خولی دووەمی هەڵبژاردنەکانی فەرەنسا لە
نێوان ڕەتکردنەوەوهەڵبژاردنی جیهانگەرایی

شۆڕش خالید ئاژگەیی - 3-05-2017 - 3452 جار خوێندراوەتەوە

شۆڕش خالید ئاژگەیی

تەوەری سەرەکی خولی دووەمی هەڵبژاردنەکانی سەرۆکایەتی فەرەنسا هەڵبژاردنی جیهانگەرایی یا ڕەت کردنەوەیەتی لە لایەن دەنگدەرانی فەرەنساوە.  

مارین لۆپین بەربژاری بەرەی ڕاستڕەو نەیشاردووەتەوە لە ڕۆژی ئەنجامدانی خۆلی دووەمی هەڵبژاردنەکان، دەنگدەرانی فەرەنسا سەرپشک دەکرێن لە نێوان هەڵبژاردن یا ڕەت کردنەوەی دیاردەی جیهانگەرایی و تەواوی دەرەنجامە نەرێنیەکانی پەیوەست بەم دیاردەیەوە. 

بە پێچەوانەی مارین لۆپین، ئیمانوێل ماکرۆن ڕایگەیاندووە لایەنگری جیهانگەرایی و یەکێتی ئەورووپا و پرۆژەی ئەورووپیە و لە پێناوی سەرخستن و بەهێز کردنی ئەو یەکێتیەو تەواوی دامەزراوەکانی سەربەم دامەزراوە ئەورووپیە، تەواوی هەوڵ و کۆششەکانی چر دەکاتەوە.

ستراتیژی ماکرۆن بریتیە لە بەهێز کردنی وڵاتی فەرەنسا لە ئاستی نێودەوڵەتی و پێدانی ڕۆڵێکی کاراتر و کاریگەرتر و گەورەتر وگێڕانەوەی هەیبەت بەم وڵاتە و بەرز کردنەوەو بەهێز کردنی ئاستی هاوکاریە نێودەوڵەتیەکان لە پێناوی ڕووبەرووبوونەوەی تەحەدیاتی سیاستی جیهانی و کێشەو دەرهاوێشتەکانی تایبەت بە تیرۆرو پاراستنی ئاشتی و بەدیهێنانی سەقامگیری و ئاسایشەوە.

ماکرۆن پێشتر لە میانەی دیدارێکی دوو قۆڵیدا لە گەڵ ئانجێلا مێرکل ئەم هەڵوێستە نەگۆڕەی پیشان داوە، بە پێچەوانەی ڕەخنە بەردەوامەکانی مارین لۆپین لە مێرکلەوە بە هۆی ئەو پێشوازیە گەورەیەی لە پەناخوازانی سوری کردی و کەوتە بەر ڕەخنەو گلەیی زۆربەی پارت و بزاڤە تووندڕۆ و ڕاستڕەوەكانی ئەوروپاوە.

جیهانگەرایی

حاڵی حازر پرسی جیهانگەرایی بە یەکێک لە پرسە هەرە گرینگەکانی شەقامی فەرەنسی  لە قەڵەم دەدرێت و ئەم بابەتە بۆتە جێی مشت و مڕو گفتوگۆی چڕو پڕی ناوەندە سیاسیەکانی فەرەنساوە.

چەمکی جیهانگەرایی و تەواوی لێکەوتە نەرینی و ئەرێنیەکانی پەیوەست بەم پرسە وای لە فەرەنسیەکان کردووە بەردەوام ئەم پرسیارە لە خۆیان بکەن: تۆ بڵیی لە ئاییندەدا بە هۆی جیهانگەراییەوە کارەکەم لەدەست نەدەم؟ ئەگەر کارەکەم فەوتا ووڵات دووچاری قەیران هات،  چۆن کرێی خانوو خەرجیەکانم دابین بکەم و لە کوێیەوە هاوکاری وەرگرم؟ لە هەمووشی گرینگتر، بەو حاڵەی ئێستای دۆخی ئاسایش و نەبوونی متمانەوە چۆن هەست بە ئارامی و ئاسایش بکەین لە کاتێکدا ڕۆژانە لە گۆشە و کەناری وڵات شاهید حاڵی ئەنجامدانی کردەوەی تیرۆریستی دەبین و وای لێهاتوووە  لە ماڵەکانی خۆشماندا هەست بە ئارامی وئاسودەیی نەکەین و دڵەڕاوکێ و بێ متمانەیی باڵی بەسەرسەرلەبەری ژیاندا کێشاوە!!

ئەنجام و دەرەنجامی خولی دووەمی هەڵبژاردنەکانی سەرۆکایەتی فەرەنسا هەرچیەک بێ، ئەوە ڕوون و ئاشکرایە کەوائاستی هۆشیاری سیاسی و ئینتیمای فەرەنسیەکان بۆ ڕەوت و ئایدیۆلۆژیە سیاسیە باوەکانی کۆمەڵگە لەم دۆخە هەستیارەی ئێستادا گۆڕانی ڕیشەیی بەسەردا هاتووەو پارت ولایەنە سۆسیالیست و نەریت پارێزو چەپ و پارێزگاران لە پاشەکشەدان و بارودۆخێکی جیاواز هاتۆتە ئاراوەو پرسی قەبوڵ کردن یا ڕەت کردنەوەی دیاردەی جیهانگەرایی، بووەتە کرۆکی هەڵبژاردنە گشتیەکەی ئەم جارەی وڵاتی فەرەنسا بە خولی دووەمیشەوە.
  


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP