هەواڵی ئەمڕۆ

بەپەلە

پێلن نێچیرڤان ببیته‌ سه‌روكێ هه‌رێمێ

عەلی ئۆرەماری - 20-05-2019 - 5692 جار خوێندراوەتەوە


پشتی سه‌رهڵدانا خه‌لكێ كوردستانێ ل بۆهارا 1991 ێ و ڤه‌كێشانا ده‌ستهه‌لاتێن كارگێری ل هه‌رسێ پارێزگه‌هێن كوردستانێ ژلایێ حكومه‌تا ناڤه‌ندڤه‌ ، ل 19/5/1992 ئێكه‌م پێنگاڤ و ئێكه‌م  ویستگه‌ه بوویه‌ بۆده‌ست پێكرنا قۆناغه‌كا نوی ، قۆناغا ڤه‌گۆهاستنێ ژ شه‌رعیه‌تا شۆره‌شگێری به‌رف دامه‌زراندنا حۆكمرانیه‌كا شارستانی ، ودپروسیه‌كا نه‌خریا دیموكراسیدا  و برێكا سندوقێن ده‌نگدانێ هه‌لبژاردن بۆ ئه‌نجۆمه‌نێ نشتیمانی ورابه‌رێ هه‌رێما كوردستانێ كۆ جهێ سه‌روكێ هه‌رێما كوردستانێ دگریت هاتنه‌كرن ، ،سه‌رئه‌نجام ب پێی وی سیسته‌مێ هه‌لبژاردن پێ هاتیه‌كرن، تنێ ئێكه‌تی و پارتی شیان به‌ربه‌رستا 7% ده‌ربازبكه‌ن و ببنه‌ پێكهینه‌رێن سه‌ره‌كی بۆ په‌رله‌مان و كابینا حكومه‌تا هه‌رێما كوردستانێ ، و پشتی زنجیره‌كا كۆمبوونێن دوو قولی دناڤبه‌را هه‌ردوو مه‌كته‌ب سیاسی یێن پارتی و ئێكه‌تی ئێكه‌م كۆمبوونا په‌رله‌مانی ل 4/6/1992 هاته‌ كرن و جه‌وهه‌ر نامق بۆ سه‌روكێ په‌رله‌مانی و فۆدامه‌عسوم وه‌ك ئێكه‌م سه‌روكێ جڤاتا وه‌زیران سیندا یاسایی خاند و ژبه‌ركۆ جۆداهیا ریّژه‌یا ده‌نگێن هه‌ردو به‌ربژێرێن پارتی و ئێكه‌تی بۆ رابه‌ری رێژه‌یه‌كا بچویك بوویه‌ و هه‌ر هنگی ژی گۆمان لسه‌ر پاقژیا هه‌لبژاردنان هه‌بوون ، ئه‌گه‌ر هه‌رچه‌نده‌ پشتی راگه‌هاندنا ئه‌نجامان هه‌ر خۆ لادانه‌ك ژ ئه‌نجامان بڤه‌دزین تێته‌ لقه‌له‌م دان، لێ سه‌ده‌ما ئێكێ یا نه‌دانانا رابه‌ری ( سه‌روكی ) نه‌بوونا باوه‌ریێ بوویه‌ دناڤبه‌را پارتی و ئێكه‌تی و هێشتا ترسا ئێك ودوو ژناڤبرنێ هه‌بوویه‌ ، ئه‌نجام رێك نه‌كه‌ڤتن لسه‌ر كی دێ بیته‌ رابه‌رێ (سه‌روكێ ) هه‌رێمێ ، ئه‌ف پوسته‌ بۆ ده‌مێ 13 سالان ماهه‌لاویستی و كار ب ئه‌نجامێت هه‌لبژاردنان نه‌هاته‌ كرن ، هه‌ر بڤێ ده‌ست پێكێ مرۆڤ هه‌ست بدو خالێن نه‌رینی دكه‌ت دئێكه‌م ویستگه‌ها دیموكراسیه‌تا هه‌رێمێ .

یا ئێكێ/ بێ ئه‌زموونیا پارتی و ئێكه‌تی دسیسته‌مێن دیمۆكراسی و هه‌لبژاردنان دا بزیقی یا دیاربۆ ، ڤه‌گۆهاستن ژ شه‌رعیه‌تا شۆره‌شگێری به‌رف بیناكرنا ده‌زگه‌هێن ده‌وڵه‌تێ په‌روه‌رده‌كرن و خۆ ئاماده‌كاری بۆ دڤێن  و ب بڵندكرنا درویشمێن بێ كریار نائێته‌ دی  ، و دئێكه‌م تاقیكرنێ دا ئه‌و ئێك دیاربو كۆ جۆداهی و ناكۆكیێن دناڤبه‌را ڤان دو هێزاندا ژ وێ ئێكێ مه‌زنتربوون كۆب پروسه‌یه‌كا دیمۆكراسی وبرێكا سندوقێن ده‌نگدانێ بشێن ده‌ست به‌رداری عه‌قلیه‌تا له‌شكه‌ری ببن و ملكه‌جی یاسا و ئه‌نجامێن هه‌لبژاردنان ببن و دامه‌زراوه‌یێن شارستانی ئاڤابكه‌ن ، پشتی كۆ ئه‌نجام هاتینه‌ راگه‌هاندن و ژلایێ لیژنا بلندا هه‌لبژاردنانڤه‌ ئه‌نجام هاتینه‌ ئه‌رێكرن ،لێ هه‌ر ژبه‌ر كێم ئه‌زموونیێ و ترس ژ ئێك و دوو دویر ژ عورفێن كارپێكه‌رێن هه‌لبژاردنان كۆ هێزا براوه‌یا ئێكێ دێ سه‌روكاتیا ده‌ستهه‌لاتا جێ به‌جێكرنێ كۆ جڤاتا وه‌زیرانه‌ وه‌رگریت و هێزا دووێ دێ ده‌ستهه‌لاتا ته‌شریعی و یاسادانانێ وه‌رگریت ، به‌روڤاژی ڤی عورفی هێزا ئێكه‌م كۆ پارتی بوویه‌ سه‌روكاتیا په‌رله‌مانی وه‌رگرت و خۆدێ ژێ رازی جه‌وهه‌ر نامق بۆ سه‌روكێ په‌رله‌مانی و هێزا دووه‌م كۆ ئێكه‌تی بوویه‌ سه‌روكاتیا جڤاتا وه‌زیران وه‌رگرد و فۆادمه‌عسوم سیندا یاسایی خاند وه‌ك ئێكه‌م سه‌روك وه‌زیران ل حكۆمه‌تا هه‌رێمێ ..

دوو/ هه‌ر دئێكه‌م ویستگه‌ها دیمۆكراسیه‌تێ دا ل هه‌رێما كوردستانێ ئه‌نجامێن هاتینه‌ بده‌ستڤه‌ئینان تێرا وێ ئێكێ نه‌كرن كۆ ببیته‌ پێڤه‌ر و رێكارێن پێك ئینانا كابینا حكۆمه‌تێ ده‌ست پێ بكه‌ن به‌لكۆ پشتی زنجیره‌كا كومبوونێن دناڤبه‌را هه‌ردو مه‌كته‌بێن سیاسی و پشتی رێكه‌فتنه‌كا حزبی هاتیه‌ كرن شیان پۆستان پارڤه‌بكه‌ن ، به‌روڤاژیا عورفێ سه‌ره‌ده‌ریكرنێ لگه‌ل ئه‌نجامان شنی هه‌ردو پۆست ب پێی رێكه‌فتنه‌كا سیاسی نه‌ك ده‌رهاڤێژێن هه‌لبژاردنان هاتنه‌ دابه‌شكرن ، زێده‌باری وێ ئێكێ كۆ دیسان بسقه‌تیڤه‌ په‌رله‌مان و حكۆمه‌ت هاتنه‌ دروستكرن كۆ نه‌سه‌روكێ هه‌رێمێ هاته‌دان و نه‌ژی هێزێن پێشمه‌رگه‌ی بوونه‌ هێزه‌كا نشتیمانی كۆ ئه‌ڤ دوو ئارمانچه‌ بۆ وی ده‌می ئارمانچێن سه‌ره‌كی بووینه‌ ، لێ ژ هنگی وه‌ره‌ باوه‌ریا دناڤبه‌را ڤان هه‌ردو هێزێن سه‌ره‌كی دهه‌رێمێ دا كه‌فتیه‌ دگۆمانێ دا ووێڤه‌تر ل هه‌ر هه‌لبژاردنه‌كێ دا ژی ئه‌نجامێن هه‌لبژاردنێ هند جهێ خۆناگرن حه‌تا رێكه‌فتنه‌كا حزبی دناڤبه‌را ڤان هه‌ردوو حزباندا نه‌ئێته‌كرن هیچ رێكاره‌كا مجد بۆ پێكهێنانا حكۆمه‌تێ ده‌ست پێ ناكه‌ت ، ئه‌ڤ یه‌كه‌ژی بوو دیارده‌كا دووم درێژ و بدرێژیا بیست و حه‌فت سالێن حۆكمرانیا هه‌رێما كوردستانێ یا به‌رده‌وامه‌ .

پشتی بوورینا 13 سالان ژ مانه‌ڤه‌یا هه‌رێما كوردستانێ بێی پۆستێ سه‌روكێ هه‌رێمێ و بهه‌ڤده‌می لگه‌ل رزگاركرنا عیراقێ و ئه‌رێكرنا دستورێ عیراقێ ل 2005ێ وب پێی دستۆر ده‌بیت سه‌روك كۆمار بۆ عیراقێ بێته‌ دانان و رێكه‌فتنا لایه‌نێن عیراقێ كۆ پۆستێ سه‌روك كۆماری به‌ر ب كوردان دكه‌ڤیت و دیارترین سه‌ركردێ كورد كۆ ڤی پۆستی وه‌ربگریت دێ بره‌حمه‌ت بیت مام جه‌لال بیت ، شنی و ئه‌گه‌ر دراست گۆبین دیسان سه‌ده‌مێن بێ باوه‌ریێ وه‌لێكر بیر ل زێندیكرنا پۆستێ سه‌روكێ هه‌رێمێ بێته‌كرن ، جاره‌كا دی لبن په‌رده‌یا پاراستنا باوه‌ریێ وپاراستنا به‌لانسا سیاسی دهه‌رێمێ دا درێكه‌فتنه‌كا دوولایه‌نیا هه‌ردو مه‌كته‌بێن سیاسی دا رێكه‌فتن كۆ ل هه‌رێما كوردستانێ ژی پۆستێ سه‌روكێ هه‌رێمێ بێته‌دانان و ماده‌م مام جه‌لال ل به‌غدا دێ سه‌روك كۆماربیت ئه‌ڤه‌ ده‌بیت مه‌سعود بارزانی ژی ل هه‌رێمێ سه‌روكێ هه‌رێمی بیت و ئه‌ف رێكه‌فتنه‌ بڤی ڕه‌نگی هاته‌جێ به‌جێ كرن ،

ئێدی ئه‌ف جۆره‌ رێكه‌فتنه‌ ئه‌گه‌ر رێكه‌فتنه‌كا نهێنی و زاره‌كی بیت ژی بۆ نه‌ریت و ل 2007ێ ژی رێكه‌فتنه‌كا ئیمزاكری بناڤێ رێكه‌فتنا ستراتیجی دناڤبه‌را جه‌نابێ مام جه‌لال و جه‌نابێ بارزانیدا هاته‌ ئیمزاكرن ، زێده‌باری وان خالێن دبه‌رژه‌وه‌ندیا ئارام راگرتنا هه‌رێمێ و پاراستنا ئێك ده‌نگی و ئێك هه‌لویستیا پارتی و ئێكه‌تیێ دا ، هه‌ردو ئالی رێكه‌فتن بۆ شۆركرنا خال و به‌ندێن ڤێ رێكه‌فتنێ بۆ ناف ئۆرگانێن هه‌ردو پارتیان و ڤه‌ره‌ڤاندنا ئاسه‌وارێن دوو ئیداره‌یێ و شه‌رێ نافخۆ ، لێ مخابن نه‌رێكه‌فتن شۆربو ناف ئۆرگانێن هه‌ردو ئالیان نه‌ هیچ خال و به‌نده‌كا ڤێ رێكه‌فتنێ ئه‌وا دبه‌رژه‌وه‌ندیا به‌لافكرنا گیانێ هه‌ڤوه‌لاتیبوونێ و بیاسایكرن و بده‌زگه‌هیكرنا ده‌زگه‌هێن حكۆمه‌تێ دا هاتنه‌جێ به‌جێ كرن ، تنێ ئه‌وا په‌یوه‌ندی ب پوستێ سه‌روك كۆمار و سه‌روكێ هه‌رێمێ ڤه‌ به‌رده‌وامی بخۆڤه‌ دیت ، كۆ پشتی گه‌را ئێكێ یا سه‌روك كۆماری بدوماهیك هاتی ژی و دوباره‌ رێكه‌فتن لسه‌ر خۆلا دوێ ژی هاته‌كرن كۆ دیسان مام جه‌لال ببیته‌ سه‌روك كۆمار ، ل هه‌رێمێ ژی ئه‌و رێكه‌فتن هه‌ر به‌رده‌وام بۆ و ڤێجارێ بده‌نگدانا خه‌لكی و بپشته‌ڤانیا راسته‌وخۆیا مام جه‌لال ، مه‌سعود بارزانی بۆ سه‌روكێ هه‌رێمێ ، تا ڤێره‌ چ برێكه‌فتن بیت یان ب ژیوارێ هێزێ بیت كۆ پارتی و ئێكه‌تی دوو هێزێن سه‌ره‌كی بووینه‌ ئه‌ڤ دووپوسته‌ بڤی ڕه‌نگی هاتنه‌ برێڤه‌برن ، لێ پشتی تمام بوونا گه‌را دووێ یاسه‌روك كۆماری و ب پێ ده‌ستور نابیت كه‌سه‌ك ژ دوو خۆلا زێده‌تر دڤی پۆستی وه‌ربگریت ، گه‌را مام جه‌لال بدوماهیك هات ، لێ دهه‌رێمێ دا ل 2013ێدا كه‌ پۆستێ سه‌روكێ هه‌رێمێ ژی ل 19/8 بدوماهیك تات ، لێ ئه‌وا هاتیه‌ دیتن ئه‌وبوویه‌ كۆ پارتی رازی نینه‌ كه‌سه‌كێ دیتر ژبلی بارزانی ببیته‌ سه‌روكێ هه‌رێمێ و هه‌ر بیانوویه‌كا هه‌بیت ژی هه‌ر دیسان ئارمانج وێ دهنگێڤیت كۆ كه‌سه‌كێ دیتر نابیت ببیته‌ سه‌روكێ هه‌رێمێ و سه‌رئه‌نجام 30/6/2013ێ به‌ری تمامبوونا گه‌را دووێ یاسه‌روكێ هه‌رێمێ دوو سالێن دیترژی بۆ هاتنه‌ زێده‌كرن وڤی پۆستی درێژی بخۆڤه‌ دیت دكه‌سایه‌تیا هه‌مان سه‌روكێ هه‌رێمێ دا تا 2015 و كارگه‌هشتیه‌ لێكترازانا هێزێن سیاسی و هه‌ر ژ ڤه‌رێژا ناكوكیان لسه‌ر پۆستێ سه‌روكێ هه‌رێمێ  ، سه‌روكێ په‌رله‌مانی كۆ ژ پشكا گۆان بۆ هاته‌ دویرئێخستن و تا ب ئه‌نجام گه‌هاندنا ریفراندۆما سه‌ربه‌خۆیا هه‌رێما كوردستانێ به‌رێز بارزانی وه‌ك سه‌روكێ هه‌رێمێ به‌رده‌وام بو ، پاشان ب بریاره‌كا كه‌سی پشتی ریفڕاندۆمێ ده‌ست ژكاركێشانا خۆ راگه‌هاند و ده‌ستهه‌لاتێن خۆ ب یاسایه‌كا په‌رله‌مانی دابه‌شی سه‌روكێ جڤاتا وه‌زیران و سه‌روكاتیا په‌رله‌مانی كرن .

ل ڤێره‌ و پشتی بورینا 13 سالا بسه‌ر ده‌ست بكاربوونا ئێكه‌م سه‌روكێ هه‌رێمێ كۆ بدانانا سه‌روكێ هه‌رێمێ و بهه‌بوونا ده‌ستهه‌لاتێن رهایێن ژبۆ هاتینه‌ دانان كۆ گه‌زو مه‌قه‌س دده‌ستێن سه‌روكێ هه‌رێمادابوون ، و هه‌لبه‌ت ژی بدانانا به‌رێز بارزانی وه‌ك سه‌روكێ هه‌رێمێ هیڤی یێن مه‌زن سه‌ر هاتبوونه‌ ڕاچاندن كۆ پشتی ده‌ست بكاربوونا وی و ماده‌م رێكه‌فتنه‌كا دووقولی ژی لسه‌ر هه‌یه‌ دناڤبه‌را پارتی و ئێكه‌تی ئه‌ڤه‌ بێی دوو دلی دێ دوماهیكێ ب شینه‌وارێن شه‌رێ نافخۆ و دوو ئیداره‌ی ئێته‌دان و هێزێن پێشمه‌رگه‌هی كۆ هێزێن هه‌ردو پارتیانه‌ دێ دئێك وه‌زاره‌تا نشتیمانیا پێشمه‌رگه‌یدا ئێنه‌ خڕڤه‌كرن و دیبلۆماسیه‌تا هه‌رێمێ ژ په‌یوه‌ندییێن حزبی دێ بنه‌ په‌یوه‌ندیێن نشتیمانی و رێكه‌فتن و پێنگاڤێن ئابۆری دێ چنه‌ دقالبه‌كێ یاسایی دا و سه‌روكێ هه‌رێمێ دێ سه‌روكێ هه‌می كوردستانێ بیت و دێ ب ئێك چاڤ سه‌حكه‌ته‌ هه‌ر تاكه‌كی دڤێ هه‌رێمێ دا و ئه‌ف پۆسته‌ دێ بیته‌ په‌ناگه‌هه‌ك بۆ هه‌ر وه‌لاتیه‌كێ كورد ل زاخۆبیت یان ژی سه‌یدسادق و خانقین بیت .لێ مخابن لجهێ ئه‌ڤ پۆسته‌ شانازیه‌كێ بۆ هه‌رتاكه‌كێ كورد دروست بكه‌ت و هه‌ر كه‌سه‌ك سه‌روكێ هه‌رێمێ بسه‌روكێ خۆ بزانیت دێ بینین لبن فشارومه‌قه‌سه‌كا حزبی هاته‌ دورپێچكرن و ئه‌ف پۆسته‌ بۆ سیۆانه‌ك كۆ زوربه‌یا قه‌یران وده‌ردێن هه‌رێمێ خۆ لبن بڤه‌شێرن .

بده‌ربازبوونا سێزده‌سالا بسه‌ر پۆستێ سه‌روكێ هه‌رێمێڤه‌ نه‌ك تنێ ئه‌ف هیڤی یێن هه‌نێ نه‌هاتنه‌ دی ، به‌لكۆ دهنده‌ك بیاڤاندا ڕه‌خنه‌یێن مه‌زن ژی لێ تاتنه‌كرن ، وه‌ك كه‌س نه‌ من و باوه‌رم مه‌سێ ژی گۆمان نینه‌ كۆ به‌رێز بارزانی سه‌ركرده‌یه‌كێ كاریزمایه‌ و ب ئه‌زموونه‌ و هێزو ئیلهاما كه‌سایه‌تیا خۆ ژ بارزانی یێ باب وه‌ردگریت و بدرێژیا ته‌مه‌نێ خۆ وه‌ك پێشمه‌رگه‌هه‌ك و سه‌ركرده‌ و سیاسیه‌ك بوراندیه‌ ، لێ ئه‌و به‌شا ڕه‌خنه‌ لێ تێته‌كرن كۆ نه‌شیایه‌ ببیته‌ سه‌روكێ هه‌می پارچێن هه‌رێمێ و ب ئێك چاڤ ل وه‌لاتیان بنێریت ، ب مخابنیڤه‌ نه‌تنێ ئه‌و هیڤی و ئارمانج نه‌هاتنه‌دی ، نه‌دووئیداری بداوی بینیت و نه‌هێزێن پێشمه‌رگه‌هی ئێكگرتن و نه‌ژی دیپلوماسیه‌تا هه‌رێمێ شیا خۆ ژقه‌یدو به‌ندێن حزبی و بنه‌مالێ رزگاربكه‌ت و نه‌ژی ئه‌و ده‌ستهه‌لاتێن رهایێن سه‌روكێ هه‌رێمێ ب دادپه‌روارانه‌ بسه‌ر هه‌می وه‌لاتیێن ڤێ هه‌رێمێ هاتنه‌ بكارئینان و حزبیكرنا وه‌لاتیان تا به‌ر ده‌رێ كۆچكا سه‌روكاتیا هه‌رێمێ ژی ب ئاشكه‌را و بزیقی هه‌بوویه‌ و تا ئیمزاكرنا بریاره‌كێ ژی لایه‌نێ حزبی یێ په‌یوه‌ندیار ب ئاشكه‌رایی حزورا خۆ هه‌بوویه‌ ، هه‌لبه‌ت پشكا مه‌زنا نه‌جێ به‌جێكرنا ڤان هیڤیان و رێ وونداكرن لبه‌ر سه‌روكێ هه‌رێمێ پارتی بوویه‌ و ئه‌و ده‌سته‌یا لگه‌ل سه‌روكێ هه‌رێمێ هاتیه‌ دانان كۆ لجهێ رۆلێ راێژكاره‌كێ خه‌مخۆرێ نشتیمانی ببینن ، مخابن هه‌می كه‌یس ب به‌رگه‌كێ حزبی پێچاینه‌ و سه‌رئه‌نجام سێزده‌سالێن سه‌روكێ هه‌رێمێ بدوماهیك هاتن لێ ئێك ژ وان ئارمانجێن هه‌ر وه‌لاتیه‌كی بخۆ داناین كۆ دته‌مه‌نێ سه‌روكێ هه‌رێمێدا دێ جێ به‌جێ بن و ئێدێ پێویست ناكه‌ت وه‌لاتیه‌كێ نه‌پارتی بیت ژخۆ بترسیت كۆ چاكیێن سه‌روكی ژوی ناگریت .

دنهۆداو دئان و ساتێن پێك ئینانا كابینا نه‌هێ و ده‌ست بكاربوونا به‌رێز نێچیرڤان بارزانی وه‌ك سه‌روكێ هه‌رێمێ ، هه‌لبه‌ت دیسان هیچ گۆمانه‌ك تێدا نینه‌ كۆ به‌رێزنێچیرڤان ژی كه‌سه‌كێ خۆدان سه‌ربۆرو ده‌وڵه‌ت داره‌و بدرێژاهیا هه‌شت كابینه‌یێن حكۆمه‌تا هه‌رێمێ بیست و دوسالێن سه‌روكاتیا حكۆمه‌تێ به‌ر وی كه‌فتینه‌ و ئه‌زموونه‌كا مه‌زن یابۆ جێ بووی ، لسه‌ر ئاستێ نافخۆ و هه‌رێماتی و جیهانا ده‌رڤه‌ كه‌سه‌كێ به‌رنیاس و دیاره‌ و ئه‌گه‌ر كا چه‌وان پارتی وه‌ك حزب رێ لبه‌ر ده‌م بارزانیێ مام ونداكر و ئه‌و شه‌نس ژێ وه‌رگرت كۆ بشێت ب ئه‌ركێ خۆیێ دروست راببیت وه‌ك سه‌روكێ هه‌می هه‌رێمێ لجهێ تنێ ده‌ستهه‌لاتا وی بۆ ده‌ڤه‌رێكێ بیت ، ئه‌ڤه‌ بێی دوو دلی ده‌لیڤێن وێ چه‌ندێ یێت هه‌ین و ئه‌ز باوه‌رم هه‌می پارتیێن دهه‌رێمێدا ب ئێكه‌تیێ ڤه‌ ژی ئه‌و ئاماده‌یی یا تێدا هه‌ی نێچیرڤان بارزانی بسه‌روكێ خۆ بزانیت و ژبۆ هنگافتنا ئارمانجێن نه‌هێلانا ئاسه‌وارێن دوو ئیداریێ و ئێكگرتنا هێزێن پێشمه‌رگه‌ی و بنشتیمانیكرنا په‌یوه‌ندیێن دیپلوماسی هه‌می هێزێن سیاسی پشته‌ڤانن ، لێ مه‌رجێ ئێكێ و دووماهیكێ ئه‌وه‌ هه‌م پارتی بیر ل وێ ئێكێ نه‌كه‌ت كۆ نێچیرڤان ژی دفه‌له‌قا حزبیدا قه‌دیس بكه‌ت و لجهێ وێ ئێكێ مه‌زنتر ببینیت ژ سه‌ركرده‌كێ حزبی وه‌ك سه‌روكێ هه‌رێمێ بده‌ته‌ نیاسین و خۆدێ نێچیرڤان بخۆژی خۆ نه‌ئێخیته‌ دداڤا هنده‌ك ماستاوجیێن حزبیدا و ب ئێك چاڤ ل وه‌لاتیێن هه‌رێمێ بنێریت و هه‌ر د ئێكه‌م پێنگاڤا ده‌ست بكاربوونا خۆدا وان ئارامانجێن لسه‌ر ده‌مێ سه‌روكێ مام جێ به‌جێ نه‌بووین بكه‌ته‌ به‌رنامه‌ و ئارمانجێن ستراتیجی و كاری لسه‌ر بكه‌ت ، ئه‌گه‌ر هه‌رچه‌نده‌ ئێكه‌م تێَستا نێچیرڤان وه‌ك كاندید بۆ ڤی پوستی ب بریارا بڤالاكرنا سه‌روكاتیا هه‌رێمێ ژ كادرێن حزبێن دیتر بتایبه‌ت بریارا ڤه‌گۆهاستنا هه‌ر چ كادرو كارمه‌نده‌كێ سه‌ر ب ئێكه‌تیێ ڤه‌ بۆ ده‌رڤه‌ی دامه‌زراوه‌یا سه‌روكاتیا هه‌رێمێ گۆمانه‌كێ دروست دكه‌ت كۆ سه‌رده‌مێ سه‌روكاتیا نێچیرڤان ئه‌گه‌ر یا ده‌رمارگیرترنه‌بیت ره‌نگه‌ چ یاجۆداژی نه‌بیت ژ سه‌روكاتیا بارزانیێ مام و ئه‌ف یه‌كه‌ ڤه‌گه‌راندنه‌ بۆ چارگۆشه‌یا 92ێ و تشته‌كێ دیتر نابیت .

له‌وان پارتی به‌ری هه‌ر هێزه‌كا دیتر یاداخازكریه‌، پێلن بلا خه‌لكێ كوردستانێ مفایی ژ ناسیاری و كه‌سایه‌تیا نێچیرڤان بارزانی ببینن و پێلن بلا بارزانیێ برازا سنۆرێن ده‌ڤه‌رێ و حزبی ده‌ربازبكه‌ت و پێلن بلا ببیته‌ سه‌روكێ هه‌رێمێ نه‌ك سه‌روكێ هه‌رێما پارتی.


ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP