گۆڕان سەركەوت، بەڵام…

کاوسێن بابەکر - 31-07-2017 - 2314 جار خوێندراوەتەوە

گۆڕان بەسەر خستنی هەڵبژاردنەكانی توانی گەورەترین هەڕەشە،كە لێكبڵاوبوون وپەرتەوازەیی بوو تێپەڕێنێ،دەرچوونی تیمێك لە سەركردەی كۆن هەرچەند جێگەی ڕەخنەیە بەڵام، بەلای منەوە، ئەم تیمە ڕەنگە بۆ ئێستا گونجاوتر بێ وبەهۆی ئەزموونی زۆریانەوە باشتر لەگەڵ دۆخەكە هەڵكەن وواقبینانەتر بچنە ناو دان وسانەكانەوە بەتایبەت، لەگەڵ پارتی كە تێكچوونی نێوانی ئەم دوانە دۆخەكەی گەیاندۆتە لێواری بێ ئومێدی،بەتایبەت لەئێستادا كار بۆ ڕیفڕاندۆم دەكرێ وئەویش یەكڕیزی نێواماڵی كوردی وەك پێشمەرجی پرۆسەكە پێویستە.

بەڵام ئەمە بۆخۆی یەكێكیشە لەوئاماژانەی پێمان دەڵێ، كە هێشتا كۆمەڵێك كەموو كوڕی هەن كە وادەكەن مەترسیەكە بەزیندوویی لە هەناوی بزوتنەوەكەدا هێشتا گینگڵ  بدات.

پڕۆسەكە دەریخست هێشتا گۆڕان شێوازو میكانیزمی تەقلیدی هەڵبژاردن وكەم وكوڕی ودەستەگەریە نادێموكراسیەكانی حزبی كوردی وەك چاوەڕوان دەكرا جێنەهێشتووە، لەوانە رێككەوتنی پێشوەختەی كەسەكان و ڕەوتەكان لەسەر حسابی دیموكراسی ناوخۆی حزب، پشتگوێ خستنی ژنان، ئاوت كردنی گەنجان، بونی تەكەتول...لەوەش بترازێ كار بە وەسێتەكەی كاك نەوشیروانیش نەكرا كە داوادەكات ئەزموون وخوێنی نوێی گەنجان لەسەر كردایەتیكردنی گۆڕاندا تێكەڵ بكرێ!

ئەمانەش بەڕوونی لە ناومیكانیزمی پڕۆسەكەو ئەنجامەكەی نمایان بوو.

گۆڕان بە هێنانە پێشی گەنجان لەم چەند ساڵەدا خۆی تاڕادەیەك لە حزبەكانی تر جیاكردبووەوە، زۆربەی ئەندام پەرلەمان وئەندامی پارێزگاكان و وەزیرو بەڕێوەبەرە گشتییەكانی گەنج بوون وژنیش بەشی خۆی پێدرابوو، بەڵام ئەوەی لە هەڵبژاردنی خانەی راپەڕاندندا بینیمان ڕێك پێچەوانەی ئەم ڕابردووە بوو!.

لەم حەوت كەسە كەسیان نەگەنج نەژن بوون ولە شەش كەسەكەش كە بۆخانەكە هەڵبژێردران تەنها دوانیان ڕكابەری هەبوو! ئایا فشار هەبوو یان كەس بەتایبەت گەنج  پڕكێشی خۆكاندیدكردنی نەكردووە، لەبەر هەر هۆیەك بێ؟!یان وەك هێندێك لەگەنجەكانی ئەم بزوتنەوەیە دەڵێن ساختەكاری هەبوو!.

كارتی سپی وجیاوازی دەنگ لە نێوان ئەندامی خانەو ڕێكخەری گشتی، شایانی تێڕامانە وبەقەد ئەوجیاوازیە نیشانەی جیاوازی ناوخۆی بزووتنەوەكەن!.

بەڵام سەرەڕای هەموو گلەیی وگازندەكان گۆڕان سەركەوت لە سەرخستنی پڕۆسەكە كە هێندێك لەحزبەكانی تر دوای چەندین ساڵ بەسەر وادەی كۆنگرەدا نەیانتوانیووە كۆنگرە ببەستن!.

سەركەوت لە پڕكردنەوەی بێ كێشمەكێشی ڕێكخەری بزووتنەوەكە، ئەمەش بۆ خۆی دووربینی ودڵسۆزی كادیرەكانی دەردەخات، بەڵام گرەوی سەركەوتنی  یەكجاری بزووتنەوەكە لە هەنگاوی كردارەكی لە مەودوای ئەم بزووتنەوەیەدا دەردەكەوێ، با چاوەڕوانبین.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP