كێ ڕابەرایەتی دەنگی(بەڵێ)دەكات

دەلیل جەمال - 13-06-2017 - 2706 جار خوێندراوەتەوە

دەلیل جەمال

دوای بڕیاری ڕیفراندۆم، بەجۆرێك دەرئەنجامی دابەش بوونی هەرێم بەسەردوو ئاراستەدا، كەسەرەتاكانی ئەم دووئاراستەیە دەركەوتوون، ئاراستەیەك (بەڵێ) دەنگدەدات وئاراستەكەی دیكە(نەخێر) هەڵبەت هێشتا زووە بڕیاری یەكلایی لەم بارەوەبدەین، ئەوەی بە نەخێر دەنگ دەدات بەمانای ئەوەنییە لەگەڵ سەربەخۆیی نییەو باوەڕی پێ نییە بەڵكوو دەرئەنجامی ئەوسیستەم و ناعەدالەتی وگەندەڵییەیە دەرئەنجامی چەقبەست وسیاسی و ئەوسزا ئابووریەی كە خەڵك باجی دەدات، بەواتای ئەوەی كە نەخێر بۆ ئەوانەیە كە هۆكاری ئەم باروودۆخەن هۆكاری شكستی گەورەی حوكمرانین.

لێرەوە مەسەلەی ڕیفراندۆم وسەربەخۆیی دەبێتە قوربانی ئەو واجیهەسیاسیانەی كە خەڵك بۆدەرچەیەك دەگەڕێن سزایان بدات ئەودەرجەیەش لە هەڵبژاردنی پەرلەمانی یان سەرۆكایەتی یان ڕیفراندۆم دەبێت، ئەم ئاراستەیە تائەمڕۆ ڕابەرایەتییەكی دیاروئاشكرای نییە، بەڵكوو ڕابەرایەتی شەقامی كوردی خۆیەتی، كە پێموایە ئەم ئاراستە لەدەرەوەی حیزب و فشاری سیاسی یان حیزبیدایە، خۆرسكەو خۆی بەیانی خۆی دەكات ئەم ئاراستەیە تەنها ئەوانەنین لەدەرەوەی حیزبەكانن بەڵكوو بەشێكی زۆری هەوادارو لایەنگری حیزبەكانن ڕاستەوخۆیان ناڕاستەوخۆ، لەگەڵ دەنگی نەخێرن ، كەپێموایە تەنها شتێك ئەم ئاراستەیە بگۆڕێت جاكسازی وعەدالەتی كۆمەڵایەتی وچارەسەری ئاریشەكانە، ئەمەش بەم واجیهەسیاسیی وحوكمڕانەی ئەمڕۆ مەحاڵ ونەگونجاوە، خۆئەگەر ڕیفراندۆم كرا ئەوا لەگەڵ نزیك بوونەوەی كاتی گشتپرسی ئەم تەوژمە بەرفراوانترو بەهێزتردەبێت، دەشكرێت هەندێك لایەن بەوئاراستەیە لەگەڵ گشتپرسی بڕۆن، چونكە هاووڵاتی بەدوای دەرچەی سزاو دەربازبوونە لەم نەمەتە سیاسی حوكمرانانە، من پێم وایە ئەگەر ڕیفراندۆم بابەتێكی مەبدەئی وئامانجێكی دروستی حیزبەكانە وە دەیانەوێت گشتپرسی بۆسەربەخۆیی بێت وسەركەوتن بەدەست بهێنێت، یان بیكەنە فاكتێكی گرنگ بۆئاشت بوونەوەی گشتی یان دەیانەوێت خەڵك لەگەڵ گشتپرسی بێت وبەدەنگی بەڵێ بەشداربن پێویستە ڕەچاوی ئەم خاڵانەبكرێت.

۱- بەڕای ئێمە بەرلەهەمووشت پێویستە دامودەزگا حوكمییەكان چالاك بكرێنەوە،ژیان ئاسایی وئەم سزای پاشەكەوتە لابرێت.

۲- كاراكردنەوەی پەرلەمان ، چونكە ئەگەر لای سەركردایەتی سیاسی كورد گشتپرسی لەهەموو كێشەو قەیرانەكان گەورەترو ئامانجی هەموو حیزبەكانە،كەواتە نابێت،بكرێتە قوربانی دوڕدۆنگی سیاسی و حیزبێك خۆی بەڕابەری گشتپرسی بزانێت و ڕابەرایەتی ماڵوێرانی وكێشەوقەیرانەكانیش بكات وئەوان بایسی ئەم دۆخەبن وداواش بكرێت خەڵك دەنگی بەڵێ بێت،بەڵام هەنگاویش بۆچارەسەر نەنێت،لێرەوە دەردەكەوێت كێ بەڕاست لەگەڵ سەربەخۆییە وكۆ بۆموزایدەو دروشم بازی لەگەڵیەتی.

۳ - گەردەیانەوێت گشتپرسی سەركەوێ دەبێت ئەو واجیهەسیاسیانەی لای خەڵكی بێزراوو نامۆ بوون دورخرێنەوە ونەكرێنە ڕابەری ئەم پرسە گرنگ ونیشتمانییە، ئەوانەی لای خەڵك ناسراوون وبەشێكن لە نەگبەتی وگەندەڵی وخیانەت لە میللەت وبەتاڵان بردنی سەروەت وسامانی ئەم گەلە، پێویستە لەم ڕۆوە دورخرێنەوەو تەنانەت ئەگەر لەم وڵاتەشا نەبن پێموایە بۆ گشتپرسی قازانجە، گشتپرسی بابەتێكی چارەنوسزازی میللەتێكە بۆیە حەق وایە خەڵكە پاك وبێگەردەكە ببێتە واجیهەی ئەم مەسەلەیە  خەڵكانیك كە شارەزاو بەتوانان خەڵكانێك بەشێك نەبێت لەو بابەتانەی باسمكردوون ئەمە بێ ئیستسنا دەڵێم.

خۆئەگەر هەرواجیهە نامۆكان بوو پێموایە ئۆباڵی دەرئەنجامی گشتپرسی لەئەستۆیانە،مەرج نییە لەم مەسەلەیەدا تەنها پشت بەكەسانی ناوحیزبەكان ببەسترێت،پرسی نیشتمانی لەحیزب وسەرۆك وبەرپرس گەورەترە،واتە دەبێت بەدوای میكانزمی باش بگەڕێن بۆدەرئەنجامی باش،ڕام وایە بەڕێز كاك مسعود ئەگەر لەخەمی گشتپرسییە وخەباتی خۆی بۆئەم ڕۆژەكردووە،وەك خۆی دەڵێت مێژووی كورد بەهەمووشۆڕسەكانی بە گیان بازی وخەبات وقوربانیدانی بۆ سەربەخۆییە ،وەك دەڵێ ئەوە ئەوڕۆژەیە بۆی ژیام پێویستە 

۱-خۆی بەدوربگرێت لە ململانێ سیاسییەكان و خۆی لەدەرەوەی ڕابەرایەتی ئەم پرسە ببینێتەوە،ئەمە بەومانایە نییە لە دەلاقەیەكی حیزبی یان سیاسی بخوێنرێتەوە،بەڵكوو نەحوكمی ئەوەی كە گرفتەكان بەشێكی زۆریان پەیوەندی بەكورسی ودەسەڵاتی بەڕێزیانەوەهەیە ،دەشكرێت دروستكردنی كۆمیتەی ڕیفراندۆم بەبێ خۆیی وكەسانی دیكە پێموایە بەشێك لە گرفتانە چارەدەبن،ئەوكات ئەمپرسەناكرێتە قوربانی سیاسەت وموزایدەی سیاسییەكان.

۲-بڕیاری كاراكردنەوەی پەرلەمان ونەمانی ئەم پاشەكەوتەو گەڕانەوەی بەشێكی گەورە لەمتمانەی شەقام بۆ ئایندەی كوردستان پێموایە دوركەوتنەوەی كاك مسعود وەك كەسی یەكەمی ئەم پرسە دۆخەكە بەقازانجی گشتپرسییە،ئەمە بەواتای ئەوەنایەت كەسێكی ناپێویستە بەواتای بردنەوەی دەنگی بەڵێ كەپیموایە ئەم هەنگاوەی دەبێتە هۆی ئاسایی كردنەوەی دۆخەكە،..كۆی قسەكە ئەوەیە ناكرێت بەم بارودۆخەی كەهەیە چاوەڕێی دەرئەنجامی باشبین،ناكرێ بەبێ پەرلەمان وبەبێ ئاشتەویی كۆمەڵایەتی وبەبێ چارەسەری گرفتی هاووڵاتی وبەبێ گەڕانەوەی متمانەوشەرعییەتی یاسایی داوی سەكەوتنی گشتپرسی لە خەڵك بكرێت،خەڵك كاتێك دەتوانیت داوای لێ بكەیت،بەجۆرێك لەجۆرەكان هەنگاوبۆچاكسازی نرابێت،ناكرێت دەنگی خەڵك بەڵێی خەڵك بكەیتە كارتی فشار بۆدەسكەوتی شەخسی وحیزبی ناكرێت بێباك بیت لە ژیانی میللەت وئومێدیشت بە میللەت هەبێت،ناكرێ گشتپرسی تەنها بۆ مەكسەب بێت گشتپرسی تەنها بۆسەربەخۆییە ئەبێت بەڕاستی بەخەڵك بوترێت ئەسڵەن دەبێت ڕۆژی سەربەخۆیش دیاری بكەیت.

من بەبێ ئستسنا ئەوانەی هۆكارن لەم دۆخە دەبێت هۆكاریش بن بۆچارەسەر گەرنا لەدۆخێكی وادا بڕیارلەسەر گشتپرسی بەبێ ئامادەكاری ومیكانزمی گونجاوو نوێ گشتپرسی سەری سەربەخۆیش لەگۆڕ دەنێت،چونكە تائەمڕۆ ئەوانەی دۆست بوون یان دەتان ووت لەگەڵ سەربەخۆیی كوردن،دەركەوت وانییە،لەولاتانی دنیا پێجەوانەی خیتابی سەركردایەتی سیاسی لە سەربەخۆیی دەڕوانن،كەوابوو لۆبی وپەیوەندییەكان لەئاستی شەخسی وحیزبی بوون توركیا ئێران وڵاتانی ئەوروپا ئەمەریكا،هیچی وادەرنەچوو،كەواتە بۆچی دەبێت باشترین كات ئێستابێت بۆ ئەم پرسە مەزنە؟لە ڕووی ناوخۆوە گرفت هەیە .

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP