بەرەی خۆفرۆشان

جەمال حسێن - 7-07-2017 - 4674 جار خوێندراوەتەوە


دیسان فەزای ململانێی سیاسی كوردستان بەئاراستەی زمانی بازاڕی و زبرو دورلەهەرمەنتقێكی سیاسی پەلكێش دەكرێ. جارێكی تریش هەمان ئەقڵی كۆمیدی نەخۆش بێ هیچ هەست بەبەرپرسیاریەكی ئەخلاقی و نیشتیمانی خۆی كۆدەكاتەوەو بۆجەولەیەكی تری جنێودان و بوختان، لەوەش كۆمیدیتر ئەم جارەیان هەمان ئەو شوێنەی ئەو بایەی لێوەدێت، هەمان ئەو كونەیە كەبانگەشەی بەكریزی و پرۆژەی نەتەوەیی و كۆبونەوەی هەموانە لەدەوری یەك گوتاری نەتەوەیی!!. ئەم ئەقڵیەتە كورتیەكەی ئەوەیە یان لەگەڵمی، یان خۆفرۆش، یان پرۆژەكەی منت بەهەمو وردەكاری و مەرجەكانی منەوە قبوڵە، یان تۆ لەم نیشتیمانە جێت نابێتەوە، یان چەپڵەم بۆلێبدە، یان هوهات لێدەكەم، ژێرخانی ئەم گوتارە فاشیە ئەوەیە من گەلم و گەلیش منم. 

ناكۆكی سیاسی ناوخۆی كوردستان، پەرت بون و بڵاوەكردنی هێزەكانی، دابەشبونیان بەسەربەرەی ناتەبا، دوبەرەكی و لێكترازان، چاكسازی و شكستی حكومەت لەچارەكردنی كێشەكەڵەكەبوەكان و پەكخستنی پەرلەمان و تادەگاتە كێشە رۆژانەییەكانی ئاو كارەبا تەنگی بەهاوڵاتیانی ئەم وڵاتە هەڵچنیوە، ماوەتەوە سەر پۆلێنكردنمان لەسەر بنەمای خۆفرۆش و نیشتیمان پەروەر!!. من دەمێكە دەڵێم نەخشەی سیاسی كوردستان و كۆی روداوە رۆژانەییەكان و پێشهاتەكانی دەمێكە لەو ئاستەدابەزیوە كەبەزمانێكی جدی و خوێندنەوەی بابەتیانە بتوانی مافی خۆی پێبدەی، ئەم واقیع و لێدوان و بەیاننامەو هەڵوێستانەی رۆژانە لەو بازارە بێ سەرو بەرەیەدا هەڵدەبەزنەوە، پێویستیان بەزمانێكی كۆمیدی و گاڵتەئامێزە، بەجۆرێك كەهیچ كۆمەڵگایەك نیە بەئەندازەی كۆمەڵگای ئێمە ئەمڕۆ پێویستی بە(باسم یوسف) و (جۆن ستیوارت ) نەبێت.

 رۆژنیە لەلاپەرەی رۆژنامەیەك، لەشاشەی تیڤیەك (كەمن سەیری ناكەم) چاودێرێكی سیاسی(كەمن گوێی لێناگرم) دەرنەكەوێت و كۆمەڵێك قسەی سواوی ئێكسپایەر ساغ نەكاتەوە. پاڵەوانە درۆزنەكان لەكۆمەڵگای ئێمە مویەك جیایان ناكاتەوە لەراست گۆكان، سەدان دۆنكیشۆت خۆیان لێبوە بەعیسا. لەچەند ساَلی رابردو سەدان مونافیق و درۆزن و بودەڵەمان بینی لەهەمو سەنگەرەكان، ئێستا فەزای زمانەوانی كوردی پرە لەحساباتی غەڵەت و لێكدانەوەی بەتاڵ و مرۆڤی دەمامكداری گرگن. كۆمیدیترین پەردەی ئەو شانۆیەش لەئێستادا بەلای منەوە بانگەشەی دەوڵەتە بەتەنیشت بەخشینەوەی تكتی خۆفرۆشی، بەسەر هەمان ئەو نەتەوەی كەگوایە دەوڵەتی بۆدروست دەكەی!!.

 ئای بۆ سیناریست و دەرهێنەرێك بتوانی دەقیكی كۆمیدی مان بۆ دابرێژێ لەلێدوانی (كوردانی رۆژئاوا سەرلێشێواون) و (هەدەپە بەكرێگیراوە)و ئەوانەشی دەڵێن ریفراندۆم بێ كاراكردنەوەی پەرلەمان و بەدیهێنانی یەكریزی سیاسی و كۆكبونی كۆی هێزەسیاسیەكانی كوردستان و هەوڵدان بۆ دروستكردنی زەمینەیەكی ئابوری پتەو و رەواندنەوەی نیگەرانیەكان و بەدەست هێنانی پشتیوانی ژمارەیەك لەوڵاتانی ناوچەكەو جیهان، ئەمانەش ( خۆفرۆشن) !! دیوە تراژیدیەكەی ئەو ئەقڵیەتە كۆمیدیە ئەوەیە دەترسم هەربەراستی بڕوای بەوەبێت كەهەمو رەخنەیەك لەمیكانیزمی ریفراندۆم بەبێ بەدیهاتنی پێش مەرجەكانی، یەكسانە بەدژایەتی كردنی خەونی دەوڵەتی كوردی. وەكو ئەوەی رێگای ئەو كەپڕە لەنشێو ئەگەری خراپ و مەترسیە، لەهەمانكاتدا تاكەڕێ و پیرۆزیش بێت؟!. یان وەكو ئەوەی ریفراندۆم و دەرەنجام و ئەنجامەكانی پەیوەندی بەچارەنوسی هەرتاكێكی كۆمەڵگاوەنەبێت و پرسێكی داخراوی حیزبی بێت.

 لەچوارچێوەی ئەم گوتارەدا یەكێتی و باقی هێزەكانی تریش مادام پێش مەرجیان هەیە بۆ باشتركردنی ریفراندۆم و سەرخستنی و دواجار دروستكردنی زەمینەیەكی یاسایی و گونجاو بۆ كۆكردنەوەی پشتیوانی نێودەوڵەتیش، مادام بەسەر بەردەبازەكانی ئەو رێگا باریكەدا گوزەرناكەن، ئیدی ئەوانیش خۆفرۆشن!! وەكو ئەوەی ئەم وەكیلی نیشتیمان پەوەری بۆكرابێتەوە، ئەوهێزو كەسەی ئەو تكتی چونەبەهەشتی پێنەدا، ئەهلی دۆزەخە. چ جیاوازیەكی هەیە لەنێوان هەمان ئەو ئەقڵیەتەو ئەوانەشی كەهەمو رەخنەیەك لەخۆیان، بەرەخنە لەخوا ئەژماردەكەن؟ چ ناكۆكیەك دەبینی لەنێوان ئەوەی لەهەڵبژاردنەكان دەیوت ئەوەی لەدنیا دەنگمان پێنەدات، لەقیامەت یەخەی دەگرین، لەگەڵ ئەوەی دەڵێ لەگەڵ من نەبی، بەمەرج و رێساكانی خۆم، تۆ خۆفرۆشی؟! لەنێوانی ئەوانەش كەدوێنێ (نەك پێرێ) دەیان وت هەمو رەخنەیەك لەسیستەمی سیاسی كوردستان ئاماژەیە بۆ كۆنەقین و مەسەلەیەكی كەسیە، ئێستاش كەدەپشمن لەبری ئەوەی بڵێن(الحمد لله) دەڵێن بروخێ حكومەت!!

بێگومان یەكێتی هێزێكە كێشەی سیاسی و بونیادی جدی هەیە، دەمێكە یەكێتی كەوتۆتە ناو دۆخێكی خراپ و لەهەمو ئاستەكاندا روبەروی كێشەی قوڵ بۆتەوە، وەبێگومان یەكێتی لەساڵانی رابرد و بەئێستاشەوە بەئەندازەی قورسای خۆی بەرپرسە لەكێشە ئابوری و سیاسی و ئیداریەكان، لەسەروی هەموشیانەوە كێشەی گەورەی یەكێتی لەون بون و لێل بونی شوناسی سیاسیدایە. بەڵام لەهەمبەر مەسەلەنەتەوەییەكاندا ئەوەیەكێتی نیەو نەبوە كەمەیلی ئەملاو لای نواندوە. بۆیە بەخۆفرۆش ریزكردنی یەكێتی كە پێی وایە هێشتا ریفراندۆم پێویستی بەزەمینەسازی و رێكخستنەوەی ناوماڵی كوردی هەیە، لەباشترین حاڵەتدا تۆمەتێكە تیایدا ئەقڵ حزوری نیە. 

هەمو كەسێكیش دەزانی كەمن لەدەستەی ئەو كەسانەبوم كەهیچ كات بێدەنگ نەبوین و زۆرو كەمیش باجی ئەو قسانەمان داوە، تائەوەی سەردەمانێك كەئێمە رەخنەمان لەسیاسەتی راگەیاندن یان ئیداری یەكێتی دەگرت، هەندێك هەلپەرستی خۆ لێبو بەپاڵەوانی ئێستا نەیاندەوێرا سڵاومان لێبكەن و بگرە لەناو لیستی ناوەكانی مۆبایلەكەشیان ناویان گۆریبوین! بەڵام لەماوەی كورت و كەمی رابردودا، ئەمانە بون بەرابەرانی چاكسازی!! لەكاتێكدا ئەوەی ئەوانی جوڵاند خۆیان نەبو، بای بەرژەوەندی و خۆدەرخستن بو، ئەوەی ئەوانەی والێكرد شتێك بڵێن، قەناعەت و خوێندنەوەی خۆیان نەبو، ئافەرینێك و لایكێكی فەیس بوك بو، وەكو چۆن ئەوكات ئەوەی ئەوانی كردبو بەرۆبۆت و زوڕنا، بەهەمان شێوە بای بەرژەوەندی شەخسی و رازیكردنی ئەویتربو. ئەوكاتەش كە ئێمە تەسلیمی مەنتیقی زمانی زبرو بوختان و پەلاماری ناشیرینی نەیارەكان(گۆران بۆنمونە) نەبوین، بەوپێیەی ململانێی سیاسی تائەوكاتە سروشتیە كەپەناناباتە بەر تەشهیرو موهاتەرات، هەمان ئەو پاڵەوانە كارتۆنیانە دەیان وت جنێو جنێو تا مردن. من باش بیرمە كاتێك ویسترا دەستور بخرێتە دەنگدانەوە، ئەوكاتەی بەئاشكرا و لەرۆژنامەی ئاوێنە نوسیم كەمن دەنگ بەدەستورێك نادەم پەرلەمانی نەبێ و دەربری لەئیرادەی زۆرینەی رەهای كۆمەڵگانەكات، وەدواتر لەگۆڤاری شار هەمان بۆچونم دوبارەكردەوە، بەشێك لەو پاڵەوانانەی دوو سێ ساڵی رابردو بەنهێنی راپۆرتی ئەوەی دابو بەمەكتەبی سیاسی كەگوایە من خائینم چونكە ئەو دەستورەم پێ خراپە!! ئێستاش هەمان ئەقڵیەت دوورنیە جارێكی تر بەخۆفرۆشمان ناوزەدبكاتەوە كاتێك بڵێن ریفراندۆم پێویستی بەزەمینەسازی و بەیاسایی كردنە.

 هەشە لەو پاڵەوانانە (كەجار جارە سودفەی وتارەكانیان دەكەم بەڵام بێگومان نایانخوێنمەوە) سەردەمی خۆپیشاندانەكان بەروی خەڵكدا دەرشانەوە، ئێستاش دەڵێن بەڵی بۆدەنگی شەقام!! تۆ كەوەكوجەمشیدخان هەر رۆژە بایەك لەگەل خۆی دەتباو هەر دەمەی بەلایەكدا دەشكێیەوە، بۆجارێك دەستبگرە بەخۆت و قەناعەتەكانت و دور لەسوكایەتی چۆن بیردەكەیەوە ئاوا قسەبكە.

 ئەگەر رۆژێك بێت و ناچاربم، دەتوانم سەدان نمونەی ئەو نیفاق و درۆزنی و دوروییە شەرمهێنە ریزبكەم، كەوایكردوە شەرم لەوەبكەی بنوسم و بێدەنگی بەگەورەترین هەڵوێستی ئەخلاقی بزانم، لەرۆژگارێكدا قسەكردن و نوسین بوە بەنمایش و بەمەهزەلە. چونكە بەشێكی زۆر لەوانە ئەوكاتەی قسەكردن باجی هەبو و مەترسی بەدواوە بو ئەوانە نوقەیان نەكرد، كاتێكیش ئەو جۆرە لەقسەكردن بو بەمۆدێل و موكافەئەی بەدواوە بو ئیدی دەمیان بو بەدوو. بەڵام ئەوەی ناكرێ لەئاستیدا بێدەنگبی و وزەی ئەوەت پێدەبەخشێ جارێكی تر قسەبكەی، تاوانباركردنی هەرهێزێكە بەخۆفرۆشی كەرازی نیە بەتۆ، یەكێتی سەرباری هەمو ئەو هەڵەو كەموكوڕی و دۆخەی كەبەردەوام شایەنی رەخنەیە، هیچ كات ناكرێ بەومەنتیقە بازاریە بەخۆفرۆش و نانەتەوەیی ریزبكرێ.

 سەرەنجامیش زمانی تەخوین و زبر كەبەردەوام زمانی ئەوانەبوە كەلۆژیكیان پێنیە، زمانێكە ناشیرین، قێزەون، ناراست و سەرەنجام گاڵـتەجار. رۆژێك دێت روداوەكان گوزەردەكەن و دەبنە یادەوەری، بەڵام ئەوەی دەمێنێتەوە ئەو قسانەن بێ هیچ بەرپرسیاریەك كردوتن و دەیانكەیت. برینی جەستەكان سارێژدەبن، بەڵام ئەوەی زیاتر دەمێننەوە برینی زمانە.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP