئاماژەی بەوەكرد "پەرستارەكانی نەخۆشخانە بەشێوەیەكی ئاشكرا بە حاڵەتەكەم پێدەكەنین".

بەهۆی ئەوەی پێشتر جەستەی كاردانەوەی هەستیاری بەرامبەر بە هەندێك دەرزی هەبوە، رەیچڵ بە پزیشكەكانی راگەیاندوە پێدەچێت هۆكاری هەڵئاوسانی لێوی هەمان كاردانەوەبێت، بەڵام دوای پشكنین پزیشكەكان پێیان ڕاگەیاندوە "بەهۆی ئەوەی دەرزی پێكهاتەی فیلەرەكە كراوەتە ناو دەماری خوێنهێنەریەوە توشی ئەو حاڵەتە بوە".

دوای تێپەڕبونی سێ رۆژ بەسەر ئەنجامدانی "فیلەر"ەكە، لێوی رەیچڵ گەڕایەوە دۆخی ئاسایی خۆی، بەڵام لە ئێستادا رەیچڵ دەستی كردوە بە كەمپینێك بۆ گرتنەبەری رێوشوێنی توندتر لەو پرۆسەیەدا و دەیەوێت خەڵك لە مەترسیەكانی ئەو كارە هۆشیاربكاتەوە و دەڵێـت "پێویستە پێش بەكارهێنانی دەرزی خۆت بپارێزیت".  

ئه‌م بابه‌ته 61320 جار خوێنراوه‌ته‌وه‌‌

Copyright © 2015 Xendan.org all rights reserved
Created by AVESTA GROUP