هەواڵی ئەمڕۆ

کۆنگرە لە نێوان خواستە کەسی و خواستە باڵاکاندا!

کاوسێن بابەکر - 3-08-2019 - 1173 جار خوێندراوەتەوە

هەموو ئەو قسەو باسانەی لەسەر کۆنگرە دەکرێن دەتوانین لەدوو ستوندا ڕیزیان بکەین ستونی یەکەم ئەو خواستانەی تێدا جێکراونەوە کە زۆربەی کادیرو ئەندامانی یەکێتی دەیانەوێ کە بریتین لە؛ هەستانەوەی یەکێتی و نوێکردنەوەی دروشم وڕێباز وبیری یەکێتی بەپێی هەلومەرجەکانی سەردەمەکە و دەستنیشانکردنی نەخشەڕێیەکی سیاسی نوێ کە هەلوێستەکانی یەکێتی بخاتەوە خانەی خۆی کە خانەی نیشتمانی و نەتەوەیی دوور لە بەرژەوەندی کەسی وباڵ و گروپن و لێرەوەش دروستکرنەوەی سەرچاوەی بڕیار، کە یەک سەرچاوە دەبێ کەلە سەرکردایتیەکی شایستەی هەڵبژێرراوی شەرعیەوە دەردەچن.

ستونی دوەم ستونی کەس وگروپ وباڵە کە کۆنگرە بۆ یەک پرۆسە کورت دەکاتەوە،کە پرۆسەی هەڵبژاردنی سەرکردایەتیە، کە لە ئێستاوە ناوەکانیان لەلیستێکدا نوسیوەو دەستاودەستی پیدەکەن، لای ئەوان کۆنگرە ئەگەر ئەوناوانە ی خۆیان نەبن نەگیرێ باشترە وهەر لەبنەچەدا کۆنگرە لای ئەوان نەنوێکردنەوەو نەچاکسازی ونە نوسینەوەی پەیڕەوو پڕۆگڕامێکی سەردەمیانەیە بەڵکو دەرچواندنی ئەو گروپەن کە وەلایان بۆ خۆیان وپاراستنی بەرژەوەندیە ئابوریەکانیانە وهیچی تر!.

گەلۆ! بەشێک لە سەرکردایەتی و کادیرە دەستڕۆێشتوەکان تا ئەو ئەندازەیە لە بیروباوەڕی دوێنێیان کە گیانبازیان بۆ باوەڕەکانیان دەکرد وهەڤاڵی شەهیدان ئارام وعەسکەری وشیهاب وئەنوەرو...بون ودەیانجار لەڕۆخی مەرگێکی شۆڕشگێڕانەی ئەفسوناوی گەڕابنەوە چ سەمەرەیەکە ئێشتا کۆنگرەو حزب تەنهاو تەنها بە مانەوەی خۆیان لەدەستەڵاتدا ببیننەوە،دەبێ لایەنگران وجەماوەری یەکێتی چ چاوەڕوانیەکی لەو جۆرە سەرکردانە هەبێ کەتاڕادەی هەرەس وبێ ئومێدی خۆیان و حزبەکەیان،لەگۆڕانکاری وزیندووکردنەوەی نەریتە جوانەکانی یەکێتی بردبێ. 

کۆنگرەیەک خەیاڵیان هەر لای لیستی گیرفانەکەیان بێ بۆ پاراستی بازرگانی و کۆمپانیاکانیان،کۆنگرەیەک بەلای گۆڕانکاری بنەڕەتی لە سەرکردایەتی،بەرنامە وپەیڕەو و پێداچونەوە بەپرەنسیبە حزبیەکاندا، ڕێکخستنەوەی سەرجەم ئۆرگانەکان، دوور لەباڵباڵێن ودەستەگەری، دونیابینیەکی نوێ بۆ ڕوداوە ناوخۆیی ودەرەکیەکان، نەخشە ڕێگایەکی نوێ بۆ ئایندە...دا نەچێ کۆنگرە بۆ دەگیرێ؟.

کۆنگرە دەبێت ئازا و ئازاد بێ بۆ ئەوەش دەبێ هەموو لایەنەکان پێشوەخت لەسەر میکانیزمی کۆنگرەو دڵنیاییدان بەیەکتر بۆ کۆنگرەیەکی پاک وخاوێن دوور لەدەستەگەری وکلک لێکگرێدان  لیکتێگەیشتن بێتەدی،بۆئەوەی بەدڵێکی ئارام وپڕ لەئومێد بۆ هەستانەوەو ڕێکخستنەوەی یەکێتی بێینە کۆنگرە، دەبێ هەموان بەباوەشی هەڤاڵانە وگیانی پێشمەرگانە ڕوولەیەکتر و لەکۆنگرە بکەن، نابێ ڕێگە بە ڕێککەوتنی ژێر بەژێر وتەزویرو کلکگرێدان بدەن. با بەکۆنگرەیەکی مۆدێرن ونمونەیی گیانی شەهیدانمان خۆش بکەین وجەماوەری دڵسۆزی ڕێبازی مام ئاشتکەینەوە.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP