پرۆژە ترسناکەکەی ئەردۆغان

شۆڕش خالید ئاژگەیی - 11-10-2019 - 6393 جار خوێندراوەتەوە

پرۆژە ترسناکەکەی ئەردۆغان  لە پاڵ لەشکەرکێشی بۆ سەر کوردستانی  رۆژئاوا خۆی لە  بونیادنانی سوریایەکی بچوکی عەرەب نشین دەبینێتەوە و بریتیە لە:

- دروست کردنی دە ناوچەی نیشتەجێ بوون
- بونیاد نانی 140 گوند و چەندین شارو شارۆچکەی نیشتەجێ بوون لەسەر خاکی کوردان بە درێژایی خاکی داگیرکراو
- دروست کردنی سەدان قوتابخانە، بنکەی تەندروستی، نەخۆشخانە، یاریگا، دووسەت ھەزار یەکەی نیشتەجێ بوون، زانکۆ...ھتد
- نیشتەجێ کردنی سێ ملیۆن پەنابەری عەرەبی سوری 
- نیشتەجێ کردنی دەیان ھەزار پەنابەری سووری ، ئەوانەی ئەوروپا دەیان نێرێتەوەو مافی مانەوەیان بۆ نوێ نەکراوەتەوە.
- فراوان کردنی پرۆژەکە تا قوڵایی دێرزوور و رەقەی شاری بە نەوت دەوڵەمەند.
- رازی کردنی ئەوروپیەکان بۆ ھەڵگرتنی بەرپرسیارەتی  خەرجیەکان. بە پێی مەزەندەکان تێچووی ئەم پرۆژەیە خۆی لە 25 ملیارد دۆلار دەدات و تورکیە ئەو پارەیەی نیە. 

ئەردۆغان باش دەزانێ چۆن پلانەکەی بکاتە ئەمری واقع. ئەو چەند رقی لە کوردە، ئەوروپاش دوو ئەوەندە لە پەنابەرانی سووری بێزارەو بە دوای بیانوویەکدا دەگەرێ دیپۆرتی سووریایان بکاتەوە. 

بۆیە رێی تێدەچێ بتوانێ ئەورووپیەکان بێدەنگ بکات و  نارەزایەتیەکان لە چوارچێوەی بەیاننامەی ( نیگەرانین لە پەرەسەندنەکان) قەتیس بمێنن و ئەو بە دەستی کراوە درێژە بە کاولکاری و راگواستنی کوردەکان بدات و خاکیان تەعریب بکات لە سەردەمی پۆست داعشیزمی دارووخاودا.

ئەردۆغان سیاسیەکی دەمارگیر و ھەڵگری رق و قینێکی ئاگرینە بەرامبەر بە ئازادی کوردان . ئەوەی نکۆڵیشی لێدەکات و پەسنی سیاسەتەکانی ئەردۆغانیزم دەدات ( بەرگری لێدەکات)، رێک دەخرێتە ھەمان تای تەرازووەوە.

ئەو میراتی سیستەم و عەقڵیەتی کەمالیزمە لە بەرگێکی تازەو رووکەشێکی ئیسلامگەرایانە و خاوەنی رۆحیەتێکی تاسەر ئێسقان شۆفینی و سایکۆلۆژیەتێکی دڕندەو تاکرەو و دیکتاتۆرە.

ناوبراو نەیشاردۆتەوە ئەگەر بھاتایەو لە ساڵی 1991 لەسەر دەسەڵات بوایە, قەت رێگەی بە درووست بوونی قەوارەیەک بە ناوی ھەرێمی کوردستانەوە نەدەدا.
جاری واھەیە گواستنەوری لێدوان و ئاخاوتن و کۆنفرانسە رۆژنامەگەریەکانی ئەردۆغان لە لایەن چەند کەناڵێکی کوردیەوە،  مرۆڤ  دووچاری سەرسوڕمان و ھەڵوەستە لەسەر کردن لەسەر کۆی گشتی سیاسەت و بەرژەوەندی ھاوبەش و رێزی دوولایەن دەکات...!!!

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP