بەپەلە

مەلا عومەری عەسری

ئەرسەلان بایز - 3-07-2019 - 7967 جار خوێندراوەتەوە


(بۆكان) شارێكی خنجیلانەی كوردستانی ڕۆژهەڵاتە. لانكەیەكی نیشتمانپەروەری و خەباتی شۆڕشگێڕانەیە. بنەماڵەی (موهتەدی) بە ڕەچەڵەك یەكێك بوون لە بنەماڵە زەنگین و نیشتیمانپەروەرەكانی ئەو شارە. كاك (سەڵاح موهتەدی) كە پیاوێكی (ڕووناكبیرو قسەپاراوو نیشتیمانپەروەر)ە برا گەورەی ئەو بنەماڵەیەیە. 

پێش ئاوارەبوون و دەربەدەرییان بە هۆی خەبات و پێشمەرگایەتییەوە، خاوەن پێگەیەكی كۆمەڵایەتی ناسراوو دیوەخانێكی بە هەڕمێنی ئەو شارە بوون. ڕۆژانە دەیان كەس دەبوونە میوانی ئەو دیوەخانە، بەندە خۆم چەندین جار لەسەر سفرەو لە خزمەتی كاك (سەڵاح) لەوێ‌ نانم خواردووە. بەپێی نەریتی سەدان ساڵەی دیوەخانی بنەماڵەكانیش كەسەكان بەپێی تەمەن لە هەڵسان و دانیشتندا ڕێزیان لەیەكتر دەگرت. بچوكەكان لەبەر گەورەكان هەڵدەسانەوە.

كاك (مەلا عومەری عەسر)ی كە پیاوێكی نیشتیمانپەروەرو قسەخۆش بوو. دۆستی نزیكی كاك (سەڵاح)و میوانی هەمیشەیی دیوەخانەكە بو، ڕۆژێك ڕوو دەكاتە كاك (سەڵاح):
-ئەرێ‌ برام… ناوو مەرتەبەیەكیش بۆ من دانانێن…؟ ڕۆژانە مردم هێندەی لەبەر هەمووان هەڵسمەوەو دابنیشمەوە.. پێم بڵێ‌ ناوم چیە..؟ تاكو بزانم لەمەودوا چۆن ڕەفتار دەكەم.

ئێمەی كوردیش سەدان ساڵە هەین و ناوو مەرتەبەیەكمان نییە، یەك پێ لەبەر هەموو نەتەوەكان، گەورەو بچوك هەڵدەسینەوە، چونكە میللەتانی دەوروبەر هەریەكەو بۆ خۆیان ناو… دەوڵەت… ئاڵایەكیان هەیە.. كەچی ئێمە هیچ. نازانم ئێمە چین…؟ سەدان ساڵ پێش ئەمڕۆش (ئەحمەدی خانی) وتوویەتی:

گەر دێ‌ هەبوا مە ئیتیفاقەك*
ڤێكرا بكرا مە ئینقیادەك

ئەگەر ئێمەش وەكو میللەتانی ناوچەكە ناوێكمان بووایە.

تكمیل دكر مە دین و دەولەت
تەحصیل دكر مە عیلم و حكمت.

دەمانزانی كەی هەڵدەسینەوەو لەبەركێ‌ هەڵدەسینەوەو كەی هەڵناسینەوە. ئێستا دەچینە هەر شوێنێك پێمان دەڵێن: ئەی بێ‌ ناو، ئەی بێ‌ دەوڵەت، بۆ دەرەوە.

(جەلادەت بەدرخان)یش هەمیشە دەیوت:

یەكێتیا كوردا بدە من، ئازادیا كوردا دەدەم وە.

لەسەر ڕیفراندۆمێك، كە مافی سادەی هەموو گەلانی دنیایە، لەیەكتر ترازاین. ڕیفراندۆمێك كە هەق بوو وەكو چەكێكی كاریگەر بۆ گفتوگۆ لەگەڵ حكومەتی عێراق بۆ ناونانی خۆمان… بۆ بوونی قەوارەیەك… لانی كەم بۆ گێڕانەوەی ناوچە دابڕێنراوەكان بۆ سەر هەرێمی كوردستان، سودمان لێ‌ وەربگرتایە. كەچی ناتەبایی لەسەر ڕیفراندۆمەكە، لەبری خێرو بەرەكەت، بوو بە مارەكەی (شێخ عوسمان)و لە گەردنی خۆمان ئاڵا. ناوچە دابڕێنراوەكانیشمان لەدەست دا.

هەقە ئیتر ناكۆكی و ناتەبایی بەس بێت… هێرشی ڕاگەیاندن كردنەسەر یەكتر بەس بێت. بەتایبەتی لە نێوان ئەندامانی مەكتەبی سیاسی هەردوو حزب. ساڵەهایە قسە بەیەكتر دەڵێین. ئەنجامەكەی لە زیان و شكستی هەردوولاو ناڕەزایی خەڵك بەو لاوە، چی بوو؟. چیمان قازانج كرد…؟ بەڵام كاتێ‌ تەبابووین سەدان كاری خزمەتگوزاریی گەورەی باشمان بۆ میللەتەكەمان ئەنجامدا. لای میللەتانیش بە چاوێكی گەورەتر سەیر دەكراین.

با بەدەر لە حزبایەتی بەرتەسك، حكومەتی هەرێمی كوردستان بكەینە (ئینقیاد)ی هاوبەشی خۆمان و میللەتەكەمان ئاسودە بكەین.

*لە هەندێ‌ شوێن لە جیاتی ئیتیفاقەك (ئیتیحادەك) هاتووە

ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP