ڕیفراندۆم لە دۆخی شەڕدا

بەهرۆز جەعفەر - 25-08-2017 - 3090 جار خوێندراوەتەوە


زانیاریی و داتاكان، ئەوە نیشان ئەدەن كە ئێستا كوردستان لە دۆخی شەڕدایە، بە تایبەتی ناوچەی كەركوك و سولەیمانی، شەڕێك ھاوشێوەی بەرئەنجامەكانی شكستی ڕۆڵی دەوڵەت و  دەستەڵات لە باكوری ئەفریكا، كە ھۆزەكان تێك بەربوون، ڕەشوەو دەستەڵات و ھەمەر لەخۆ كۆكردنەوەو دەستوەردانی دەرەكی سەرەتاكەیەتی. لە شارێكی وەك كەركوك دا، ناوی نزیكەی بیست و پێنج ئەفسەرت  پێ بڵێم كوردن و، یەكێتین و، بە پرس و ئاگاداری بەرپرسانی شارەكە بوون بە "حەشدی شەعبی". سەدان دۆنم زەوی داگیركراو، سەیتەرە و مەركەزی پۆلیس فرۆشتن، باند دروستكردن و خەڵك كوشتن و، كێبڕكێی دەوڵەمەندی، كەسێك لە ھەڵەبجەوە ھاتووەتە دەوروبەری كەركوك بە بڕی (۲٥۰۰۰۰) دووسەت و پەنجا ھەزار دۆلاری ئەمریكی (واتە ۲٥ دەفتەر) بووە بە ئامر لیوا...!.

سكانداڵ و ئاماژە ترسناكەكان، لە سولەیمانی و گەرمیان زیاترن و، بەرپرسیارێتی نووسین قورستر ئەكەن!. 

چ لە سەرشاشەی تەلەفزیۆن، چ لە نووسین، چ لە كۆڕوكۆڕبەندی سیاسیەكان، ڕای جێگیری من وایە، كە نیشتیمانسازی و كاركردن بە كاردانەوەو ڕق و كینە ناچێتەسەر...
دەوڵەت گرنگی: مێژوویی، سیاسیی، دەستوریی، فەرھەنگی، ئابوریی، نێودەوڵەتی... گەورەی ھەیە. تەنانەت لە ڕەنگ و دەنگ و سایكۆلۆجیەتی تاكەكانیشدا ڕۆڵی ھەیە، ئینجا بۆ (كورد) یش (دەوڵەت) ێك دووجار لە خودی خۆی زیاتر گرنگە، چوارچێوەیەكە لە ناوەوەیدا ھەموو كۆنسێپتەكانی تر لە بۆتەی دا دەق ئەگرن، بەم دۆخەی ئێستای كوردستان لە پڕ ئەكەوێتە بەردەم ھاتنە ژوورەوەی ڤایرۆسی ئەملاولا، جگە لە میكرۆبەكانی ناو خودی خۆی، لەبەرئەوەی دەستەڵاتێك نیێە ھەموان بە مەعریفەیەكی پیرۆزەوە سەرقاڵ بكاو لە دەوری كۆببنەوە. 

ئێمە بۆ دروستكردنی ئەم (دەوڵەت) ە، نە پێویستمان بەو دەنگە دەنگەیە كە پارتی دیموكراتی كوردستان و موشتەقاتەكانی دروستیان كردووە، نە ئەو نەخێرانەی كە نازانن  كەی و لە  كوێدا و بۆچی ئەڵێن نەخێر!. لە ڕاستیدا ڕیفراندۆم وا ناچێتە سەر!. بەلای كەمی كوردستان ئەخاتە دۆخی شەڕێكی دژواری نێوخۆیی و ھەندێ پرۆژەی ھەمەچەشنی ئیقلیمیەوە. 

ئێمە پێمانوایە، بونیادنانی دەوڵەت-State Buillding پێویستی بە (بیناكاریی نەتەوەیی- Nation Buillding) بە (سەرسكە خستنی ئابوریی گەشەكردووی بەردەوام- Sustanable Economic Developement) ئەكرێت لە ژێر ڕۆشنایی دوایین گۆڕانكارییە ھەرێمایەتیەكاندا، ئەوەش بە سەرپێخستنی ناوەندی بیركرنەوەی بەھێز و كاریگەر ئەبێت، كە ڕۆڵیان لە نیشتیمانسازی دا ھەیە، ئێمە ویستمان وا بكەین پارتی دیموكراتی كوردستان نەك سەنتێك لە دارایی نەخستە خزمەت بەڵكو ڕێگریشیان كرد لە كارئاسانیەكانی دەرەوەی ھەرێم و لەوەش زیاتر لە ھەرێم مۆڵەتی كاركردنەكەیان پێنەداین و كاتی زۆریشیان كوشتین. ئیتر دڵمان گەورەیەو، ئیشی خۆمان ئەكەین، ئەوانەی ئیمڕۆ ئامادە نین سبەی مافی تانەدانیان نییە، ئێمە مرۆڤگەلێكین بۆ خەونی گەورە ئامادەگیمان ھەیە لە ژیاندا، نە ئەو مرۆڤانە بین  بە دیار دەستەواژە خورافی و نا واقعیەكانی كەسانی ناو دەستەڵاتەوە دابمێنین و ڕابوەستین. 

بۆ پاڵپشتی زیاتری، ئەو ئایدیایەی ئێمە پێشكەش مان كردووە، بڕواننە فۆڕم و شكڵگرتنی دەوڵەت و پاشانیش شكستھێنانی دەوڵەت لە جیھانی عەرەبیدا (State formation and State de-formation in the Arab World after the Arab uprising in -٢٠١١-)

ئەو فاكتەرانەی كە ڕۆڵیان ھەبو لە دروستبونی دەوڵەت دا لە دوای ڕووخانی دەوڵەتی عوسمانی و جەنگی جیھانی یەكەمەوە لە ڕۆژھەڵاتی ناوەڕاست چی بوون؟.  ئەی ئەو فاكتەرانە چیین بوونە ھۆی شكستی ڕۆڵی دەوڵەت لە دوای بەھاری عەرەبی و شۆڕش لە تونس- لیبیا- میسر- سوریا، ھەڵبەتە پێشوتریش لە عێراقی ساڵی (۱۹۹۱) و دواتر لە عێراقی ساڵی (۲۰۰۳ ھەتا ۲۰۱۷) ھێشتا خوێن ئەڕژێت!.

ئیتر ئەو لە باتی لەملاولای دونیاو  بە زمانی دونیا باسی خاسوخراوی ئەم  فەزایەو ئایندەكەی بكەین، لەناوخۆدا مشتێك یمان بەیان كرد.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP