بۆ کورد نەک مەسعود بارزانی

توانا ئەحمەد - 15-01-2020 - 31811 جار خوێندراوەتەوە

به‌ بڕوای تایبه‌تی خۆم ئاسان نییە پەلاماری حەسەن نەسروڵا بۆ سەر مەسعود بارزانی تەنها وەکو پەلاماردانێکی تاکە کەسی تەفسیر بکرێت، چونکە ئەو پیاوە لەمیانەی ڤیدیۆیەکی کورتدا رستێک پەیامی ئاگرین بۆ کورد ئەنێرێت کە جگە لە بێرێزی، بۆنی هەڕەشەو چاوسورکردنەوەشی لێدێت، بەڵام بۆ گەیاندنی پەیامەکانی ناوی بارزانی وەکو بەهانەیەک بەکار دێنێت.

حەسەن نەسڕوڵا لەخاڵێک پەلاماری کاک مەسعود ئەدات کە شوێنی پەلاماردان نییە، چونکە لەخاڵی وەستانەوە دژی داعش و هەر مەترسیەکی دەرەکی لەو بابەتە، ئه‌شێ هەر کاراکتەرێک که‌ رۆڵ و جێده‌ستی هه‌بێت بەرجەستەی هەموو تاکێکی کوردستان بکات، بۆیه‌ لەم بابەتەدا بێرێزیکردن بەهه‌ر که‌سێک یه‌کسانه‌ به‌ بێڕێزیه‌کی دەستەجەمعی بە هەموو کورد.

سه‌باره‌ت به‌ ترسیش لە داعش ئەوەندەی تەعبیرە لە هوشیاریەکی ئاقڵانە هێندە تەعبیر نییە لە ترسنۆکی، چونکە داعش سەرەڕای دڕندەی و سامناکیەکەی، تەونێکی مەترسیداریش بوو بۆ کورد، به‌ ڕونیش هه‌ڕه‌شه‌ی بۆ سه‌ر کوردستان و عیراق و بگره‌ سه‌رانسه‌ری جیهان دروست کرد، بۆیه‌ش وڵاتانی زلهێز لەسەر ئاستێکی دنیایی هاوپەیمانێتەیەکی تایبەتیان بۆ پێکهێناو و سەرۆکی ئەمریکاش نێردەیەکی تایبەتی بۆ جەنگی دژ بەداعش دامەزراند، کەئەمە دەربڕی لە سامناکی هێزو زەبروزەنگی داعش ئەکرد، کەوابێت بۆ کورد لەوە لۆژیکانەتر نییە داوای هاوپەیمانی و هاریکاری لە وڵاتان بکات بەتایبەت دراوسێ بەتایبەتریش ئێران ، چونکە لەلایەک پاراستنی هەرێمی کوردستان بۆ ئێران رەهەندێکی ستراتیژی هەیە،تێکچونی دۆخی ئەمنی ھەرێمی کوردستان راستەوخۆ داعشی دەگەیاندە سەر سنوری ئێران لەلایەکی تریش ئێران هەمیشە پەناگەی لێقەومان و ئاوارەیی کورد بووه‌.

ئەشێ لە ئاستی ناوخۆ و سەبارەت بە ئەدای سیاسی و حوکمڕانی، رەخنەمان لە کاک مەسعود و هەر سەرکردەو کەسایەتی و هیزێکی سیاسی هەبێت و هەشمانە، بەڵام ناشێ بەهەر بەهانەیەک بێت ئەو دەستدرێژەیەی حەسەن نەسروڵا دڵخۆشمان بکات، چونکە لەگۆشەیەکەوە پەلامار ئەدات کە ئاوەکەی تێکەڵ بە بەرژوەندی هیچ یەکێک لە ئێمە نابێتەوە. بۆ مەبەست و مەرامێکیش قسەی پێ دەڵێ، کەبێ ئەنداز مەبەستێکی سیاسی ناکۆکە بەکوردو بەرژەوەندییەکانی، کەکورتیەکەی پاراستنی کوردستانە لەوەی ببێتە گۆڕەپانی ملاملانێیەک کە هیچ ده‌سکه‌وتێکی بۆ کورد نییە، هەر چەندە بەرگری بەشێک لە نوسەر و فەیسبوکچیەکانی پارتی، میزاجی بەرگری جیدی و بوێرانە لەنێوان ستایشێکی بێتام و پەلاماری خەڵکی تر، تێک ئەدەن، هه‌ندێک له‌وانه‌ له‌بری ره‌خساندنی کۆده‌نگی ، بێ هیچ به‌هانه‌یه‌ک دێن له‌جیاتی وه‌ڵامدانه‌وه‌ی حه‌سه‌ن نه‌سڕوڵا په‌لاماری خه‌ڵکی تر ئه‌ده‌ن، به‌ڵام به‌ ده‌موپلێکی ساویلکه‌و هه‌رزه‌ییانه‌‌.

ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP