حزبی كوردی و سیاسەت

دانا مەنمی - 2-06-2017 - 5353 جار خوێندراوەتەوە


حزب گردبوونەوەیەكی سیاسییە و دەیەوێت دەسەڵاتی سیاسی بگرێتە دەست، سیاسەتیش یەكێكە لەوكایە گرنگانەی كەجیهانی بەخۆیەوە سەرقاڵ كردووە و بووەتە پێویستیەكی ڕۆژانە ، بەڵام سیاسەت لە كۆمەڵگای كوردی شاڕێیەكی مەترسیداری گرتووەتەبەر جگە لەترس و تۆقاندن ، جگە لە درۆو چەواشەكاری ، جگە لە كلتوری شەرەنگێزی و فرت وفێڵ هیچی تری لێ سەوز نەبووە ، كەواتە سیاسەت وەك زانست پراكتیك نەكراوەو سیاسەتمەدارانیش لەژێر هەیمەنەو هەژموونی بنەماڵەو عەشیرەت و تەریقەتی ئاینیدان ، هارۆڵد لاسكی كەبیرمەندێكی بەریتانی سەدەی بیستەمە خاوەنی چەندین كتێبە لە بواری سیاسەتدا و لەیەكێك لە كتێبەكانیدا بەناوی ( بنەماكانی زانستی سیاسی ) دەڵێت : سیاسەت واتای چی بەدەست دەهێنیت ، كەی بەدەستی دەهێنیت ، چۆن بەدەستی دەهێنیت ، بۆچی بەدەستی دەهێنیت .

یانیش هەروەك (فریدریك هیگڵ ) فەیلەسوفی ئەڵمانی دەڵێت : سیاسەت بۆ ڕێكخستن و چارەسەركردنی ناكۆكی و ململانێكانی كۆمەڵگایە . 

جوڵەی حوكمڕانیەتی كوردی جوڵەی سیاسی نییە ، چونكە هونەری سیاسەت بەڕێوەبردن و خزمەتكردنی كۆمەڵگایە ، نەك فێڵكردن و درۆكردن لەگەڵ كۆمەڵگادا ، ئەگەر خەڵك بڕوای وابێت سیاسەت بریتییە لە فێڵ و درۆ ، ئەوە بەڵگەیەكی ترە كە لەئەلف و بای سیاسەت نەگەیشتوون و بەدحاڵیبوونە لەسیاسەت .

حزبی كوردی بانگەشەی دادپەروەری دەكات و هەربۆخۆشی پێشلكاری دادپەروەری ئەنجام ئەدات ! بانگەشەی دیموكراسیەت دەكات و هەربۆخۆشی دژی ئازادی بیركردنەوەو ئازادی ڕەخنەگرتن و شەفافیەتی سیاسی و ئابورییە ! بانگەشەی سەروەری یاسا دەكات و هەربۆخۆشی یاسا پێشێل دەكات و حسابی تورێكی قوڕاوی بۆ ناكات !بانگەشەی پێكەوە ژیان و ئاشتی كۆمەڵایەتی دەكات و هەربۆخۆشی دژی كلتوری پێكەوە ژیان و لەباربردنی ئاشتی كۆمەڵایەتی و سیاسیشە ! بانگەشەی جیاوازی بیرو بۆچون دەكات و هەربۆخۆشی دژی ڕاو و ڕایەڵەو بۆچوونی جیاوازە ! بانگەشەی فرەحزبی ئەكات و هەربۆخۆشی دژی فرە حزبی و كار بۆ بیرۆكەی تاكە حزب دەكات ! بانگەشەی پیرۆزی پێشمەرگە دەكات و هەرۆخۆشی سەرو برۆی پێشمەرگە ئەتاشێت و سوكایەتی پێدەكات !بانگەشەی یەكڕیزی نێوماڵی كورد دەكات و بۆخۆشی نێوماڵی كوردی خاپووركردووە ! بانگەشەی مرۆڤایەتی دەكات و هەربۆخۆشی دژی بەهای ئینسانبوونە ! ئەم فەلسەفەیە تۆتالیتاریزم دەخاتەوە ، لەشوێنی جیاواز فۆڕمی جیاوازی تۆتالیتاریانە بەرهەم دەهێنێت .

هەرحزبێك دژی بیركردنەوەی سەربەخۆ بوو مەبەستم لەسەربەخۆی فیكری و مەعریفی و ڕۆشنیرییە ، سەربەخۆبوون لەو كایانەدا كەنابێت مرۆڤ دەستبەرداری ببێت ، ئاخر مرۆڤ ئامانجە نەك ئامراز ، خۆئەگەر دەستبەرداری سەربەخۆبونی فكرو مەعریفەو ڕاڤەكردن بوو ، ئیدی دەبێتە ئامراز و حزب چۆن بخوازێت هەڵیدەسوڕێنێت و دواجاریش لە مرۆڤبوون دێتە دەرەوە و دادەماڵدرێت لەبەهای ئینسانیبوون .

ساتەوەختی ئێستای كۆمەڵگای كوردی لەفەزایەكدایە كە حزب ترسی ڕەنگڕێژكردووە ، ترس ئێستا كاروكاردانەوەكان دەستنیشان دەكات ، ترس لە هەبوونی ئایندەیەكی ناڕوون و تاریك ، ئایندەیەك كە میللەت دەبێتە قوربانی بەرژەوەندییە حزبیەكان ، ترس لەئایندەیەك كە میلەتەكەی برسییەو بەبرسێتی دەمێنێتەوە ، ترس لەئایندەیەك كە مرۆڤ بێنرخترین بونەوەری حوكمڕانیەتی كوردییە ، هەموو شتێك نرخ و رێزو بەهایەی خۆی هەیە تەنها مرۆڤ نەبێ ، كە بێ نرخترین سەرمایە و سامانە . 

ئەوە مرۆڤە برسی دەكرێت ، ئەشكەنجە دەدرێت ، مافە سەرەتاییەكانی لێ زەوت دەكرێت ، ئازادی و بەهاكانی دەستی بەسەردا دەگیرێت ، كاردەكات و مووچەی پێ نادرێت ، ناڕەزایش دەڕببرێت ،دەڕفێندرێت و بەدڕندەترین شیوە ئەشكەنجە و دواجار تیرۆریش دەكرێت، كەم نین ژمارەی ئەو ڕۆژنامەنووس و مامۆستا ئاینیانەی كە بەهۆی حەقبێژییەوە تیرۆر كراون . 

خۆپیشاندانی هێمنانەو مەدەنی ، دیالۆگ و گفتوگۆی سیاسی ، پانێڵ و دیبەیت و كۆنفرانس حیسابی تورێكی قوراویان بۆ ناكرێت ، ئەسڵەن كلتورو هونەری گوێگرتن حزوری نییه لای حزب‌ ،كلتوری پێكەوە ژیان ڕیشەكێشكراوەو كلتوری شەرەنگیزی و ئیرهابی فكری ستراتیژی نوێ و دیاری دەستی حزبن .

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP