ئه‌و پیشه‌یه‌ی له‌ شاری‌ (كۆبانێ)وه‌ بۆ هه‌شت وڵاتی‌ تر گوازرایه‌وه‌


خه‌ندان_

پیشه‌ی‌ دروستكردنی‌ حه‌فاره‌ی‌ هه‌ڵكه‌ندنی‌ بیری‌ ئیرتیوازی‌ یان وه‌ك ئه‌وه‌ی‌ له‌ كۆبانێ پێیده‌وترێت "غرازات" یه‌كێكه‌ له‌و پیشانه‌ی‌ كه‌ شاری‌ كۆبانێ پێیناسراوه‌، ئه‌و شاره‌ له‌سه‌ر ئاستی‌ سوریا له‌ دوای‌ شاری‌ حه‌له‌ب به‌ دووه‌م شار داده‌نرێت له‌و پیشه‌سازییه‌دا.

پیشه‌ی‌ دروستكردنی‌ حه‌فاره‌ی‌ هه‌ڵكه‌ندنی‌ بیری‌ ئیرتیوازی‌ له‌ ساڵی‌ 1988 برایه‌ كۆبانێ، ژماره‌یه‌كی زۆری‌ دانیشتووانی‌ ئه‌و شاره‌ پشتی‌ پێده‌به‌ستن بۆ ده‌ركردنی‌ بژێوی‌ ژیانیان، هه‌روه‌ك ئه‌و كاره‌ له‌ چه‌ند وڵاتێكی‌ تردا په‌ره‌یسه‌ند.

 سه‌رباری‌ كه‌می‌ تواناكان و خراپی كه‌رتی‌ پیشه‌سازی‌ له‌ كۆبانێ، به‌ڵام دانیشتووانه‌كه‌ی‌ به‌ ئامانجی‌ دابینكردنی‌ بژێوی‌، توانییان ئه‌و پیشه‌یه‌ بهێننه‌ شاره‌كه‌ و ده‌ستڕه‌نگینی‌ خۆیان بنوێنن.

ئامێری‌ "غرازات" بۆ هه‌ڵكه‌ندنی‌ بیری‌ ئیرتیوازی‌ به‌كاردێت، پێشتر خه‌ڵك به‌ ده‌ست یا به‌ ئامێری تر بیریان هه‌ڵده‌كه‌ند كه‌ پێی ده‌وترێت "ناعور" له‌گه‌ڵ ده‌ركه‌وتنی‌ ئه‌م جۆره‌ ئامێره‌، ده‌ستكرا به‌ هه‌ڵكه‌ندنی‌ بیری‌ ئیرتیوازی‌ كه‌ ئاوی‌ ژێر زه‌وی له‌ قوڵاییه‌كی‌ زیاتر ده‌رده‌هێنرێت.

پێشتر شاری‌ حه‌له‌ب، ته‌نیا شاربوو له‌ سوریا كه‌ تیَیدا حه‌فاره‌ی‌ بیری‌ ئیرتیوازی‌ تێدا دروست ده‌كرا، له‌وێ پیشه‌وه‌ره‌ ئه‌رمه‌نییه‌كان تیَیدا هه‌ڵده‌كه‌وتن، له‌گه‌ڵ بردنی‌ ئه‌و پیشه‌یه‌ بۆ شاری‌ كۆبانێ له‌ كۆتایی هه‌شتاكانی‌ سه‌ده‌ی‌ رابردوو، هه‌ردوو شاری‌ حه‌له‌ب و كۆبانێ‌ بوون به‌ دوو شاری‌ سه‌ره‌كی‌ پیشه‌ی‌ دروستكردنی‌ حه‌فاره‌ی‌ هه‌ڵكه‌ندنی‌ بیری‌ ئیرتیوازی‌.

محه‌مه‌د ئۆسمان كینجۆ، یه‌كه‌م كه‌س بووه‌ ئامێری هه‌ڵكه‌ندنی‌ بیری‌ ئیرتیوازی‌ بردووه‌ بۆ كۆبانێ

كینجۆ، له‌ ساڵی‌ 1957 له‌ گوندی‌ حلینج له‌ كۆبانێ له‌دایكبووه‌، له ‌ته‌مه‌نی‌ 18 ساڵییه‌وه‌ شار به‌ شاری‌ سوریا گه‌ڕاوه‌ بۆ كاركردن، تا دواجار ده‌بێتـه‌ كرێكار و له‌سه‌ر یه‌كێك له‌ حه‌فاره‌كانی‌ هه‌ڵكه‌ندنی‌ بیری‌ ئیرتیوازی‌ كار ده‌كات.

دواتر هه‌وڵیدا خۆی‌ حه‌فاره‌یه‌ك هه‌بێت، بۆیه‌ داوای‌ یه‌كێك له‌ ئه‌رمه‌نه‌كان كرد حه‌فاره‌یه‌كی بۆ دروست بكات، له‌دوای‌ سێ مانگ بوو به‌ خاوه‌ن حه‌فاره‌.


له‌ ساڵی‌ 1988 كینجۆ ده‌ستیكرده‌ دروستكردنی‌ حه‌فاره‌ له‌ كۆبانێ، له‌گه‌ڵ تێپه‌ڕبوونی‌ كات، توانی‌ پیشه‌كه‌ بگوازێته‌وه‌ بۆ زۆرێك له‌ دانیشتوانی‌ شاره‌كه‌ی‌، به‌وه‌ش ئه‌و پیشه‌یه‌ بوو به‌ یه‌كێك له‌ گرنگترین پیشه‌كان كه‌ شاری‌ كۆبانێی پێده‌ناسرێته‌وه‌.

ئه‌و پیشه‌وه‌ره‌ ده‌ڵێت: "له‌ ماوه‌یه‌كی‌ كورتدا، پیشه‌ی‌ دروستكردنی‌ حه‌فاره‌ی‌ هه‌ڵكه‌ندنی‌ بیری‌ ئیرتیوازی‌ له‌ شاری‌ كۆبانێ په‌ره‌یسه‌ند، له‌گه‌ڵ به‌ره‌وپێشچوونی‌ ئه‌و پیشه‌یه‌، داخوازی‌ له‌سه‌ر حه‌فاره‌ی‌ كۆبانێ تا ده‌هات زیادی‌ ده‌كرد، بۆیه‌ زۆرێك له‌ وڵاتان خواستیان له‌سه‌ر په‌یدا كرد، وه‌ك: جه‌زائیر، سودان، مه‌غریب، سۆماڵ، میسر، توركیا، عیراق و باشووری‌ كوردستان كه ‌ئێستا به‌ سه‌دان حه‌فاره‌ له‌و وڵاتانه‌دا هه‌یه‌.

ئاماژه‌ی‌ به‌وه‌شدا كه‌ دوای‌ قه‌یرانه‌كه‌ی‌ سوریا و ئه‌و بارودۆخه‌ خراپه‌ی‌ وڵاته‌كه‌ی‌ تێدا تێپه‌ڕێت، له‌گه‌ڵ ئه‌و گه‌مارۆیه‌ی خراوه‌ته‌سه‌ر سه‌ر رۆژئاوا، به‌شێوه‌یه‌كی گه‌وره‌ كاریگه‌ری‌ خستووه‌ته‌ سه‌ر پیشه‌كه‌یان، به‌ڵام له‌گه‌ڵ ئه‌وه‌شدا ته‌ئكید ده‌كاته‌وه‌، كه‌ ده‌توانن جارێكی‌ تر په‌ره‌ به‌ پیشه‌كه‌یان بده‌نه‌وه‌، گه‌ر كه‌ره‌سته‌ و توانای‌ پێویست له‌به‌رده‌ستدا هه‌بێت.

مه‌حمود ئۆسمان كینجۆ، ماوه‌ی‌ 40 ساڵه‌ له‌و پیشه‌یه‌ كارده‌كات و تائێستاش به‌رده‌وامه‌.

له ‌عه‌ره‌بییه‌وه‌: سۆران كه‌ریم

خ.غ


ئه‌م بابه‌ته 6202 جار خوێنراوه‌ته‌وه‌‌


Copyright © 2016 Xendan.org all rights reserved
Design by AVESTA GROUP , programming and database by KURDSKY.COM