بەپەلە

گیرو گازى چاکسازى

له‌تیف فاتیح فه‌ره‌ج - 12-07-2019 - 4867 جار خوێندراوەتەوە

 قسە کردن لە چاکسازى، هەموو کەس دەتوانێت بیکات، لێ بە کردەوە کارکردن بۆ چاکسازى خەڵکى خۆى گەرەک، لە مەوداى 28 ساڵى رابردودا کەم ساڵ هەیە باسى چاکسازى نەکرابێت، هەندێک ساڵیش پڕۆژەى گەورە بۆ چاکسازى راگەیەنراوە، بەڵام هیچى ئەو تۆ نەکراوە، لە رابردودا مەسعود بارزانى پڕۆژەى چاکسازى راگەیاند، بێ ئەوەى هیچى ئەو تۆ بکرێت، گەندەڵى و نادادى و ناجۆرى هەمیشە لە هەڵشاندا بوون و زیادیان کرد، هبچ سێکتەرێکى کۆمەڵایەتى، مرۆیى، ئابورى، سیاسى چاکسازى تیا نەکرا، لە کاتێکا هەندێکیان پێویستیانبە گۆڕینى بنەڕەتى و هەندێکیش چاکسازى ریشەییان گەرەکە، بوارى تەندروستى، کوالیتى دەرمان، گەندەڵى و بە دەیناسۆر بوونى زۆر کەس لە سایەیدا، ساڵ بە ساڵ خراپتر بووە .

لە بوارى تەندروستیدا ئێستا لە ساڵێ لەمەوبەر خراپترین،  جۆرى دەرمان، گەندەڵى ژێر بە ژێر، کۆمپانیاى ناجۆرى دەرمان و دەرمان خانە، بە نۆڕینگەکردنى هەموو شار، زیاد بوونى نەخۆشى بەتایبەت شێر پەنجە، کە بە شێوەیەکى مەترسیدار زیادى کردووە، هەموو ئەمانە " خۆزگە بە پار" ى دەوێت.

لە بوارى داگیرکردنى گردو دەشت ودەرو شاخ و داخدا، زێدەڕۆى زیادى کردووە، وڵات یەکپارچە کراوە بەتەلبەندو بە سیم دەورە دراوە ن، سەدان شوێنى گەشتیارى دەستى بەسەردا گیراوە،  ناوشارەکان خراپتر، شۆستە داگیر دەکرێت ودەفرۆشرێت، دەوڵەمەندى چەتە گەرا شوێن و زەوى فراوان داگیر دەکات، لە هەندێک شوێن ئەوانەى وەریشدەگیرێن لە برى بۆ جوانکردنى شار بە کار ببرێن، دەکرێنە کولبەى پارە پەیدا کردن، هەندێک دەوڵمەندى چەتەگەرا جوانى شارەکان دەشێوێنن و لە پێناوى پارەو گیرفاندا هیچ نامێنێ نەیکەن، حکومەتیش ملکەچ و لارە خواریانە، لێپرسینەوەو سزا نیە.

بوارى پەروەردە وێرانە، چاکسازى لەو بوارەدا و لە بوارى پەروەردەى کۆمەڵایەتى و ئاینیشدا وێرانەیەکە بۆ خۆى.

ئاسایش، پۆلیس، پێشمەرگە، دام و دەزگاکانیان، بنکەو بارەگاو چەکو چۆڵیان، پەروەردەو هەست و کەوتیان هەمووى پێویستى بە چاکسازیى ریشەییە، پێویستیان بە مەشق و راهێنانە، پێویستیان بە تازە کردنەوەو پوختە کردنە، پێویستیان بە نیشتمانى کردنە.

نەوت، گاز، کشت و کاڵ، ئاوەدانکردنەوەى گوندەکان، رێگاو بانەکان، بانقەکان و متمانەى بانقى، دورخستنەوەى دەستى حزب لە قۆرخکردنى بازاڕ بە رادەى ئەوەى بگوترێت دایبى مناڵیش بێ کۆمپانیاى حزب نایەتە وڵاتەوە، هەموو ئەمانە دەبێت کارى وردیان لە سەر بکرێت.

دروستکردنى مزگەوت، قوتابخانە، بنکەى تەندروستى شایستەو شیاو، دەبێت رێکبخرێت، لە گەڵ گەشەو زیادبوونى رێژەى خەڵک و ستاندارى جیهانیدا هاوئاست بکرێت.

هەر حکومەتێک کە دێت دەبێت کارنامەى وردى بۆ هەموو ئەمانە هەبێت، هەر حکومەتێک کە دەڕوات دەبێت بە داتاو ژمارە بە هاونیشتمانیەکانى بڵێت لە چوار ساڵى رابردودا ئەوەندەم کردووە، نیوەى ئەوەى لە کارنامەکەیدا هاتووە، بۆ نمونە 50% کە ئەمە نیشانەى سەرکەوتن نیە، لانى کەم نیشانەى نەکەوتنە.

هەمووبەڵێنەکانى لە رابردودا بۆ چاکسازى دراون، یان جێبەجێ نەکراون یان لە بیر کراون، حکومەت دەبێت سزاو پاداشت و باج و لێپرسینەوەو بڕیارى هەبێت، لە حکومەتداریدا چاوپۆشى و ڕوپارمایى و مامەو برالە نیە، ناکرێت مەسرور بارزانى لەبەر برابوون و بارزانى بوون چاوپۆشى بکات، ئەگەر کۆمپانیایەکى ماڵباتى بارزانى بۆ نمونە کۆڕەک، خۆى لە باجبدزێتەوە، ناجۆرى بکات، خزمەتى بەشدارەکانى نەکات، نابێت خزمایەتى و بەرزانى بوون ببنە هۆى پەڕینەوەى لە سزا، ناکرێت بە بیانوى کەس و کارى شەهید، پەیوەستەگى حزبى، ماستاوکردن و خۆ بردنە پێشەوە کۆمەڵگە هەلاهەلاو دابەشبکرێت.

 لە راستیدا پێویستە حکومەت پڕۆژەیەکى هەمە لایەنەى چاکسازى دابنات و بۆ چارەسەریش دەستى ئەو تیمە ئاوەڵاکات کە پڕۆژەکەو رێگە چارەکان دەنوسنو دەدۆزنەوە.


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP