سایکۆلۆژیای دەرونی حزبی کوردی

سەپان ئەنوەر - 16-08-2017 - 2410 جار خوێندراوەتەوە

حزبە کوردییەکان هەموویان وەک یەک بیردەکەنەوە بەبێ جیاوازی وەک یەک بریار ئەدەن وەک یەک کۆئەبنەوە وەک یەک پاکێج و بەرنامەیان هەیە بۆکۆمەڵگە، دیدیان وەک یەکە بۆ چارەسەری پرسەکان، هیچکامێکیان شتێکی نوێی پێ نییە بۆ کۆمەڵگە، ئەوەی ئەو حزبانە لەیەکتری جیادەکاتەوە تەنها ڕەنگە، هەروەکو لە هەڵبژاردنەکانی ڕابوردوو بینیمان کە لە پاکێجی حزبەکاندا هیچ جیاوازیکیان نەبوو بۆ بەرەو پێشبردنی گوزەرانی خەڵک بۆ گەواهیدانی ئەم قسەش خراپ بوونی دۆخی هاوڵاتیانە کە لە ئەنجامی دورشمی  قەبەو گەورەی حزبەکان خەڵک گەیشتە ئەم دۆخەی ئێستا. 

حزبی کوردی دەرونی نەخۆشە، هەروەکو مرۆڤ کاتێک توشی نەخۆشی دەرونی ئەبێت بۆ حزبە کوردیەکانیش  ئەمە راستە، بۆیە حزبەکان لە ناوەخۆیاندا توشی قەیرانی بەرێوەبردن و بیرکردنەوە و بێ شەرعیەت بوون، هەرئەمەش وایکردوە حزب توشی دابڕان ببێت  لە کۆمەڵگە، ئەو لە دۆڵێک و هاوڵاتی لە دۆڵێکی تر هیچ پردێک نماوە کە کۆمەڵگە و حزب پێکەو گرێ بدات بۆیە حزبەکان زۆر جار لە ژوورە تاریکەکان و لەسەر مێزی حزبی وەک یەک دەست بۆ پرسە هەستیارەکان دەبن بێ ئەوەی بگەرێنەوە بۆ خەڵک و هەرخۆیان بوونەتە مەرجەعێکی بێ شەرعیەت بۆ لە ناوبردنی شەرعیەت. 

تاکە کەناڵ کە ماوە لە نێوان خەڵک و حزبەکان لە ئێستادا دامەزراوە فەرمیەکانە کە بە دەردی نەخۆشی حزبەکان چووە ، بۆیە بۆتە کائینێکی ئیفلیج و پەکخراو. بە پێی ئامانج و مەبەستە حزبیەکان پلان  دائەڕێژێ بۆ مۆنۆپۆلکردنی هەموو جومگە هەستیارەکان کە راستەو خۆ پەیوەندیان  بەژیانی خەڵکەوە هەیە،حزبە کان هەر ئەو ڕێگایەشیان لەبەردەستە بۆ ملکەچکردن و کۆنتڕۆلکردن و سەپاندنی هەژموونی خۆیان بەسەر کۆمەڵگە بۆئەوەی هەرچۆنیان بوێت ئاراستەیان بکەن و هەرخۆیان ڕێبەرایەتیان بکەن.

پێویستە لێکۆلینەوەی جدی بکرێت لەسەر دەروونی ئەو حزبە نەخۆشانە کە چی یان ئەوێت لە خەڵک، ئایا ئەیانەوێت کۆمەڵگە  ملکەچیان بێت یان هەوڵ ئەدەن کۆمەڵگە ملکەچ بکەن.

حزب لێرە بۆتە ئەو دێوە زمەی کە تەنها ئاشوب و بەڵای بۆ کۆمەڵگە هێناوە. بۆیە بۆتە  تاکە مەرجەع کە لەبری هەموان رەفتاردەکات و بریار ئەدات کە ڕەنگە زۆرجار کۆمەڵگە بیەوەێت رووبەڕووی ببێتەوە ..یان تیرۆر دەکرێت یان برسی و سزادەدرێت. 

حزبە کوردیەکان لەسەر بنەمایەکی راست و دروست دانەمەزراوە بۆیە لە دەسپێکی کارکردنی توشی گرفت و ململانێ دیاردە  دیارو شاروەکان دەبێتەوە هەم لەناوەخۆی و هەم لەگەڵ ژینگەی دەوروبەری بەهۆی ناشارەزایی و تێکچونی باری دەرون وناعقلانی..ئاڵودەی دەسەڵات دەبێت و ڕێگەی ووشیاری لەدەست ئەدات.

هەرئەوەشە حزبەکان هەموو رۆژێک کۆمەڵگە نوقمی قەیرانێکی نوێ دەکەن بۆ پیادەکردنی دەسەڵات و ملکەچکردن و گوێڕایەلی کۆمەڵگە بۆ خۆی، یان لە ڕێگەی مەستکردنی خەڵک بۆ دروست بوونی دەوڵەت لە خەیاڵدانی حزب کە حزبەکان وەک دەوڵەت و دەوڵەت وەک حزب ببینرێت. 

حزبەکان بێ جیاوازی لە غیاب و نەبوونی دەستور و یاسا لەناو دامەزراوەکان بوونەتە هۆی بەردەوامبوونی دەسەڵاتێکی ستمەکار کە  بۆتە هۆی ناسەقامگیری سیاسی وئابوری بەردەوام، بۆیە هەمیشە لە دڵەڕاوکێی تێکچوونی ئاسایشدا دەژیت و هەموو کۆبونەوەیەکی جەماوەری رەتدەکاتەوە. بۆیە هەرجوڵانەوەیەک پێچەوانەی خواست و ویستی حزبەکان قوتبێتەو بە دیدێکی موگلەق و ناعقلانی بەرپەچی ئەداتەوە.
 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP