بەپەلە

مام جەلال و كاك مەسعود لە بەغدا

ئەرسەلان بایز - 26-06-2019 - 7877 جار خوێندراوەتەوە

دوای ڕاپەڕینە شكۆدارەكەی كۆمەڵانی خەڵكی كوردستان لە ساڵی (1991). دوای كۆڕەوە یەك ملیۆنییەكە. دوای هێرشە دڕندانە بەرفراوانەكەی هێزە چەكدارە ئاسمانی و زەمینییەكەی ڕژێمی بەعسی عێراق بۆ سەر كوردستان و سەركوت كردنی ڕاپەڕینەكە و كوشتنی سەدان هاووڵاتی. دوای شەڕێكی قارەمانانەی هێزی هاوبەشی پێشمەرگەی بەرەی كوردستانی و شكاندن و ڕاگرتنی سوپای عێراق لە شاخی (ئەزمڕ)ی پشتی سلێمانی و گوندی (كۆڕێ)ی پشتی (پیرمام)، زەمینەیەكی لەبار بۆ گفتوگۆی نێوان بەرەی كوردستانی و حكومەتی عێراق هاتە ئاراوە.

چەند شاندێكی بەرەی كوردستانیی سەردانی بەغدایان كرد، لەگەڵ سەركردایەتی حیزبی بەعس و حكومەتی عێراق كۆبوونەوە. یەكێ‌ لە جارەكان ڕاسپاردەیەكی (صدام حسین)یان هێنایەوە (ئەگەر سەركردایەتی گەلی كورد ئەم گفتوگۆیەیان بەڕاستەو، دەیانەوێ‌ كێشەكەیان لەگەڵ حكومەتی عێراق چارەسەر بكەن، ئەوا پێویستە (مام جەلال و كاك مسعود بارزانی) سەردانی بەغدا بكەن و ڕاستەوخۆ لەگەڵ (صدام حسین) دابنیشن، كێشەكان لە ڕیشەوە چارەسەر بكەن).

ئەو داواكاری و ڕاسپاردەیە مشت و مڕ و قسەیەكی زۆری لەسەر كرا. هەردوو سەركردە (مام جەلال و كاك مسعود) جەسورانە بێ‌ گوێدانە مەترسییەكان، بڕیاریاندا یەك بە دوای یەك سەردانی بەغدا بكەن. لە ڕاستیشدا سەردانی ئەو دوو جوامێرە لەو ساتە دژوار و بێ‌ متمانەییەدا بۆ بەغدا جۆرێك لە (مغامرە) بوو بە گیانی هەردووكیان. 

بەڵام بێگومان ئەوان مەسەلەی نەتەوەكەیان خستبووە سەرووی هەموو مەسەلەكانی تر بە گیانی خۆشیانەوە.
بەڕێز (مام جەلال) لە پێناوی مافەكانی گەلی كورد، چاوی لە خوێنی برا و برازا سڤیلەكانی خۆی پۆشی كە لە شیرینی خەودا بە ناهەق شەهید كران. چاوی لە (182) هەزار ئەنفال و پێنج هەزار سڤیلی هەڵەبجەی شەهید پۆشی كە بە گازی ژەهراوی فڕۆكەكانی ڕژێمی عێراق خنكێنران. چاوی لە خوێنی سەدان پێشمەرگە و كادیری (ی.ن.ك) پۆشی كە بە دەستی جەللادەكانی بەعس شەهید كران و سەفەرەكەی بەغدای كرد.


برا و هاوڕێم كاك (عەدنان موفتی) لە زمانی بەڕێز (كاك مسعود بارزانی) دەگێڕێتەوە (ئەو شەوەی كە ئەبوو بۆ بەیانی سەردانی بەغدا بكەم. تا بەیانی ئەم دیوو و ئەو دیوم كرد. تەنیا چركەیەك خەو نەچووە چاوم. كەلەكەم نەكەوتە سەر تەختی خەوتنەكەم. مەرگی براكانم. خوێنی هەشت هەزار بارزانی سڤیلی بێ‌ گوناح، ئەنفالی (182) هەزار هاووڵاتی، جەستەی ژەهراوی پێنج هەزار كەسی هەڵەبجە. پەتی سێدارەو لاشەی لە خوێن گەوزاوی پێشمەرگە و كادیرەكانی پارتی، هەموویان وەكو فیلم یەك بە دوای یەك دەهاتنەوە پێش چاوم. بەڵام لە هەمان كاتدا مەسەلەی گەورەی نەتەوەكەم. بڕیاری سەركردایەتی بەرەی كوردستانی هانیان دەدام سەفەرەكەم بكەم. لەكاتی دیدەنی (صدام) و دەست خستنە ناو دەستیشی ڕووداوەكان سەر لە نوێ‌ هاتنەوە پێش چاوم. دڵم وەكو گڕكان دەكوڵا. بەڵام چی بكەم مەسەلەی نەتەوەكەم ناچاری كردم چاو لەو هەموو تاوانە گەورانە بپۆشم.

جا خەڵكینە ئێوە و ویژدانتان. منیش وەكو ئێوە دەپرسم: بەڕێزان (مام جەلال و كاك مەسعود بارزانی) لە پێناوی بەرژەوەندی نەتەوەكەیان چاویان لەو هەموو تاوانە دڕندانەیە پۆشی و (مغامرە)یان بە گیانی خۆیان كرد و چوونە بەغدا. دەستیان خستە ناو دەستی جەللادەكەی گەلی كورد. ئەی هەق نییە سەركردایەتی هەردوو حیزب (یەكێتی و پارتی) وانە لە گیانی لێبوردەیی و جەسارەت و تەبایی ئەو پانزە ساڵەی ڕابردووی ئەو دوو جوامێرە وەربگرن و پێ لە هەندێ‌ قسە و قسەڵۆكی ئەملا و ئەولا بخشێنن و چاو پۆشی لێ‌ بكەن…؟ ڕاستە هەق نەبوو ئەو جۆرە قسانەی لەو چەند ڕۆژانەی ڕابردوو كە لە زۆر لاوە وتراون بوترێت. چونكە هەرگیز هی وتن نین، هەقە سیاسی و دەزگا حیزبییەكان ڕەچاوی پێگە و كەسایەتی خۆیان و بەرامبەرەكانیان بكەن.. قسەی سیاسییانە بكەن نەك شتی تر.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP