بەپەلە

چۆن خۆپیشاندانەکانى عێراق بخوێنینەوە؟

فارس نەوڕۆڵی - 4-10-2019 - 2729 جار خوێندراوەتەوە

 

خۆ پیشاندانەکانى عێراق بابەتێکى نوێ نییە، بە درێژاى مێژووى عێراق وڵاتێکى نا سەقامگیرو ناهاوسەنگ بووە، بەڵام لە دواى 2003 ڕوخانى بەعسیەکان کە عێراق  گەڕایەوە بۆ کێشە قوڵە مەزهەبیەکان لێرەوە بەریەک کەوتنەکان لەنێوان دوئاگاى دوو مەزهەبدا بەردەوام توندتر دەبوو بۆیە هیچ نەپەرژانە سەر خزمەتى خەڵک عێراق غەرقى گەندەڵى بوو تا کارگەیشتووەتە ئەوەى ئاوى خواردن لە زۆربەى شارەکان ئەستەم دەست بکەوێت.

هیچ کات داواکارى خەڵک جێ بەجێ  نابێ و وەڵامى پرسیارەکانى خەڵک بێ ئەنجام دەبێ

 

لەلایەکى دیکەوە بێکارى و هەژارى واى کردووە لاوانى عێراق توشى خزان بێت بە شێوەیەکى گشتى عێراق لە خراپترین دۆخى ئابوورى و سیاسی و کۆمەڵایەتى و ئاسایشدایە ،بۆیە ناوەناوە خۆپیشاندان لە شارە جیاجیاکان دروست دەبێت لەم کاتانەشدا حزبێک سوارى شەپۆلەکە دەبێ و بۆ بەرژەوەندیەکانى خۆى بەکاری دێنێ،  بۆیە هیچ کات داواکارى خەڵک جێ بەجێ  نابێ و وەڵامى پرسیارەکانى خەڵک بێ ئەنجام دەبێ، بەڵام پێ دەچێ خۆپیشاندانەکانى ئەم جارە جیاوازتربێت لە خۆپیشاندانەکانى پێشوو ،  ئێستا خۆپیشاندانەکان دژى گەندەڵى و نادادى و بێ کارییە، بەڵام ڕەهەندێکى سیاسى بە پلەى ئیمتیاز هەیە ئەویش بەریەک کەوتنى بەرژەوەندییەکانى وڵاتانى جیهان و ناوچەکەیە وەک ئەمەریکا و بریتانیاو ئێران و ڕوسیاو ئیسرائیل و عەرەبستانى سعودیە لە ناوچەکەدا واتە دەرەنجامى ئەم خۆپیشاندانانە هەموو ئەگەرێکى لێ چاوەڕوان دەکرێ بەتایبەتى گۆڕانکارى لە عێراق دا سروشتى گۆڕانکارییەکانى بەرژەوەندى هێزە گەورەکان نەخشەى دەکات واتە وەڵامى پرسیارەکان بە کراوەیى دەمێنێتەوە.

کورد چى بکات ؟
 هەنگاوى یەکەم یاخود بیرکردنەوە لە هەر بژاردەیەک لە هەرێمى کوردستان پاراستنى ئاسایشى هەرێمى کوردستانە ئەمەش بەوە دەست پێدەکا هێزە سیاسیەکان قوڵ بیر لە ڕووداوەکان بکەنەوە بۆ ئەم قۆناغە جیاوازییەکانیان سڕکەن تەنها لەبەرژەوەندى باڵاى هەرێم هەرکردارێک بیانەوێ بینوێنن ، دۆخى  ئێستا تاڕادەیەک لەبەرژەوەندى کوردە ئەگەر یەکێتى یەکى  ئاگاى سیاسى هەبێت بۆ جوڵاندنى کارتەکانى، ئێستا ناوچەکە بەرەو گۆڕانکارى دەڕوات هەر هێزو لایەن و دەوڵەتێک بەڕێگاى بەرژەوەندى خۆیدا دەڕوات ، ئەگەرچى خاڵى هاوبەشیش لەنێوانیاندا هەبێت ، کەواتە کورد دەبێت هاوسەنگى بەرژەوەندییەکانى لەگەڵ دەوروبەر ڕابگرێ ، بەڵام شاڕێگا ڕێگاى بەرژەوەندى هەرێمە کە دەبێ بە ئاگاییەوە پێیدا بڕۆین ئەمەش دەبێت تێگەیشتنى دروستمان  بۆ کۆی ڕووداوەکان هەبێت، چۆن تێگەیشتنى دروست بەدەست دێت؟

لە ڕێگاى ڕەگوڕیشەى تێگەیشتنى پێشتر بە پێدا چونەوەى هەڵەو ڕاستى یەوە لەگەلًَ بەراوردى ڕووداوەکانى ئێستا بە بیرکردنەوەیەکى قوڵ و ئەرێنى ، چونکە شت بێ بیرکردنەوە ناکامڵە توشى یەقینى موزەیەفمان دەکات بۆیە تێگەیشتنى ئێمە بۆ ئەم ڕووداوانە بە پلەى ئیمتیاز ئەوەیە هیچ لایەنێک بۆ بەرژەوەندى خۆى کورت بینانە خۆى نەداتە دەست شەپۆلەکە، بەڵکو دەبێ کورد لە ئاڕاستەى شەپۆلەکەشى تێ بگات و خۆى لێ لادات بۆ دۆزینەوەى ئەو ڕێگایەى کەبەرەو  بەرژەوەندى باڵاى هەرێمى کوردستانمان دەبات.


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP