حکومەتی ئەلکترۆنی

کامران ابراهیم شێروانی - 11-07-2019 - 2872 جار خوێندراوەتەوە

دوای ٩ مانگ لە گفتوگۆی چڕوپڕ، دواجار لایەنەکان گەیشتنە ئەو قەناعەتەی کەوا ئیتر بابەس بێت وە هاوڵاتیان چیتر هەوسەڵەی کۆبوونەوەی زیاتریان نەماوە، بۆیە لە ڕێکەوتی ١٠/٧ کابینەی نۆیەم سوێندی یاسایان لەبەردەم پەڕلەمانتاران خوارد  ، ئەوەی جێگەی ئومێدە کابینەیەکی پڕ لە ڕوخساری نوێ ، زۆربەی وەزیرە بەڕێزەکان بە خودی کاپتنەکەیانەوە بۆ یەکەم جارە هەلی ئەوەیان بۆ دەرەخسێت تا لەڕێگەی ئەو پێگەیی کەوا بۆیان دیاریکردوە لەلایەن حزبەکانیانەوە توانا و شایستەیی خۆیان بخەنە ڕوو، کە ئەمەش هاندەرێکی زۆر باش دەبێت بۆ ئەوەی بیسەلمێنن شایانی ئەوە شوێنەن. بە گوێرەی سیڤیەکان زۆربەی وەزیرەکان تەکنۆکراتن، هەرچەندە هەندێکیان تەکنۆکرات نین بەلام بەهەر هۆکارێک بێت لە لایەن حزبەکانیان کاندید کراون.
 بەدڵنیاییەوە هەم خودی سەرۆکی حکومەت هەمیش تیمەکەی ئەرکێکی قورسیان لەسەرشانە بۆ جێبەجێکردنی بڕگەکانی ئەم نەخشەڕێگایە

 

ئەوەی لێرەدا پێویستە هەڵوەستەی لەسەر بکرێت ووتاری بەڕێز سەرۆکی حکومەت بوو کە لە کاتی خوێندنەوەی نەخشە ڕێگای چوار ساڵی داهاتوو پێشکەشی کرد، کە نەخشەڕێگەیەکی زۆر گشتگیروو هەمە جۆر و پڕهەگبە بوو، بەدڵنیاییەوە هەم خودی سەرۆکی حکومەت هەمیش تیمەکەی ئەرکێکی قورسیان لەسەرشانە بۆ جێبەجێکردنی بڕگەکانی ئەم نەخشەڕێگایە ، لە ناو خاڵەکانی نەخشەڕێگاکەی کابینەی نۆیەمدا لە جارێک زیاتر چەمکی حکومەتی ئەلکترۆنی  بە گوێی هاوڵاتیاندا چرپێندرا، ئەگەر ئەم خاڵە واتە حکومەتی ئەلکترۆنی کاری جدی لەسەر بکرێت ئەوا دوای چوارساڵی داهاتوو، هاوڵاتیانی ئەم هەرێمە لەسەر دە، بەلایەنی کەم  هەشت بە کاپتن و تیمەکەی دەدەن. چونکە حکومەتی ئەلکترۆنی کار ئاسانی بۆ گشت چینوتوێژەکانی کۆمەلگادەکات، زۆرێک لە نووسەران و پسپۆڕانی بواری کارگێری پێناسەی حکومەتی ئەلکترۆنی دەکەن بەوەی ،بریتیە لە لە بەکارهێنانی سیستەمی زانیاری، تەکنەلۆجیایی سەردەم ، وەکو کۆمپیوتەر، انترنێت، وە هەورەها مرۆڤەکان، بە مەبەستی بەدەست خستنی چەندین ئامانجی  ستراتیجی، بەڕێوەبردن، کۆنتڕۆڵکردن،ئاسانکاری و سەرکردایەتی کردنی  ئیشوکارەکانی حکومەت لە هەموو رویەکەوە بۆ نمونە ئیش وکارەکانی حکومەت بۆ هاولاتی، حکومەت بۆ ئیش وکار، حکومەت بۆ ئیشکەر، حکومەت بۆ فەرمانبەرانی، حکومەت بۆ حکومەت و هاولاتی بۆ حکومەت و حکومەت و بازرگانەکان، چەندان ئەرکی تریش. 
حکومەتی ئەلکترۆنی ژینگەی  ئیش وکارو بازرگانی تازە زیاتر فەراهەم دەکات

 

حکومەتی ئەلکترۆنی ژینگەی  ئیش وکارو بازرگانی تازە زیاتر فەراهەم دەکات. لە رێگەی تەکنەلۆجی هاوچەرخەوە حکومەتەکان دەتوانن خزمەتگوزاری تازەو باشتر پێشکەش بکەن و گشت بەربەستەکانی جوگرافیاو کاتیەکان وەلا بنێن کە ڕێگە لە چوونە ناو بازاری یاخود بەڕێوەبردنی هاوچەرخ دەگرن کە لە سەردەمانێکی زوودا لە دونیادا ئەمانە رێگربوون. بۆیە حکومەتێکی لەم جۆرە پێویستەکی سەردەمیە دەبێت کاری جدی بۆ بکرێت، چونکە سودی دوولایەنەی دەبێت هەم هاوڵاتیان چیدی پێویست ناکات بۆ کەمترین کاری ڕۆژانەیان چەندان کاتژمێر جاوەرێی واژووی بەڕێزیک بکەن، هەمیش حکومەت دەتوانێت زۆر بە دەقیقی وە بە ووردی کارەکانی خۆی بکات، بە کەمترین تێچوو زۆرترین خزمەت بە هاوڵاتیان بگەیەنێت. ئەم کارەش مەحاڵ نیە چونکە هەم سەرۆک و هەمیش جێگرەکەی کەسانێکن حەز بەکاری ئەلکترۆنی دەکەن، بۆیە ئەوەی پێویستە تەنها ئیرادەیە  لەم  کاتەدا هەموو لایەک ئەم ئیرادەیان هەیە. 

ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP