ڕیفراندۆم لەبەردەم بە حیزبی كردن وشەخسەنەكردندا.!

لوقمان مسته‌فا ساڵح - 18-07-2017 - 2515 جار خوێندراوەتەوە

هەتا دێ پارتی دیموكراتی كوردستان، گومانی بەحیزبیكردنی ڕیفراندۆم لای هاوڵاتیان زیاتر دەكات،لەكاتێكی واھەستیارداو كەلەسەروبەندی بەڕێوەچونی ڕیفراندۆمداین،لەبری ئەوەی لەدووروونێزیكەوە بیری تەسكی حیزبایەتی تێكیڵ بەو پرسە نیشتیمانیە گرنگە نەكرێت، كەچی نەك ھەرواخەریكە بە حیزبی دەكرێت بەڵكو ئاماژەكان وامان پێ دەڵێن واخەریكە بە شەخسەنەش دەكرێت.! دانانی وێنەی جەنابی كاك مسعود لە شوێنەگشتیەكاندا و پاشان لەژێر فشارێكی زۆردا دەستیان كرد بەلادانی ئەو وێنە نایاساییانە،ئەو كردەوانە ئەوەی پێشانی ئێمەو نەیارانی پارتیدا و پشتڕاستی كردەوە كە ڕیفراندۆم موڵكی تاكە حیزبێكە وسەروەری سەركەوتنی ئەوپرسە نیشتیمانیە تەنها لەیەك حیزب ویەك بنەماڵەو یەك كەسدا قەتیس دەكەن كە پێشتر كۆی كورسیەكانی ئەو حیزبە لە ھەڵبژاردنی پێشودا تەنھا ٣٨% بووە.!!

ئاخر گەلۆ پێشتریش ھات وھاوارمان بوو دانانی وێنەی سەركردەو كەسایەتیە سیاسیەكان لە دام و دەزگاو شوێنە گشتیكاندا، كەی مانای دەستاودەست كردنی دەسەڵاتە!!، دەمان ووت ئەم دیاردەیە لەگەڵ ئەوەی پێجەوانەی یاساو پرۆژەدەستوری ھەرێمی كوردستانە، لەھەمان كاتدا ناكۆكیشە لەگەڵ سیستەمی بەرێوەبردنی ووڵاتێك كە دەم لە دیموكراسیەوە بكوتێت.! 


ئەم ڕەفتارانەی ھەڤاڵانی پارتی ناكۆكە لەگەڵ درووشمی بریق وباقی حیزبەكەیان كەھەڵگری درووشمی دیموكراسیە.! خوازیارین  كە جەنابی كاك مسعود بەرزانی ئاگاداری ئەم ناحەقیەنە بێت كە حیزبەكەی دەرحەقی دەیكەن.

مایكڵ ڕۆبن، لە وتارێكیدا ئاماژە بە ئەزموونی باشووری كوردستان دەكات و دەڵێت:-  "كوردەكانی عێراق دوای رووخانی سەدام نەیانتوانی گرەوی ئازادی ببەنەوە؛ ئەوان زۆر بە سانایی وێنەی دیكتاتۆری عێراقیان لابرد و وێنەی یەكێكی خۆیانیان لە جێی دانا." نووسەری وتارەكە جەخت لەسەر ئەوە دەكاتەوە كە "پێویست ناكات كوردانی توركیا و سووریا ئەو ئەزموونە دووپات بكەنەوە و دەبێ بزانن كە وێنەی دیكتاتۆرەكان لە باتی ئەوەی جێگۆڕكێیان پێ بكرێت دەكرێ وەلا بنرێن".

ئەوەی ئاشكراشە لای ھەموان و پشتڕاستكردنەوەی قسەكەی (مایكل ڕۆبن)ە چونكە تەنھا لە ووڵاتانی سیستەمی دیكتاتۆری گرنگی یەكی زۆر بە وێنەی دیكتاتۆر ئەدرێت، نەك ووڵاتانی دیموكراتخواز.

 ھەرچەندە سەركردە سیاسیەكانی ھەرێمی كوردستان، لە ھەموو بۆنەكاندا قسەو باس لە پێشكەوتن و دادپەروەری و دیمۆكراسی و مافی مرۆڤ و سەروەری یاسا دەكەن و لە بانگەشەی ھەڵبژاردنەكاندا باس لە دەستاودەست كردنی دەسەڵات دەكەن، بە شێوەی ئاشتیانەو لەرێی سندوقەكانی دەنگدانەوە،بەڵام  لە ئەرزی واقعیدا دوورە لە ڕاستیەوەو مەخابن پێچەوانەكەی راستە.

 ئەمە حەقیقەتی زۆربەی ئەو سەرۆكانەیە وا ساڵی جارێك بە ناچاری لە بۆنە نیشتیمانی و نەتەوەییەكانداو یان چوارساڵ جارێك لەكاتی ھەڵبژاردنەكاندا لە پاڵ وێنە زەبەلاحەكانیانەوە دەردەكەون و بە شان و باڵی گەل و نەتەوەدا ھەڵدەدەن شاباشی خۆیان دەكەن.!

 ئەمە ئازایەتی و میھرەبانی و ویژدانی زۆربەی ئەو سەرۆك و سەركردانەیە كە راستەو خۆ لە شاشەی كەناڵە ئاسمانیەكانەوە دەبنە فریاد رەس و كۆتری سپی ئاشتی،باس لە گۆرینی سیستەمی دەسەڵاتی سیاسی دەكەن وچاكسازی بۆتە بنێشتە خۆشەی بن زمانیان، كەچی بۆ تەنھا جارێكیش بیرناكانەوە و بڵێن ئێمە باس لە دیموكراسی دەكەین ئادەی ئەو وێنانە داگرن،چونكە خۆئاشكرایە لە دیموكراسیەتدا ھەڵواسینی وێنەی سەركردە بەشێوەی خۆسەپێن جێگای نابێتەوە.!! ئیترچۆن ئامادەیی ئەوەیان تێدایە كورسی دەسەڵات لە پرۆسەیەكی دیموكراسیدا جێبھێڵن و را دەستی كەسانیتری بكەن كە میللەت لەھەڵبژاردنی ئایندەدا ھەڵیان دەبژێرێت .!!

ھەمیشە دیكتاتۆرە چەقبەستووەكان، لەپێناوی پاوان و قۆرخ كردنی دەسەڵات و بەئەبەدی كردنی تەمەنی ھەتا ھەتایی  حكوومەتی رەھا و بێ‎سنووری خۆیاندا سیاسەتیان بەرەو ھەڵدێر بردووە، ھەمیشە بۆ رەخساندنی بارودۆخی چەقبەستوو ھەوڵیان داوە ‌و بەردەوام بن لە چەقپەروەری، ھەر كاتێك بە پێویستیان زانیبێ ھەموو سنوورێكی یاساییان بەزاندووەو،  پێشێل كردنی مافەكانی ومرۆڤیان كردووە.كە تەمەنادەكەین ھەرێمی كوردستان بە دووربێت لەم جۆرە سیستەمانە بەدوور بێت لەوبیركردنەوە تاكڕەوانەیەوناواقعیە.

بەداخەوە بۆیە وادەڵێین چونكە لە رۆژھەڵاتی ناوەڕاستدا زۆرینەی سەرۆك وسەركردەكان  ماسكدارن ، ئەوان  خۆیان دەرھێنەرو سیناریستزان و كاراكتەرێكی بەتواناوبەسەلیقەی شانۆ گەریەكانن،ئەگەر پێیان بكرێت  وێنەیان وەكو جەنگاوەرێك یاخود پەیامبەرێك لەسنگی ھەموو تاكێكی ئەم میللەتە ستەمدیدەدەدەن،خۆیان واپێشان دەدەن ھەموو ژیانیان لە پێناو بەرگریكردن لە میللەت و خاك و نەتەوە بەخت كردبێت، خۆیان وا پێشان بە كۆمەڵانی خەڵكی بەستە زمان دەدەن كە تەنھا ئەوان پارێزگاری لە كوردو خاكی كوردستان دەكەن ، بە شێوەیەكی وا باسی ژیاننامەی خۆیان دەكەن، دادپەوەر، دیمۆكرات، راستگۆ، پاڵەوان، بیرمەند، بەخشندە، خاوەن مۆڕاڵ، بە شێوەیەك خۆیان نمایش دەكەن، وەكو ئەوەی ئەگەر ئەوان نەبن، ئیتر ژیانیش لەو ووڵاتەدا دەوەستێت؟!.

ئەمە ماھیەتی ھەر دیكتاتۆرێكە  لەئاست ئەم واقیعە نوێیەی دونیادا كە خەڵك بە گێل ونەفام دەزانن، لەكاتێكدا تاكی كورد زۆر لەوە ھۆشیارترە وباشتر ئەو راستییە دەزانن، سەردەمی ھەڵواسینی وێنە وپەیكەری وەھمی وبێبنەما و...ھتد نەماوە.!

زۆر لە مێژنیە وھەر ماوەی چەند ساڵێك بەر لە ئێستابوو زۆرێك لە دەسەڵاتە دیكتاتۆرەكانمان بینی كە بۆ نموونە،، دەستەڵاتی شای ئێرانمان بینی كە چی بە سەر ھات..سەرۆكی ڕۆمانیامان بینی كە چۆن ھەڵیانواسی و كردیان بە دارا.. سەرۆكی عێراقمان بینی لە ژێر زەوی وەك جرج گرتیان ودەریانھێنا و لە قەفەزی دادگاییدا بینیمانەوە و دواتر لە سێدارە درا..وە سەرۆكی تونسمان بینی كە چۆن لە ساتێكی زۆر كورتدا وڵاتی بەجێھێشت .. سەرۆكی تونس، پشوی نەدا و ھێور نەبوەوە..وە دوو مانگی نەخایاند سەرۆكی میسریش چووە پاڵی و لە ماوەی ھەژدە ڕۆژدا كورسی و كۆشك و ماڵ و وڵاتی بەزۆر و زەبری شۆڕسی ھاوڵاتیان.. بە شٶڕشی ملیۆنەھای ھەژارانی بێكار و بێ نان، كورسی دەستەڵاتی بەجێھێشت.پەیكەرەكانیان تیكشكێنراو وێنەكانیان سوتێنران.!!

دەبێت ئەوسەركردە سیاسیانەی لەمەر خۆشمان بەئاگابێنەوە چیتر بیر لە دەسەڵاتی تاكرەوی نەكەنەوە ، دەبێت ھەمیشە مێژووی ئەو كەسایەتیانەیان لەپێش چاوبێت و پەندو وانەیان لێوە فێربن.!!


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP