بەپەلە

نەوشیروان مستەفا وەك بتشكێن

ئارام قادر حەمەسور - 27-06-2017 - 7247 جار خوێندراوەتەوە


بۆچی هەموان گریان كاتێك نەوشیروان مستەفا كۆچی دوایی كرد؟ ئەم پرسیارە لە ڕۆژی ناشتنی كاك نەوشیروان و ڕۆژانی پرسەكەی لە هەولێرو سلێمانی جێگەی تێڕامانن، ڕۆژی ناشتنی لە خۆرهەڵاتی ناوەڕاستدا كەم وێنەبوو، پرسیاری هەموان بۆچی گریان پێمان دەڵێت، كاك نەوشیروان كێ بووە و چۆن ژیاوە، ئەو وەك ئیبراهیم چەكوشەكەی خستە سەرشانی و بەبێ ترسان لەباوكە سیاسیەكانی دەسەڵات بتە حەرامە سیاسییەكانی شكاند، زۆر جار بەتەنیا بتەكانی دەشكاند، بێ ئەوەی هاوكاری بكرێت، ئەو لەجیاتی زۆرینەمان ئەم كارەی دەكرد.

 ئەوە وەڵامی پرسیاری بۆچی هەموان گریان دەداتەوە، نەوشیروان مستەفا لە جیاتی هەژاران و زوڵم لێكراوان شەڕی دەسەڵاتی كرد، لەجیاتی ئێمە بەرامبەر جووت حیزب (یەكێتی و پارتی)وەستایەوە، لەجیاتی ئێمە ڕەخنەی دەكرد و بەرگریشی دەكرد، بۆیە ڕاگەیاندنەكانی دەسەڵات بەردەوام خەریكی شكاندنی كاك نەوشیروان بوون چونكە هەنگوینەكەی دەسەڵات بەس بۆخۆیان حەڵاڵبوو، هەندێكمان دەمانزانی لەجیاتمان ئەم كارە دەكات، هەندێكیش دوای مردنی زانیان ئەوە نەوشیروان مستەفا بوو لەجیاتی هەموان بەرگری دەكردو هەڕەشەی لەدەسەڵاتی گەندەڵ دەكرد، نەوشیروان مستەفا بەشێك بوو لەناخی زۆرینەمان ، بەشێكی ئەركی سیاسی ئێمەی دەكرد، ئەو وەك كۆژان و كۆشادی لەگەڵمان بوو.

 بەڵام ئەو بۆ خەڵك ژیا نەك خۆی، دەیتوانی سەدان ڤێللای هەبێت و كوڕەكانی بكاتە وەزیر، بەڵام نەیكرد، چونكە بۆ خەڵك دەژیا، هات گەنجە هەژار و پەراوێزخراوەكانی خاوەن شەهادەی پشتگوێخراوی گەورەكرد، ئەو پاسەوانێكی پاكی كردە سەرۆكی پەرلەمان، خێڵ و هۆزی لە خۆی دوور خستەوە، ژیانێكی سادەژیا وەك زۆرینەمان، ‌ئەوەی ویستی بیناسێت ناسینی ئاسان بوو، یەكەم بینینی سەرسامی دەكردی، دەت پرسی چۆن پیاوێك لەوگردەوە بە راگەیاندنەكەی دژی دوو هێزی گەندەڵی گەورەی خاوەن درۆ و درا و چەك وەستاوە و دەرگای بۆ هەموو كەسیش كراوەیە؟!!.

دوای مردنی دوو ڕوویی بەشێكی كۆمەڵگا دەركەوت، ئەوانەی گریان و تا ئێستاش بۆی پەرۆشن هەمویان گۆڕان نەبوون، زۆرینەی كۆمەڵگابوو، ئیسلامیەكی هاوڕێم دژایەتی نەوشیروان مستەفای دەكرد بەتوندی بەڵام دوای مردنی بەمنی گوت لەگەڵ بینینی هەرڤیدیۆیەكی ئەو سەركردەیە گریاوم،  پێشمەرگەیەكی دێرین گوتی ساسەت مرد، بەڵێ سیاسەت كەلای زۆرینەمان بریتی بوو لە دزی و پارە و نەوت و ڤیللاو چەكدارو ڕیزە سەیارە ولوتبەرزی، نەوشیروان مستەفا هات سیاسەتی ئاشتكردەوە بەكۆمەڵگا نیشانی داین كە سیاسەت دەكرێت ڕووی ئەخلاقیشی هەبێت، دەكرێت بۆ خەڵك بژیت، دەكرێت ژیان بكەین بۆ سیاسەت نەك سیاسەت بكەین بۆ ژیانی شەخسی.

بەهەموو ماناكان نەوشیروان مستەفا دیوە جوانەكەی سیاسەتی نیشان داین، نەوشیروان مستەفا گاندی بوو لە فەلسەفەی ناتوندو تیژیدا و گیڤاڕابوو لەشۆڕش و حەزنەكردن لەكورسی دەسەڵات و ماندیلابوو لە خۆشەویستی بۆ خەڵك، جیا لەمانە نەوشیروان مستەفا نوسەرێكی وردبین و گەورەبوو، سیفاتی سەركردە كاریزمایەكانی دوونیای تێدابوو بەزیاترەوە، ئێستا زۆرینە بەدوای كتێب و ئایدیاكانی نەوشیرواندا دەگەڕێن، فیزیكی ئەو مردووە بەڵام ئایدیاكانی زیندوون، ئاخر دەكرێت مرۆڤەكان بمرن بەڵام ئایدیاو پڕانسیپەكان نامرن.

 ئەم پڕەنسیپانە دەبنە چەكوشی ڕەخنەو دووبارە بەهێزتر بەكاردێنەوە بۆ شكاندنی بتە حەڕامە سیاسییەكان، هەر چەند كاك نەوشیروان زۆرینەیانی شكاندن و حەڵاڵی كردن، بەڵام بتە تازەكان لەدروستبوندان، بتەكانی سوڵتانیزمی سیاسی و دەسەڵاتی خێڵ و بنەماڵەو دزینی داهاتی نیشتمان و خواردنی دەسەڵات بۆ دوو حیزب و نەبوونی یاساو دیموكراسی و....هتد بەردەوام بەر چەكوشی ڕەخنە كەوتون و دەبێت بشكێندرێن.

ئەو لەناو ئەم گەلە گورگەی دەسەڵاتدا نە دەخەوت، تەنانەت بێدەنگیەكەشی دەسەڵاتی تۆقاندبوو، بەپاكی لەدایك بوو و بەپاكی مرد، زۆرینە سەر كردەكان بەبینینی ڕۆژی ناشتنەكەی سەرسام ببون، حەسودیان بەم هەموو ئازایەتی و خۆشەویستیە دەبرد، لەناخی هەمویاندا هەوڵدان بۆ بەنەوشیروان بوون هەیە، بەڵام زۆر زەحمەتە، ئەو بەبێ بونی پارە بەهەزاران بۆی گریان، لەبەرئەوەی دژی ناعەدالەتی وەستایەوە و وەك زۆرینەمان ژیا، ئێستا ئایدیاكانی دەتوانرێت بكرێتە بەربەستی دەسەڵاتی گەندەڵ و بەرەو خۆشبەختی بمانبات، هەموان گریان چونكە ئەوەی لەجیاتی هەموان دەدوا وبەرگری دەكرد مرد.

 هەموان دەستیان بەرزكرد بۆ تەرمەكەی چونكە لەجیاتی دەستی هەموان بەچەكوشەكەی بتەكانی دەسەڵاتی دەشكاند، مردن نەوشیروان مستەفای گەورەتر كرد و ئایدیاكانی دەكرێت وە ڤاكسین بدرێتە دەسەڵات بۆ ئەوەی دەسەڵاتێكی عەدالەت و یاسا سەروەر دروستبكرێت، وە ببێتە بنەما بۆ دروستبوونی پایەكانی دەوڵەتی كوردستانیی خۆی حەزی دەكرد دەوڵەتێكی كوردی دروست ببێت ببێتە قیبلە بۆ پارچەكانی تر، ئەو هۆشیاری سیاسی فێر كردین و گوتی ((نا)) پیرۆزترین گوتنە دژی ستەمكاران، نیوسەدە بەم شێوە پاكژیان و پاكدەست و جورئەت بەرزو ئەخلاق كرداربیت، شایەنی ئەوەی بۆت بگرین، بزوتنەوەی گۆڕان چرایە و پڕەنسیپەكانی كاك نەوشیروان وزەی چراكەن.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP