پەرلەمان و شەڕی ناوخۆ!

سالار مه‌حمود - 3-03-2017 - 2443 جار خوێندراوەتەوە

سالار مەحمود

وەک هەموو یاساو بڕیارەکانی تری پەرلەمانی کوردستان چەند یاساو بڕیارێکی پەرلەمان بەمەرام بێ یان نەزانین! لە سایتی فەرمی پەرلەماندا دانەنراون، لە سەردەمی شەڕی ناوخۆدا پەرلەمانی کوردستان بڕیارێکی دەرکردوە بەڵام نەک هەر ئەم بڕیارەش پێشێل دەکرێت، بەڵکو دەقی ئەم بڕیارە لە سایتی پەرلەمانی کوردستان دیار نییەو  دەقەکەی لەبەردەست نییە. 

 

وەک چەند بڕیارو یاسایەکی تر هۆکارەکان هەرچیەک بن لەبەرژەوەندی هیچ کەس و لایەک نیە ئەم بڕیارە پیرۆزەش  لە سایتی فەرمی پەرلەماندا دانەنراوە!!  لە ڕێگەی دۆستێکەوە دەقی بڕیارەکەمان لە پرۆتۆکۆڵێکی پەرلەماندا دۆزیەوەو بۆ سود بینین و پابەندبوون لێرەدا بەندەکانی ئاماژە پێ دەکەم .

 

بڕیاری ژمارە(۱۹) لە ۱٥/۸/۱۹۹٤ لەدانیشتنێکی نائاسایی پەرلەماندا دراوەو بریتیە لە چوار خاڵ، ئەوانیش 

 

یەکەم:  هەردوو لایەنی یەکێتی و پارتی بەیانێک دەربکەن بۆ پشتیوانیکردن و پابەندبوون بە هەڵوێستی پەرلەمان لە بارەی رووداوەکانەوە، پەسەندکردنی یاداشتنامەی وەفدی پەرلەمانی کوردستان کە سەردانی شوێنی رووداوەکانی کردوە لە قەڵادزەو شوێنەکانی تر..

 

دووەم : هەردوو بەڕێزان مام جەلال سکرتێری گشتی یەکێتی و  بەڕێز مەسعود بارزانی سەرۆکی پارتی فەرمان دەربکەن بۆ هێزەکانی پێشمەرگە لە راگرتنی هەر جموجوڵ و کارێکی شەڕانگێزانە لە بەرەکان.

 

سێیەم:  کشانەوەی تەواوی هێزەکانی یەکێتی و پارتی و لایەنە کوردستانیەکانی تر لە شارەکان ولە چەند ناوچەیەکی دیاریکراو.

 

چوارەم:  لەسەر لیژنەی تایبەتمەندی پەرلەمان پێویستە چاودێری جێبەجێکردنی بەندەکانی رێکەوتن و   یاداشتی  پەرلەمانی کوردستان بکەن، بەتایبەتی  ئەوانەی ۱٥/۷/۱۹۹٤ و۱٥/۸/۱۹۹٤.

 

 لە سەردەمی شەڕی ناوخۆدا پەرلەمانی کوردستان رۆڵی گرنگی بینی  لە هێنانەدی ئاشتی و  ئاگربەست و نێوانگیریەکان. خاڵی گرنگ بە جیاوازی لە
ململانێ سیاسیەکانی ئەم سەردەمە ئەوکاتە لەسەر شاخەکان و لەناو هەندێک لە شارەکان شەڕی نەگریسی خۆ کوژیی هەبوو بەڵام پەرلەمان و پەرلەمانتاران لەناو هۆڵی پەرلەمان و بینای پەرلەمان کاری خۆیان دەکردو مانیان دەگرت و  هەوڵیان دەدا بۆ کوژانەوەی ئاگرەکە. واتە وەک ئێستا دەرگای پەرلەمان بە ساڵ دانەخراو پەرلەمان پەک نەخرا.

 

هەرچەندە ئاکام لە تێکچوونی تەواوەتی دۆخەکەدا  بینای پەرلەمان تۆپی تانک و دەبابەکانی بەعسی بەرکەوت و  لەتبوونی لێ کەوتەوە.

 

لەئێستاشداو دوای رووداوەکەی رۆژی۳/۳/۲٠۱۷ ی نێوان هێزەکانی ئەنەکەسەو شەڕڤانان.  پێویستە لایەنە کوردستانیەکان پابەندی بڕیاری پەرلەمان بن و نەکەونە داوی پیلانی دەوڵەتانی داگیرکەری کوردستانەوە کە ئەجندای خوڵقاندنی شەڕێکی نەگریسیان هەیە لەنێوان کورداندا. پابەند بوون بەو بڕیارەو سوود بینین لە هەڵەکانی رابردوو وا دەکات هەمووان زاڵببن بەسەر هەڵەشەیی و چوونە ژێر کاریگەریی ویستی وڵاتانی داگیرکەری کوردستانەوە.  هەمووان لە رووداوەکانەوە پێویستە پەند وەربگرن  لەوەی جگە لە کورد خۆی  لە ناوچەکەدا دۆستی کوردستان نییەو وڵاتان بەناو دراوسێ بەتایبەت چاویان بە پێشکەوتنەکانی هێزەکانی باشوورو رۆژئاڤا بەسەر تیرۆردا هەڵنایەت.


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP