كاتێك كێشت دادەبەزێنیت، چی بەسەر مێشك و جەستەتدا دێت ؟


خەندان لایف-

توێژینەوەكان دەڵێن "بۆ هه‌ر 4.5 كگم له‌ چه‌وری له‌شت كە دادەبەزێت، 3.8 كگم ده‌چێته‌ هه‌واوه‌، ئه‌وه‌ش كه‌ ده‌مێنێته‌وه‌ ده‌بێته‌ فرمێسك و ئاره‌ق و میز و شله‌كانی تری جه‌سته"‌.

له‌ كرداری دابه‌زینی كێشدا هه‌موو ئه‌ندامه‌كانی جه‌سته‌ به‌ گۆڕانكاری زۆردا تێپه‌رده‌بن، هه‌ندێكجار ده‌ره‌نجامی چاوه‌ڕواننه‌كراوی لێدروستده‌بێت، هه‌ندێك له‌و گۆڕانكاریانه‌ش بریتین له‌ :

1-ئاستی وزه‌ی جه‌سته‌ به‌رزدەبێته‌وه‌
پاش دابه‌زینی چه‌ند كیلۆیه‌ك له‌ كێشت، یه‌كه‌مین گۆڕانكاری جه‌سته‌ بریتیه‌ له‌ زۆربوونی وزه‌ی جەستە، هۆكاره‌كه‌ی ئه‌وه‌یه‌ "هه‌تا كێش كه‌متربێت، وزه‌ت زیاتر ده‌بێت بۆ كاره‌كانی دیكه‌"، هاوکات كه‌مكردنی كێش چالاکی ئۆكسجین لە لەشدا زیاتردەکات، هەربۆیه‌ هەناسەت توند نابێت رابكه‌یت یان بەسەر قادرمه‌كاندا سه‌ربكەو‌یت.

2-هێزی هزرت گه‌شه‌ده‌كات
مێشك یه‌كێكه‌ له‌و ئه‌ندامانه‌ی كه‌ سوود وه‌رده‌گرێت له‌ دابه‌زینی كێش،هه‌ندێك له‌ توێژینەوە‌كان ده‌ریانخستووه‌ دابه‌زینی كێش كاریگه‌ری له‌سه‌ر گه‌شه‌كردنی توانای هزریه‌كان هه‌یه كه‌ تایبه‌تن به‌ پلاندانان و رێكخستن، چونکە پاش دابه‌زینی كێش ‌مێشك چالاكترده‌بێت له‌كاتی تۆماركردنی زانیاری نوێدا..

3-پێستت رونترده‌بێته‌وه‌
دابەزینی کێشت راستەوخۆ کاریگەری لەسەر جوانی پێست و رووخسار هەیە لەرووی تەندروستیەوە، چونکە ڕەنگی پێست رووندەکاتەوە و زیپكه کەمدەبێتەوە، هاوکات کاریگەری لەسەر بەهێزبوونی قژ و نینۆکەکانیشت هەیە. 

4-ئازاری ئەژنۆت کەمدەبێتەوە یاخود نامێنێت 
به‌ دابه‌زینی ته‌نها 450 گم له‌ كێشت 1814 گم له‌ فشاری سه‌رجومگه‌ی ئه‌ژنۆكانت كه‌مده‌بێتەوە‌، هەربۆیە به‌ كه‌مكردنه‌وه‌ی كێشت ده‌توانیت نیشانه‌كانی رۆماتیزمه‌ و نه‌خۆشیه‌كانی جومگه‌ كه‌مبكه‌یته‌وە.

5-هه‌ستیاری جه‌سته‌ كه‌مده‌كاته‌وه‌
كێشی زۆر فشارده‌خاته‌ سه‌ر كۆئه‌ندامی هه‌ناسه‌، ئه‌گه‌ر له‌ وه‌رزه‌ جیاوازه‌كاندا هه‌ستیاریت هه‌بێـت نیشانه‌كان زۆرترده‌بن، به‌ڵام كاتێك كێشت داده‌به‌زێت هه‌ستیاریه‌كانی جه‌سته‌ كەمده‌بنه‌وە ،چونكه‌ بۆریه‌كانی هه‌ناسه‌دانت خاوێنده‌بنه‌وه‌. 

6-پێیه‌كانت بچوكترده‌بنه‌وه‌
له‌كاتێكدا كێشت داده‌بەزێت واتای ئه‌وه‌یه‌ هه‌موو جه‌سته‌ت كێشی دابه‌زیوە، كه‌واته‌ پێیه‌كانیشت بچوكترده‌بنه‌وه‌.

7-هه‌ستكردنت بە سه‌رما زۆرترده‌بێت
دابەزینی كێش، واتای ئەوەیە كە ئەو توێژاڵە چەوریەی جەستەی داپۆشیبوویت یان رێگری لە سەرمادەكرد، چیتر نەماوە و تواوەتەوە، هەربۆیە جەستەت زیاتر هەستیاردەبێـت بە سەرما و گۆڕانی پلەكانی گەرما. 

8-سوری مانگانە گۆرانكاری بەسەردادێت
كێشی لەش كاریگەریەكی زۆری لەسەر ئاستی بەرزونزمی هۆرمۆنەكان هەیە، هەربۆیە لەكاتی كەمبوون و زیادبوونی كێشی لەشدا گۆڕان روودەدات لە سیستمی رژێنی لەشدا، بەرزبوونەوە و نزمبوونەوەكانی رێژەی ئێسترۆجین و تێستۆستیرۆن، ئەگەری هەیە ببێتە هۆی گۆڕینی نارێكی و ئازار لە سوڕی مانگانەدا.

9-كەمتر تووشی سەرئێشە دەبیت
هەرچەندە كێشی زیادی لەش راستەوخۆ پەیوەندی بە سەرئێشەوە نیە، بەڵام شارەزایانی تەندروستی دەڵێن خانە چەوریەكان ڕێژەی هەوكردن لە جەستەدا بەرزدەكەنەوە، لە هەندێككاتدا ئەو هەوكردنانە لەوانەیە ببنە هۆی شەقیقە، بۆیە دابەزاندنی كێشی زیادەی لەش لەوانەیە تیژی یاخود رێژەی سەرئێشە كەمبكاتەوە.

10-ئارەزووی خواردن زیاددەكات
كەمبوونەوەی كێشی لەش ئاستی (لێپتین) كەمدەكاتەوە، کە هۆرمۆنێكە خانەكانی چەوری دەریدەدەن كە پەیامی تێری بە مێشكت دەگەیەنێـت، كاتێك جەستەت دەیەوێت ئاستی (لێپتین) بگەڕێنێتەوە بۆ دۆخی ئاسایی خۆی، ئارەزووی خواردنت زیاتردەكات و واتلێدەكات ئارەزووت بۆ خواردنە چەور و خواردنە كالۆری بەرزەكان زیاتربێـت، بەڵام پاش ماوەیەك لە دابەزاندنی كێشت جەستەت ڕادێت لەسەر ستایلە نوێیەكەی.

11-چیتر ناپرخێنیت
بەگوێرەی توێژینەوەکان دابەزینی رێژەی 5%ی كێشی لەشت یارمەتیتدەدات بۆ خەوتنێكی ئارامتر و ماوەدرێژتر لەكاتی شەودا، دەریشكەوتووە دابەزینی كێشی لەش، كێشی زیادەی چواردەوری مل كەمدەكاتەوە كە بە گشتی بۆریەكانی هەناسە دادەخات و دەبێتە هۆی پرخە لەكاتی خەودا.

ئه‌م بابه‌ته 17424 جار خوێنراوه‌ته‌وه‌‌

Copyright © 2015 Xendan.org all rights reserved
Created by AVESTA GROUP