بەپەلە

تاکی کوردی بە تەنافی فەیس بووکەوە

موئمین یاسین زەڵمی - 5-08-2019 - 1220 جار خوێندراوەتەوە

 بۆچی پۆستێکی فەیس بووک سەرواژێرمان دەکات‌و بۆچی میزاجمان هەڵسوڕێنەری هەڵوێستەکانە‌و بۆچی سیاسییەکان ئەدەین بەتەنافی فەیس بووکا‌و رۆژێ وشکیان ئەکەینەوە‌و رۆژێ تەڕ، چیمان دەستدەکەوێت لەم هەموو تەڕو‌و وشکییە؟ 

فەیس بووکی کوردی ئەو حزبە گەورە‌و خاوەن نفوزەی زۆرترین ئەندام‌و لایەنگری هەیە‌و چۆنی بوێت ئاوا ئاڕاستەیان دەکات، بەبێ ئەوەی کەمترین کاریگەری لەسەر ژیانی واقیعی هەبێت، بەبێ ئەوەی تۆزقاڵێک خەم‌و نەهامەتی‌و ناسۆرییەکانی ژیانی رۆژانە کەم بکاتەوە.
ئەوانەی لایک‌و فۆڵۆوەرسی زۆرترینیان هەیە زۆرترین دەنگەدەنگ‌و غەڵبەغەڵب‌و کاریگەری ناواقیعی دەخەنەوە، لەفەیس بووک بەپیچەوانەی دانیشتوانی خۆشگوزەرانی جیهانەوە ئێمەی کورد ناخۆشترین ژیان‌و گوزەرانمان هەیە، ئاخر بۆ خۆمان ناژین.

ئەکاونتی فەیس بووک پێنج هەزار! هاوڕێی هەیە، کەچی زۆرینەی کورد بۆڵەبۆڵیەتی کە بەشناکات، هەیە سێ ئەکاونتی کردۆتەوە‌و پانزە هەزار کەسی کۆکردۆتەوە زۆرینەشیان لەسەر شەقامەکان سەلامێکیان پێکەوە نیە، لەفەیس بووک کوردی جیاوازی نێوان کەسەکان نابینێرێت، هەمووی سیاسی‌و بەرگی سیاسی پۆشیوە، هەموو لەخەون‌و خەیاڵی بوونە فیگەریدان، لەکوردستان‌و لەفەیس بووکی کوردییەوە کەس بۆ خۆی ناژیت، هەموو چاویان لەزۆرترین فرەیم‌و زۆرترین فلتەر‌و زۆرترین لایک‌و زۆرترین کۆمێنت‌و زۆرترین جموجوڵە بەبێ ئەوەی تەکانێکی بەخۆیان بدەن.

جیهانی ناواقیعی‌و خەیاڵی فەیس بووک ئەگەر بۆ گەلانیتر جیهانی چێژ‌و گەشت‌و لۆکەیشنی نوێ‌و شەیرکردنی یادەوەری‌و فۆتۆستۆری‌و خۆشەویستی بێت، ئەوا بۆ ئێمەی کورد بڵندگۆیەکی بێتامی سیاسی‌و هاتوهاوارە، نە کەس دەتوانێ بەدڵی خۆی شتێکی بەسود بنوسێت، نە دەتوانێ وێنەیەکی خێزانی‌و هاوڕێیەتی بەدڵخۆشی بڵاوبکاتەوە.
فەیس بووک بەڵای ژیان‌و گوزەرانی تاکی کوردییە، تازەترین جنێو‌و نامۆراڵترین کلیپی گۆرانی‌و بێتامترین نوکتە‌و توندڕەوترین فەتوا‌و نا ئەخلاقیترین ریکلامی بازرگانی‌و تەشهیری سیاسی‌و تەخوینی کۆمەڵایەتی لەفەیس بووکەوە بڵاودەکرێنەوە، لەریکلامی فەیس بووکەوە بۆ هەرچی نەشێ‌و بشێ تا پۆستی عەجایبات تاکی کوردی ماندووی رۆژ‌و وەڕسی شەوانە.

سەرنج بدەن، لەفەیس بووکەوە زۆر بەئاسانی رەش‌و سپی دابەش دەکرێن، نازناوەکانی رەحمان‌و شەیتان دەبەخشرێنەوە، نە کەس خەمێکی لێ دەخوا‌و نە کەسیش خۆی بەدڵسۆز دەزانێ.

هەمیشە بڕوام وابووە‌و پێداگریش دەکەم باشبوون کەسابەت نیە‌و دەبێ هەمیشە باش بین، بەڵام ئەوەی تۆ دوێنێ کردت بەرامبەر بەوان، ئەمڕۆش ئەوان بەرامبەر تۆ دەیکەنەوەو سبەینێ کەسێکیتریش بەرامبەر ئەوان دەیکاتەوە ... واز لەتەشهیر‌و تەخوین‌و زەلیلکردنی بەرامبەرەکانتان بهێنن، ئێمە پێویستە لەشوێنێک نوقتەیەک دابنێین‌و بچینەوە سەری دێڕ .. تا زووتر بێت هێشتا هەر درەنگە!

ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP