كێ لە ناو سەركردایەتی یەكێتیدا پارتیەو كێ شوێنكەوتووی مام جەلالە؟

عه‌تا قه‌ره‌داخی - 10-04-2017 - 5917 جار خوێندراوەتەوە

عەتا قەرەداخی

لێرەو لەوێ‌ گوێمان لەوە دەبێت كە فڵانە ئەندام مەكتەب سیاسی یەكێتی پارتیەو فیسار پیاوی پارتیە و ئەویتر مەسینە هەڵگرەو لەولاتریش ماستاو چیەو بەشێكی تریش كۆیلەو هاوبەشی بەرژەوەندیە. بێگومان ئەگەر وابێت و بەهەمان ئەو بنەمایانەی كە بۆ بە پارتیبوونی بەشێك لە مەكتەب سیاسی و سەركردایەتی یەكێتی بۆ پارتیبوون دانراوە، ئەوا لە رێگای هەمان جۆرە پێوانەو  وەلائەوە بۆ گۆڕان و بۆ شیعەو ئێران و تەنانەت بۆ پێكەكەش، بەشەكەی تری یەكێتیش كە پارتی نین دەبن بە گۆڕان، بەشێكیش بەپێی بەرگری كردنیان بە پێی هەمان پێوانە سەر بە مالیكی و شیعەن و بەشێكیش سەربە ئێرانن و بەشێكیش مەیلداری پێكەكەن. ئەمەش قسە بە ناوبانگەكەی ئیسماعیل بێشكچیمان بیردەخاتەوە كە دەڵێت داگیركەرانی كوردستان هەریەكەیان كوردستانی خۆیانیان هەیە تەنیا كورد كوردستانی خۆیی نیە. لەو رووەوە دەبێ بگوترێت كاتێ بە بەشێك لە سەركردایەتی یەكێتی بگوترێت پارتیەكانی ناو یەكێتی، ئەوا دەبێ بە بەشێكیش بگوترێت گۆڕانەكانی ناو یەكێتی و مالیكیەكانی ناو یەكێتی و ئێرانیەكانی ناو یەكێتی و...سەرئەنجام شتێك نامێنێتەوە بە ناوی یەكێتی، بێگومان ئەمەش لۆجیكێكی ئاوەژووە.

ئێستا با بزانین ئەوانەی بە پارتیبوون تاونبار دەكرێن، ئایا دژایەتی خۆیانیان بۆ كوردو بۆ یەكێتی و بۆ كوردستان راگەیاندووە؟ ئایا دژایەتی خۆیانیان بۆ تێكدانی تەواوەتی ماڵی شێواوی كورد ئاشكرا كردووە؟ ئەی ئەوانەی كە سەربەگۆڕانن چیان كردووە بۆ كوردو كوردستان كە بیسەلمێنێت لەوانە كوردترن كە سەربە پارتین؟ ئایا ئەوانەی سەر بە مالیكی و شیعەو ئێرانن چەندێ‌ خزمەتی كوردیان كردووە چەندێ‌ لەبەردەم عەرەبدا بچووكی كوردیان نیشانداوە؟ ئەی ئەوانەی تر كە سەربە پێكەكەن چیان بۆ كورد كردووە؟ برادەرینە ئێوە هەمووتان ئەندامی حیزبێكن، چۆن لە رووتان دێت بەوجۆرە هاوڕی و هاوخەبات و هاوسەنگەرەكانتان بەوجۆرە ناشیرینانە تاوانبار بكەن؟ ئەگەر ئەم تاوانباركردنانەتان راستبن ئەوا هیچتان خاوێن دەرناچن و هەمووتان گوناهبارن چونكە بە پێی ئەو بنەمایەی بۆ پارتیبوونی هەندێك:تان لەلایەن هەندێكی ترتانەوە دانراون ئەوا هەمووتان دەبن بە پیاوی خەڵكی تر، گوناهەكەش ئەمەیە بەوجۆرە غەدر لە خۆتان دەكەن بە تایبەتی ئەوانەتان كە بە حیزبەكەتانەوە ماندوو بوون. بەو پێیەی كە هەر دەستەیەكتان مەیلتان بە لایەكدا هەیە، شتێك نامێنێـەوە ناوی یەكێتی بێت. بەڵام ئایا ئەوە راستە بێگومان نەخێر. بۆیە حەقە هەمووتان كەمێك بە لۆجیكی عەقڵ بیربكەنەوەو واز لەو یەكتر تاوانباركردنە بهێنن چونكە ئەگەر وریا نەبن ئەم پەرتبوون و خۆخۆریەتان دەتان روخێنێت، ئاشكرایە سەختترین و ترسناكترین برین ئەوەیە لەناو جەستەدا بێت.

ئێوە هەمووتان واینیشان دەدەن كە شانازی بە مام جەلالەوە دەكەن و خۆتان بە شوێنكەوتووی دڵسۆزی ئەو دەزانن. بەڵام لە خۆتان بپرسن بەو ئەندازەی مام جەلال لە ساڵی 2000 بەدواوەو بە تایبەتیش دوای رووخاندنی سەدام لە پارتی نزیك بووەوەو سەردان لە دوای سەردانی پارتی كرد، مەبەستەكەی هەرچیەك بێت لەوانەی كە دواتر باسی دەكەین، ئایا ئەوانەی كە ئێستا لەو مەكتەب سیاسی و سەركردایەتیتاندا بە پارتیبوون تاوانباریان دەكەن بەو ئەندازەی مام جەلال نزیكبوونەتەوە لە پارتی؟ بێگومان من بۆخۆم زیاتر وایلێكدەدەمەوە كە مام جەلال پاش ئەزموونی نزیكە چل ساڵ ململانێ لەگەڵ بنەماڵەی بارزانی گەیشتن بەو قەناعەتەی كە ناتوانێت بە ململانێ هیچ لە بنەماڵەی بارزانی بباتەوە، بۆیە ئازایانەو بوێرانەو دڵنیام بێ گوێگرتن و گوێدان بەوەی كە رەنگە زۆرێك لە مەكتەبی سیاسی و سەركردایەتی و كادیرانی یەكێتیش بەو نزیكبوونەوەی ئەو ناڕازیبن، ئەو بڕیاری خۆیداو كارگەیشتە ئەوەی شارۆچكە بە شارۆچكەو دی َ بە دێ‌ بگەڕێت و كۆبوونەوە بكات و دژی بەربژێرەكەی كاكە نەوەكەی خۆی بانگەشە بۆ كاك مەسعود بكات و دەنگی بۆ كۆبكاتەوە.  ئایا یەكێتیەكان توانای ئەوەیان هەیە بیر لەوە بكەنەوە مام جەلال ئەوەی بۆچی كرد؟  بێگومان یان ئەمیش بووبوو بە پارتی یان لە پێناوی زیاتر لێكنزیككردنەوەی یەكێتی و پارتیدا بوو، یان لە پێناوی بەرژەوەندی خۆیدا بوو بۆ ئەوەی بۆ خولی دووەمیش ببێتەوە بە سەرۆك كۆماری عێراق. بەڵام بەداخەوە زۆرێك لە یەكێتیەكان كە زیاتر مەبەستم هاوڕێ‌ و دۆستە نزیكەكانی خۆمە لە ناو مەكتەبی سیاسی و سەركردایەتی و ناوەندەكانی تری یەكێتیدا بوێری ئەوەیان نیە هەرگیز لە بارەی هەڵوێستەكانی مام جەلالەوە لە نزیكبوونەوەیدا لە پارتی پرسیار لە خۆیان بكەن، چونكە ئەگەر ئەو پرسیارەیان كرد ئەوا بە یەكێك لەو سێ خاڵە دەگەن كە پێشتر ئاماژەم بۆ كردن، هەرچەندە من خۆم زیاتر ئەوەیان بۆ هەڵویستی مام جەلال بە درووستتر دەزانم كە لە پێناوی زیاتر لیكنزیكبوونەوەی یەكێتی و پارتیدا ئەوەی كردووە چونكە ئەو باش دەیزانی بۆ ئەم قۆناغە چارەنووسی كورد لە باشووری كوردستان بەستراوە بە یەكێتی و پارتیەوە. كەواتە ئەو بەرپرسانەی یەكێتی كە ئێستا نایانەوێـت لە پارتی دووربكەونەوەو هەوڵدەدەن پەیوەندی یەكێتی لەگەڵ پارتی باش بێت، ئەوانە لەسەر رێگای مام جەلال دەڕۆن، كەچی ئەوانەی لە سەنگەری گۆڕان و شیعەوە قسە دەكەن، ئەمانە بە پارتی تاوانبار دەكەن و خۆیان بە شوێنكەوتووی مام جەلال دەزانن؟ ئایا كام لەم ئاراستەیانە شوێنكەوتووی مام جەلالن؟

هەرچەندە من نە لەو كەسانەم ئامۆژگاری كەس بكەم، نە ئەو حەقەش بەخۆم دەدەم، بەڵام پێموایە لۆجیكی عەقل دەڵێت: سیاسەت بە دیدی پراگماتیكانە دەكرێت. بۆیە هەڵوێستی درووستی حیزبایەتی لە كوردستاندا لە سەر دوو بنەما وەردەگیرێت. یەكەم لە روانگەی بەرژەوەندی نەتەوەیی و نیشتیمانیەوە. دووەم لە روانگەی بەرژەوەندی حیزبیەوە. بۆ یەكێتیش وەكو هەر حیزبێكی تر ئەم دوو بنەمایە راستە، نەك سۆزو عاتیفەو هاوڕێیەتی و رق و كینەو شەرم و ترس لە قسەو جنێو و تاوانباركردن. بەواتا ئەوەی پێویستە یەكێتی بیكات ئەوەیە: ئەگەر بەرژەوەندی نەتەوایەتی و نیشتیمانی و حیزبایەتی خۆیان لەوەدایە لەگەڵ پارتی نزیك و هاوپەیمان بن، حەقە هیچ لەو نزیكی و هاوپەیمانێتیە نەترسن و بە جیدی و بە ئاشكرا رایبگەیەن و كاری بۆبكەن. ئەگەریش پێیان وایە نزیكی و هاوپەیمانیان لەگەڵ گۆڕان لە بەرژەوەندی كوردو كوردستان و حیزبەكەشیانە، ئەوا پێویست ناكات هیچ دوو دڵ بن و حەقە بوێرانە بڕیاری نزیكی و هاوپەیمانی و پێكەوە كاركردن لەگەڵ گۆڕان بدەن و بۆ رێزگرتنی خەبات و تێكۆشانی خۆیشیان پێویستە لە یەكتر تاوانباركردن دووربكەونەوەو هەڵوێستی كۆنكرێتیان هەبێت، نەك لەسەر پەتی لەرزۆكی نێوان پارتی و گۆڕان یاری بكەن، چونكە پەتی نێوان پارتی و گۆڕان لە تاڵەموش باریكترە كە بە تەواوی پچڕا یەكێتی كە لەسەر ئەو تاڵە موویە دەكەوێتە چاڵەكەوە. ئەوەش رەنگە نەك زیانی هەر بۆ یەكێتیەكان هەبێت بەڵكو دەبێتە پاشاگەردانی تەواو لەو جوگرافیایەدا كە هەتا ئێستاش یەكێتی بەرپرسی یەكەمە لە بەڕێوەبردنی. 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP