كەواتە جەلالی سام ئاغا بكەن بەڕێكخەریی گشتی بزوتنەوەی گۆڕان

بەهرۆز جەعفەر - 18-06-2017 - 9115 جار خوێندراوەتەوە


هیچ گومان هەڵناگرێت، بزوتنەوەی گۆڕان لەدوای كۆچی دوایی گەش مردە كاك " نەوشیروان مستەفا" ەوە، تادێت توانای بڕیاردانی لاواز ئەبێت. لەناو گەنجەكاندا تین و توانایەكی نوێ‌ بۆ ژیانێكی سیاسیی نوێ‌ بەدی ئەكرێت، لەناو بەتەمەنەكانیشدا، دوو ئاڕاستەو كێبڕكێ‌ هەیە.

بزوتنەوەی گۆڕان، ئاماژەیە بە بزوتنەوەیەكی سیاسیی جەماوەریی، كە حزبی دەنگدەرەو، مۆدێلێكی نوێیە لە كایەی حوكمڕانی كوردییداو، سەرەتایەكی تەواو فەرمیشە بۆ سەرهەڵدانی ئۆپۆزسیۆنی مەدەنی لەناو كورددا. كۆچی دوایی ڕێكخەریی گشتی ئەم بزوتنەوەیەش حاڵەتێك بووەو، قۆناغێكە لە ژیانی سیاسیی دا ئەبێت تێپەڕێنرێت، بۆ؟. چونكە نیوە زیاتری هەڵسوڕاوانی ئەم بزوتنەوەیە دوور لەچاوی ئامڕازەكانی میدیا، ئەزانن بارودۆخی ناوچەیی و نێودەوڵەتی بەچ هەلومەرجێكدا تێ‌ ئەپەڕێت و، تا دێت گوزەرانی خەڵكی كوردستانیش بە هۆی كێشە ناوخۆییەكانەوە خراپ تر ئەبێت، تێئەگەن كە بزوتنەوەی گۆڕان لە ئاستی پراكتیك دا زۆربەی كارتەكانی دۆڕاندووە، دۆڕانێك كە ڕوویان نەیەت بێژن ئێمە تیمێكی سیاسیی و میدیایی لاواز بووین لە حكومەت و پەرلەمان و حزبایەتی دا، هەروەها ئەزانن چارەسەر تەنها دوو بژاردەیە:

 یان ئەوەتا لەگەڵ پارتی و یەكێتی ڕێكئەكەون تا قۆناغی دوای ڕیفراندۆم و، پەرلەمان كارا بكەنەوە، یان ئەوەیە هەرێمی سولەیمانی جیا دەكەنەوەو ئیدارەیەكی باشی ژیانی هاوڵاتیان و ناوچەكە بدەن.

لەهەردوو حاڵەتەكەدا، ڕیسك و سەركێشی ئەوێت، كەس لەناو گەنجەكان و پیرەكان دا ئەو جورئەتە ناكا، بڕیار لەسەر هەر بژاردەیەك بدات، بێجگە لەوەش بزوتنەوەی گۆڕان پێویستی بەوەیە ئیتر واز لە سۆز و لاواندنەوە بهێنێت بەرانبەر بە كۆچی دوایی خوالێخۆشبو "نەوشیروان مستەفا". ئەمە سیاسەتە شین و شەپۆڕ نییە، چونكە لەوە زیاتر كێشەكانی ناو بزوتنەوەی گۆڕان قووڵتر ئەبنەوە.

جا لەبەرئەوەی گۆڕان بە خێرایی تووشی سێ‌ قەیران بووە: لە ئاستی ناوخۆییدا ڕێكخەریی گشتی نییە، لە ئاستی پارێزگای سولەیمانی دا پارێزگاو ناوچەكە بە بێ‌ سەروبەرەیی ئەچێتە ڕێوە، لە ئاستی هەرێم و عێراق دا، پێویستی بە بڕیاردانی ژیرانە هەیە، كە لەگەڵ گۆڕانكارییەكانی ناوچەكەدا ئەمیش بێتە دەست. لە حاڵەتێكی وادا، بزوتنەوەی گۆڕان پێویستی بە كاراكتەرێكە لەدەرەوەی گردی زەرگەتەوە، بۆ ماوەی ساڵێك یان دووان بە دەنگی جڤاتی گشتی و ئەنجومەنی سیاسیی ئەو بزوتنەوەیە خێرا بكرێتە ڕێكخەریی گشتی، بۆ نا، خۆ گۆڕان حزبی بزنس و سەدان كۆمپانیاو چاڵە نەوت و بەرژەوەندی گەورە نییە. لەم ڕووەوە بۆ ئێستا هیچ كاراكتەرێك لە " جەلالی سام ئاغا" گونجاو تر و، فریاد ڕەس تر نییە، بۆ بزوتنەوەی گۆڕان. بۆچی؟

یەكەم: جەلالی سام ئاغا، هاوڕێی نزیكی كاك نەوشیروان بووە لە مناڵییەوە، پاشان چەندن جار كاك نەوشیروان وتویەتی پشتگیریی ئەكەین بۆ پۆستی سەرۆكی هەرێم، ئینجا سولەیمانی واتەنی " كوڕی شارەكەیە".

دووەم: جەلالی سام ئاغا نزیكەی (45) چل و پێنج ساڵ ئەزمونی كاری ئیداری و دارایی هەیە، لە ناوەڕاستی شەستەكانی سەدەی ڕابردوو لە بەغدا كۆلێجی ئابوریی و بازرگانی تەواو كردووە. هەشت ساڵ سەرۆكی دیوانی چاودێریی دارایی بووە، (2750) ڕاپۆرتی لەسەر گەندەڵكاران ئامادەكردووەو، (86) ڕاپۆرتی هەستیاری پێش (2011) داوە بە داواكاریی گشتی، كەدەستی لەكاریش كێشایەوە گوتی " من جسمێكی غەریبم لەناوتانا....شەرەفمەند نیم بەو وەزیفەیە"..ئەو ملیارەها دینار و دۆلاری لە قۆڕگی گەندەڵكاران هێنایە دەرەوە.

سێیەم: هاوشێوەی نەوشیروان مستەفا، جەلالی سام ئاغا ش خاوەنی هیچ موڵك و كۆمپانیاو بەرژەوەندییەك نییە، بە پێچەوانەوە ئەوەی هەیبوە بەخشیویەتی، خانوەكەی خۆی لە گردی سەرچنار، چل ساڵ ئەبێت تیا ئەژی، بەخشیویەتی بە وەزارەتی تەندروستی، خوشكی كۆچی دوایی كردووە و مامۆستای ناوداری شار بووە، لە موڵكی خۆی خوێندگەی دروستكردووە، خوشكێكی دیكەی لە ڕاقی ترین شوێنی شارا، شووققەكەی خۆی داوە بە وەزارەتی پەروەردە، تا بیكەن بە دایەنگەو باخچەی ساوایان منداڵانی تیا پەروەردە بكرێت.

چوارەم: كە دەستی لەكار كێشاوەتەوە، نە ئۆتۆمبیل نە پاسەوانی لەگەڵ خۆی نەبردووە، داواشی كردووە كە مووچەی خانەنشینیەكەی بدەن بە كەمئەندامان و زیندانیانی سیاسیی و چینەكانی تر. جگەلەوەی ناوبراو كەسێكی هەقبێژ و قسە لەڕووە، یەك لەو كەسانەیە كە تاڵەبانی خۆشی ویستووەو، ڕێزی لێگرتووە، میدیاكان گێڕایانەوە، كە لەدانیشتن دا، لەبری بڵێت " وەڵا مام جەلال ئەوە وانییە" وتویەتی " وەڵا هیچ وانییە".

پێنجەم: جەلالی سام ئاغا، كاراكتەرێكە، كۆدەنگی لەسەرە، ڕەنگە گۆڕان لەناوخۆیدا كەسێك دیاری بكات بۆ پۆستی ڕێكخەریی گشتی، نەك لەسەر ئاستی كوردستان، لەناو خوودی خۆشیاندا، ئەو كۆدەنگیەی لەسەر نەبێت، لە كاتێكدا پەكەكە، پارتی، یەكگرتوو، یەكێتی، كۆمەڵ، میدیاكان، لایەنەكانی تر، سیاسییە عێراقیەكان، ڕۆشنبیرانی هەندەران، هەموو ئەمانە ڕایان لەسەر جەلالی سام ئاغا یەكە، یان نزیكە لەیەكەوە. 

بە دەستێكی ئەمین و پیاوێكی نەجیبی ئەزانن. لە ناو بزوتنەوەی گۆڕان دا گەنجەكان ئیلهام یان لەمەوە وەرگرتووە كە باسی گەندەڵكاران ئەكەن، چونكە ڕاپۆرتەكانی چاودێریی دارایی یان لە ڕێگەی پەرلەمانەوە دەستكەوتووە. بە تەمەنەكانیش هەر ئەوەیان ئەوێ‌ گوێیان بۆ بگیرێ. 

پێویست بە كات كوشتن ناكات، بزوتنەوەی گۆڕان هەتا كۆنگرە ئەبەستێت، ساڵێكی تر، یان دووانی تر، باشترین دەرچەو بژاردەی سیاسیی ژیرانە ئەوەیە "جەلالی عومەری سام ئاغا" بكەن كەسی یەكەمی خۆیان، مادام ئەتانەوێ‌ دۆخی ناوخۆیی نەتەقێتەوەو، بزوتنەوەكە نەكەوێتە ژێر كاریگەری باڵەكانی یەكێتی و، بڕیارەكانی پارتییەوەو، ئەتانەوێت ڕێبازەكەی نەوشیروان مستەفاش كاڵ نەبێتەوە، بڕیارەكان لەبەرژەوەندی باڵای نیشتیمان و، سزادانی سەرپێچیكاران بێت، دەی  كەواتە جەلالی سام ئاغا بكەنە ڕێكخەری گشتی بزوتنەوەی گۆڕان.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP