xendan ads

چیرۆك بۆ منداڵان.. گلەییەكانی بەشەكانی دارقۆخێك

رەزا شوان - 15-07-2017 - 2094 جار خوێندراوەتەوە

           
رۆژێك رەگ و قەد و لق و گەڵا و گۆڵ و بەری دارقۆخێك، كەوتنە گلەیەكردن لە یەكتری. هەریەكەیان ئەركەكانی، لە ئەركەكانی هاوڕێكانی تری بە گرانتر دەزانی. 

رەگەكان: ئێمە لە هەمووتان ماندووترین، كێتان وەكو ئێمەتان پێدەكرێ؟ بە ناخی زەویدا چووینە. بە رۆژ و بە شەو ئـاو و خوێی كانزایی هەڵدەمژین، بۆ ئێوەیان دەنێرین. گەر ئێمە نەتان گرین، رەشەبا بە پاڵێك دەتان خات. 

قەد: هاوڕیێی شیرینمان، پێزانینمان بۆ ماندووبوون و ئەركی گرنگی ئێوە هەیە. بەڵام ئێوەش خۆتان بە منەوە گرتوون. ئەو ئاو و خوێیە كانزاییانەی ئێوە هەڵیاندەمژن، من دەیان گەیەنمە لقەكان. منیش لە رووی گەرما و سەرما و رەشەبادا خۆم گرتووە، لق و گەڵا و گوڵ و بەر، هەموویان بەسەر شانی منەوەن، ئەركەكانی منیش لە ئەركەكانی ئێوە كەمتر نین. 

لقەكان: ئەو ئاو و خوێیە كانزاییانەی تۆی قەد پێمان دەگەیەنێ، ئێمەش دەیان گەیەنینە گەڵاكان. سیما و قەوارەیەكی جوانیشمان پێبەخشیون. سەرەتای هەموو بەهارێكیش چرۆی تازە دەكەین، دەیانكەین بە گەڵای  تازە. بە سەدان گەڵا و گوڵ و قۆخمان بە كۆڵەوەیە، رۆژانەش چۆلەكە و مەلی جوان و دەنگخۆش، لەسەرمان دەنیشنەوە. بێجگە لەمانە ئەركی تریشمان هەیە. 


گەڵاكان: ئیمەش بە رەنگی سەوز و گەشمان، جوانیمان پێبەخشیون، ئێمە چێشتخانە ئاسایین، لەو ئاو و لە كانزایانەی پێمان دەگەیەنن، لەگەڵ چەند گازێك و تیشكی خۆر و لە ماددەی تر كە لە سەوزیماندا هەیە، كارگە ئاسایی خواردن بۆ هەمووتان دروست دەكەین، هەموومان بەو خواردنە دەژێن. چەندین ئەرك و سوودی تریشمان هەن. 

گوڵەكان: ئێمەش رەنگێكی پەمەیی زۆر جوان، بۆنێكی زۆر خۆش، دیمەنێكی رەنگین و سەرنجڕاكێشمان هەیە. بەرەكانیش لە ئێمە لە دایك دەبن و پێدەگە، دەبنە ئەم قۆخە خۆش و بەتام و بەسوودانە. 

قۆخەكان: ئێمەش كە بەری ئێوەین، بە هاوكاری هەموو لایەكتان پێگەیشتووین، هێمای جوانی و بەسوودین. گەر ئێمە نەبین، مرۆڤ هێندە خزمەتمان ناكات و بە دەورماندا نایەت. ئێمە لەناو سكماندا ناوكمان هەڵگرتوون. بە ناوك ژمارەمان زۆرتر دەبێت و لەناوناچین. 

هەموویان: كەواتە هەموومان لە خزمەتی مرۆڤداین، ئەو سوودمان لێوەردەگرێت. 

قۆخەكان: بەڵێ وایە، بەڵام نابێ بێ ئەمەك و پێنەزان بین، مرۆڤیش خزمەتی ئێمە دەكا، پەین دەكاتە ژێرمان، گەر توینیشمابێت ئاومان دەداتێ، لە دژی نەخۆشییەكان و كـرم و مێشوولە و میكرۆبی زیانبەخش، دەرمانمان پێوەدەكات و دەمانپارێزێت. ئەویش مافی خۆیەتی كە سوودمان لێوەربگرێت.. ئەویش نەمان كاتەوە دەوەرێن و بۆگەن دەبین. جوانیشمان لە سوودبەخشیمان دایە.

قەد: هاوڕی دڵسۆزەكانم، قسەكانی قۆخەكان بەجێن، راستییەكیش هەیە، كە هەموومان دەیزانین، هەریەكە لە ئێمە گرنگی و ئەرك و كاری تایبەتی خۆمان هەیە، كە بە ئەوانی ترمان ناكرێن. من ناتوانم كارەكانی ئێوەی رەگ یا ئێوەی لقەكان یا ئێوەی گەڵاكان یا ئێوەی گوڵەكان یا ئێوەی بەرەكان ئەنجام بدەم. ئێوەش ناتوانن كارەكانی من ئەنجام بدەن. بەڵام ئێمە گیانێكین لە شەش جەستەدا. بەبی هاوكاریكردنی و پێكەوەكاركردن  كارەكانمان ناتەواو دەبن و نـاژین. با كۆتایی بەم گلەییانەمان بهێنین، درێـژە بە ئەرك و كارەكانمان بدەین. 


ئەم وتارە دەربڕی رای نوسەر خۆیەتی و خەندان لێی بەرپرسیار نییە

Copyright © 2016 Xendan.org all rights reserved

designed and developed by AVESTA GROUP