هێڵی سوری ترەمپ

شۆڕش خالید ئاژگەیی - 6-04-2017 - 3352 جار خوێندراوەتەوە

شۆڕش خالید ئاژگەیی

وادیارە هێرشی كیمیایی بۆ سەر خەڵكی مەدەنی لە یەكێك لە شارۆچكەكانی سوریا و كوژران وبریندار بوونی ژمارەیەكی بەرچاو لە ژن ومناڵ و پیرو پەك كەوتە، كاریگەری كردۆتە سەر دۆناڵد ترامپەوە.

هەردوای بڵاوبوونەوەی وێنە دڵتەزێنەكانی مناڵانی بەركەوتوو بە گازی كیمیاوی قەدەغە كراوەوە، ترامپ لە میانەی دیدارێكی دوو قوڵیدا لە گەڵ شاعبدوللە ڕایگەیاند ئەوەی ڕووی داوە زۆر دڵتەزێنە و كاری كردۆتە سەر بۆچونەكانم بەرامبەر بە داهاتوی سوریە و بەشار ئەسەدی سەۆكی ئەو وڵاتەوە. 

ترامپ ڕایگەیاند ئەوەی ڕویداوە و بەتایبەت بەشار ئەسەد وایكرد هەمو " هێڵە كان" ی من گۆرانكاریان بەسەر دابێت. وەكو ئاماژەیەك بۆ هەڕەشەكانی ئۆباما لە ئەسەد لە ساڵی 2013 دا كاتێك زیاتر لە هەزار و چوارسەد مەدەنی لە ئەنجامی هێرشێكی بەربڵاوی كیمیاوی لە نزیك دیمەشقی پایتەختدا گیانیان لەدەست دا و دواتر ئۆباما لە هەڕەشەكە وهێڵە " سورەكە" ی پاشگەز بوویەوە.

هەرلەم چوارچێوەیەشدا هەردوو وتە بێژی كۆشكی سپی و نوێنەری هەمیشەیی ئەمریكا لە ڕێكخراوی نەتەوە یەكگرتووەكان لە لێدوانە تایبەتیەكانیاندا سەربارەت بە هێرشی كیمیاوی بۆ سەر مەدەنیەكان، نەیانشاردەوە بژاردەی دەست تێوەردانی سەربازی لە سوریە بە كراوەیی ماوەتەوەولە لایەن ئیدارەی ترامپەوە كاری لەسەر دەكرێ.

بیرمان نەچێت دەست تێوەرنەدانی سەربازی لە كاروباری وڵاتان بە گشتی و ڕۆژهەڵاتی ناوەڕاست بە تایبەتی، بە یەكێك لە درووشمە هەرە بەرچاوو ستراتیژە كار بۆ كراوو بەڵێن پێدراوەكانی ترامپ دەژمێردرێت لە كاتی بەڕێوەچوونی هەڵمەتەكانی هەڵبژاردنی سەرۆكایەتیدا. لێ وا پێدەچێ دەرەنجامە دڵتەزێنەكەی هێڕشە ژەهراویە قەدەغەكراوەكەی سەر هاوڵاتیە مەدەنیەكان، كاری كردبێتە سەر ئیدارەی ترامپ و پەلە كردن لە گرتنە بەری ستراتیژێكی تر بۆ یەكلایی كردنەوەی كارەساتە یەك لە دوایەك و دەرەنجامە مەینەتبارەكانی تایبەت بە جەنگی ناوەخۆی سوریەوە.

من پێم  وایە ترامپ كەوتۆتە سەر دووڕیانێكەوە و هەڵبژاردنی دوو ڕێكا و ڕێكاری لە بەردەمدایە. ئەگەر هەڕەشەكەی بخاتە بواری كردارەوە دەبێ وێڕای تەفروتوونا كردنی توانا سەر بازیەكانەی ئەسەد، هەوڵی جدی بۆ هاتنە سەركاری دەسەڵاتێكی مەدەنی و دیموكرات بدات و هەڕەشەی گرتنەدەسەڵات لە بزاڤ و ڕێكخراوە تووندڕۆكان لە سەر گەلی سوریا دوور بخاتەوە. ئەمەی دواییش بە بێ ڕەوانەكردنی هێزی سەربازی پیادەی ئەمریكی بۆ ناو خاكی سوریا مەحاڵە. 

ناردنی سەربازو سوپاش بۆ جەنگی دوور خستنەوەی ئەسەد و هێنانە سەركاری دەسەڵاتێكی مەدەنی و ڕێگری كردن لە دووبارە نەبوونەوەی ئەزمونی لیبیا، بژاردەیەك نیە دەنگدەرانی ئەمریكی ڕازی بن پێیەوە دۆناڵد ترامپیش لە سەرەتا و لە چەندین بۆنەدا دژایەتی خۆی بۆ ئەم جۆرە بژاردانە خستۆۆتە ڕوو و پاراستنی بەرژەوەندیەكانی ئەمریكای خستۆتە سەرووی هەموو ئەولەویەتێكەوە.

لە حاڵەتی دووەم ئەگەر چاوپۆشی لە تاوانە دووبارە بووە نامرۆڤاییە كانی ئەسەدەوە بكات، هەم وەك ئۆباما بە سەرۆكێكی ترسنۆكی بێ بەڵێن و پەیمان لە قەڵەم دەدرێت، هەم  پەیامێكی بەهێز بۆ دیكتاتۆرە تاكڕەوە ملهورەكانی تر دەنێری بەوەی ئەوانیش دەتوانن بە گرتنەبەری هەمان ڕێچكەی ئەسەد و ڕژێمەكەیەوە بەر بنە گیانی هاونیشتیمانیان و دەست لە هیچ كردارێكی قیزەوەنی نامرۆڤانە بۆ درێژەدان بە حوكمی دیكتاتۆریان نەپارێزن.

بیرمان نەچێت دۆناڵد ترامپ یەكێك بوو لە نەیارە سەرسەختەكانی ئۆباما بۆ ڕێگری كردن لە دەست تێوەردانی سەربازی لە شەڕی سوریا. ناوبراو لە چەندین تویتی جیاوازدا دژایەتی خۆم بۆ دەست تێوەردانی سەربازی نەشاردەو پێی وابوو هەر جۆرە دەست تێوەردانێك دەبێتە هۆی ڕوودانی كارەساتی جەرگبڕی تر و لە كۆنترۆل دەرچوونی دۆخەكە و لێكەوتنەوەی دەرەنجامی چاوەڕوان نەكراوی مرۆیی و سەربازیەوە. بۆیە ناوبراو ناچارە بۆ خۆ دەربازكردن و دووبارە نەكردنەوەی " هەڵە" كانی ئۆباما ( بە بۆچوونی ئەو) كردار بخاتە پشت بۆچوونەكانی و بە كردەوە جیاوازیی خۆی و عەقڵی سیاسی  و ئیداریەكی جیاواز لەوەی پێشتر ( ئۆباما) بخاتە ڕوو.

بەڵام دوای ڕووداوەكەی ئەم دواییەی بۆردومانی كیمیاوی فرۆكەكانی سوریە بۆ سەر خەڵكی بێتاوانی مەدەنی و بڵاوبوونەوەوی وێنەی كوژراوو برینداربوونی ژمارەیەكی بەرچاو لە ژن و منداڵەوەو فشاری میدیا جیهانیەكان و ورووژانی ڕای گشتی و لێدوانی تووندی سەرانی ڕۆژئاوا سەبارەت بە ئاسۆی لێڵی ئاییندەی شەری سوریە و ملهوریە بەردەوامەكانی ئەسەد و سوپاكەی دەرهەق بە هاوڵاتیە مەدەنیەكان، وادیارە ترامپ هەستی بە بەرپرسیارەتی میژوویی خۆی وەك سەرۆكی بە هێزترین وڵاتی جیهان كردبێت و تێ گەیشتبێ كەوا " هێز" جۆرێكە لە پابەندبوونی ئەخلاقی و سیاسی و ئیداری، بەرامبەر بەو زێدەڕۆیی و سووكایەتیەی لە گۆشەو كەناری جیهان بە ناوی جۆراوجۆرەوە دەكرێتە سەر مرۆڤایەتی وبێ نرخ كردنی بەها ئینسانیەكانەوە.  

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP