بەپەلە

حەقیقەتی چاکسازی:

کەمال محەمەد - 30-07-2019 - 1747 جار خوێندراوەتەوە

ناوهێنانی چاکسازی مێژویەکی کۆنی هەیە لەناو دەسەڵات و هێزە سیاسییەکاندا  بەڵام ئەگەر خواست و پلانێکی جددی نەبێت گومانی تێدا نییە کە بەدیهاتنی  لواو نابێت ،کۆی هێزە سیاسییەکان  جارو بار تێبینی  چاکسازی ئەکەن ،ناوهێنانی چاکسازی یەکێکە لە سەرەکیترین تایبەتمەندییەکانی زیندوبونەوەو دۆخی خۆ نوێکردنەوە ،بۆیە لەم واتایەدا هێزەکان خۆیان لەسەر شێوازی ئەو چاکسازییە دەرئەبڕن ، ئەنجامدانی ئەم کارە پێویستی بە چڕبونەوەو بەدەستهێنانی هێز و هزرە بۆ ئەوەی سیستەمی نوێ لەئەنجامی چاکسازییەکە بەکاریگەر بێت و تا دوا ڕادە گرنگە بە گوێرەی ئەو ووتانە بێت کە لەڕێگەی وێنەو هێڵکارییەوە بۆ وەرگرتنی زهنی چاکسازی لەبارە ،

لەهەرێمی کوردستان گەندەڵی هەمیشە هەڕەشەیەک بوە بۆ سەر سیستەم کاتێک قورسایی و نرخی تێبینییەکانی ڕەخنەگرانی بواری سیستەم بخرێنە ڕوو بە ڕونی ئەم ڕاستییە دەسەلمێنێت ،  سەرەتای چاکسازی لەنێو حیزبەکاندا باشترین ڕێگرە بۆ دروست نەبونی مەنسوبییەت و مەحسوبییەت و باڵباڵێن ،ئەمەش پێویستی بە پلاتفۆرمێکە کە بەشێوەیەکی کرداری هەنگاوی بۆ بنرێت ،بێ گومان حیزبێکی تەندروست هۆکارە بۆ حکومڕانییەکی تەکنۆکرات  ،چونکە کاتێک حیزبێکی سیاسی بە پلان کار بۆ نەهێشتنی خاڵە لاوازەکان و گرفتەکانی بکات بێ گومان لە دەسەڵاتیشدا  هێزی خۆی پیشان ئەدات و لە شوێنەوە دەست پێ ئەکات کە بۆ چاکسازی گرنگ و پێویستە ،لە ماوەی ڕابردوودا دەسەڵات هێندەی گرنگی بە پەردەپۆشکردنی  شکستەکانی خۆی داوە سەرباری بەکارهێنانی ناوی چاکسازی  بەڵام  هیچ کات خواستی گەیشتن بە تواناو دەرفەتی پرۆسەکەو ریفۆرمیزەکردنی نەداوە لە میانەی هەوڵ گەلێکی مەزنی زیهنی و کردارییەوە ،

لە دوای ئابوری سەربەخۆوە هەرێم ڕوبەروی دۆخێکی قەیراناوی بۆتەوە ئەتوانین بڵێین دەرەنجامێکی سەرکەوتوانەی لێ بەرهەم نەهات و ڕۆڵێکی پێشکەوتنخوازی بە سیستەمی سیاسی و ئابوری هەرێم نەبەخشی و پەیوەندییەکانی نێوان هەرێم و بەغدادی زیاتر ئاڵۆز کرد ،بە بنچینە وەرگرتنی پەیوەندییەکانی نێوان هەولێر و بەغداد لەم قۆناغەدا کە ناوچەکە لەچاوەروانی گۆڕانکاریدایە هەنگاوێکی ئەرێنییە بەرەو چارەسەری و پێویستە بەگوێرەی پاراستنی بەرژەوەندییەکانی هاوڵاتیانی هەرێم  سیاسەت بکەن ،

چاکسازی لە تەواوی سێکتەرەکان دەبێتە پێشەنگی بەدیهاتنی پرەنسیبەکانی حکومڕانییەکی تەکنۆکرات ، گەشتن بەم حەقیقەتەش بەهەموارکردنەوەی ئەو یاسایانەی کە بەهای یاساییان لەدەست داوە ئەنجام ئەدرێت بۆئەوەی بونیادی سیستەمێک بێتەدی کە کۆمەڵگای بۆرژوازی کەم بکاتەوەو نەهێڵێت ،بۆیە ئەرکی کابینەی نوێیە لەمیانی چاکسازییەوە ئەرکی خزمەتکردن و باشتر کردنی هەموان رەچاو بکات وکاری لەسەر بکات لە کەشێکی یەکساندا،

یەکێکە دیکە لە حەقیقەتەکانی ئەنجامدانی چاکسازی بەلاوەنانی سیستەمی ستونی و کارکردنە بە سیستەمی ئاسۆیی چونکە سیستەمی ستونی هەمیشە هۆکارێک بوە بۆئەوەی دەسەڵات بەشێوەیەکی دیموکراسیانە ویەکسان دابەش نەکرێت قۆرخی ئەم دەسەڵاتە بکرێت لەلایەن کەسانی پلە باڵای حیزبەکانەوە  ،بێ گومان رەچاوکردنی ئەم چاکسازییەش بۆ نێوحیزب گرنگی و ڕۆڵی خۆی هەیەو پلنیۆم و کۆنگرەکانی حیزب و هەڵبژاردنەکان بەسەرکەوتوی کۆتایی پێ ئەهێنێت ،بۆیەپێویستە حکومەتی نوێ نوێ بەشێوەیەکی بەهێز جەخت لەسەر ئەوە بکاتەوە کە بونی گەندەڵی لەتەواوی سێکتەرەکان قەدەرێک نییە هاتبێتەکایەوە ،پێویستە کابینەی نوێ هەڵوێست و سیاسەتێکی سەروتری بەرژەوەندییەکانی حیزب بە بنەماگرێ بۆئەوەی لەرێگەی گەشەکردنی دیموکراسیدا  یەکسانی بەدیبێت،

خۆبە بەرپرسیارزانینی رەوشی قەیران و گەندەڵی لەلایەن حیزبە سیاسییەکانەوە لەژێر ڕۆشنایی و هەڵسەنگاندنێکی بەرفراواندا هەوڵێکی باشە بۆ ئەوەی چۆنێتی کێشەکان رۆشنبکەنەوەو و لەگەڵیشیدا پێشنیازی چارەسەریش پێشکەش بکەن لە میانەی پلاتفۆرمێکی هاوبەشەوە بۆ ئەوەی لە دەروازەی گۆڕانکارییەکی گرنگەوە بتوانن بۆ هەر سەردەم و قۆناغێک پراکتیکی ئەو ڕیفۆڕمە بکەن کە پێویستە بۆ گەشتن بە حەقیقەتی چاکسازی.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP