سۆران عومه‌ر بۆ خه‌ندان: ته‌نیا "خوای‌ ته‌عالا" و ئه‌م كه‌سانه‌ ده‌زانن پاره‌ی‌ نه‌وت له‌ كوێیه‌

خه‌ندان- ئیدریس جه‌بار

ئه‌ندامێكی‌ په‌رله‌مانی‌ كوردستان رایگه‌یاند، وه‌زیری‌ دارایی‌ پێی‌ راگه‌یاندوون، گه‌ر بێت و داهاتی‌ نه‌وت به‌مشێوه‌یه‌ بگه‌ڕێته‌وه‌ بۆ هه‌رێم، دابه‌شكردنی‌ موچه‌ له‌ سێ مانگ جارێكه‌وه‌، ده‌بێته‌ چوار مانگ جارێك.

سۆران عومه‌ر ئه‌ندامی‌ په‌رله‌مانی كوردستان له‌سه‌ر فراكسیۆنی‌ كۆمه‌ڵی‌ ئیسلامی‌ به‌ خه‌ندانی‌ راگه‌یاند: " له‌ دیداری له‌گه‌ڵ رێباز حه‌ملان وه‌زیری دارایی، وه‌زیری‌ دارایی‌ پێی‌ راگه‌یاندوون كه‌ تائێستا بودجه‌ی ته‌واو بۆ دابه‌شكردنی موچه‌ی مانگی حه‌وت له‌به‌رده‌ستدا نییه‌، گه‌ر گه‌ڕانه‌وه‌ی داهاتی نه‌وتیش به‌م شێوه‌یه‌ بێت، ئه‌وا موچه‌ له‌ سێ مانگ جارێكه‌وه‌ ده‌بێته‌ چوار مانگ جارێك".

ئه‌و په‌رله‌مانتاره‌ وتیشی‌: "تا ئێستا داهاتی نه‌وتی فرۆشراوی هه‌رێم نه‌گه‌ڕاوه‌ته‌وه‌ و كه‌سیش زانیاری نییه‌ ئه‌و پاره‌یه‌ له‌ كوێیه‌".

به‌وته‌ی‌ سۆران عومه‌ر: "ته‌نیا خوای‌ ته‌عالا و ئاشتی‌ هه‌ورامی‌ و سه‌رۆكی‌ حكومه‌ت ده‌زانن پاره‌ی‌ داهاتی‌ نه‌وتی‌ هه‌رێم له‌كوێیه‌".
 
حكومه‌تی هه‌رێمی‌ كوردستان تائێستاش موچه‌ی سێ‌ مانگی فه‌رمانبه‌رانی نه‌داوه‌، جگه‌ له‌ وه‌زاره‌تی پێشمه‌رگه‌ش، هیچ وه‌زاره‌تێكی تری حكومه‌ت موچه‌ی مانگی ته‌موزیان وه‌رنه‌گرتوه‌، به‌پێی‌ زانیارییه‌كانیش، ئه‌و پاره‌ دیارنییه‌ كه‌ حكومه‌تی هه‌رێم له‌به‌رانبه‌ر فرۆشتنی نه‌وت له‌ مانگی ئه‌یلولدا ده‌ستی كه‌وتوه‌ كه‌ بڕه‌كه‌ی به‌ 850 ملیۆن دۆلار، مه‌زه‌نده‌ ده‌كرێت.


أ.ج


ئه‌م بابه‌ته 7846 جار خوێنراوه‌ته‌وه‌‌

نیشانە کردن

‌‌‌

                  
                  

زۆرترین خوێندراو


Copyright © 2016 Xendan.org all rights reserved
Design by AVESTA GROUP , programming and database by KURDSKY.COM