بەپەلە

عەیب ئەوەیە کاندیدی سەرۆکی هەرێم بیت لەئێستادا

دەلیل جەمال - 13-05-2019 - 12081 جار خوێندراوەتەوە

دوای هەموارکردنەوەی یاسای سەرۆکایەتی هەرێم و هەڵبژاردنی سەرۆک لەناوپەرلەمان بە دەنگی زۆرینەی پەرلەمان(٥۰+۱) و ڕێککەوتنی نێوان لایەنە بەشداربووەکانی حوکمەت(یەکێتی،پارتی،گۆڕان) و یەکلابوونەوەی ئەو پۆستە بۆ کاندیدی پارتی کە نێچیرەوان بارزانییە هەرکەسێکی دیکە خۆی کاندید بکات جگە مەهزەلەو هەنگاوێکی پڕلە خۆ خەڵەتاندن لەژێر ناوی (ئەوەتا کاندیدمان هەبوو گرنگ ئەوەیە ڕکابەری کاندیدی پارتی بووین، گەرچی سەددەرسەد دەمانزانی دەرناچین ) ئەمە قسەیەکی زۆرناسیاسی و بێ ناوەڕۆکە لایەنی سیاسی خۆی ناخاتە ئەو حاڵەتەوە تەنها بۆناوو هەواڵی میدیایی 

هێزەکانی دەرەوەی دەسەڵات و چی؟

هێزەکانی دەرەوەی دەسەڵات کەتا ئێستا یەکنین و هیچ بەرنامەیەکی گشتگیرو ستراتیژیان بۆئەم قۆناغە نییە و بگەرە هێندە لەیەکتر دەخوێنن و یەکتر دەهاڕن هێندە نەیانتوانیوە کۆدەنگ و یەک هەڵوێستبن. چ جای کاندید یان هەبێت بۆ سەرۆکی هەرێم تەنها بۆ ئەوەی بڵێن دیموکراسیەتە ،پێموایە گرنگتر لەوە نزیک بوونەوەو گفتوگۆیانە بۆ بەرنامەیەکی هاوبەش نەک بۆ شتێک کەهیچ ماناو دەلالەتێکی جەوهەری نییەو نابەخشێت (من دژی ڕکابەرنیم بەڵکو دەڵێم ئێوە بە ۲۰دەنگ کەمتر یان زیاتر کەی ئازایەتییە)

کاتێ دەتان توانی نەتان کرد

کاتێک پارتی زۆرینەی پەرلەمانی نەبوو کاتێک پارتی ڕێککەوتن و سازانی لەگەڵ یەکێتی و گۆڕان نەبوو نەتان توانی ڕێککەون و ڕکابەری کاندیدی پارتی بن بگرە بەشێکتان ئەسڵەن پێش کات ڕاتان گەیاند کاندیدتان نابێت ، جائێستا چ باسە ؟ 

تەنانەت یەکێتی و گۆڕانیش ناتوانن

هەڵبەت ئێستا پارتی بەبێ دەنگی یەکێتی و گۆڕانیش دەتوانێت  کاندیدی خۆی سەربخات چونکە ڕێککەوتنەکەی نێوان پارتی وگۆڕان یان ڕونتر بڵێم پڕۆژە یاساکەی پارتی وگۆڕان تەواوی دەرگاو هیواکانی بۆڕکابەری کاندیدی پارتی داخست، زۆرینەی پەرلەمانی لای پارتییەو بڕیەوە گۆڕان خۆی و ئەوانی تریشی دەست و دەم و قاچ بەستراو کردوو کۆتایی بەوە هێنا گشتیان ببن بەیەک هیچ نابەخشێت 

ئەوەی ماوەتەوە ئەم قۆناغە بکەنە دەرفەتێک بۆ کاری هاوبەش و پێکەوەیی بۆ ئایندەو کاری پەرلەمانی، لێگەڕێن لە موزایدەو خۆهەڵواسین بە کارێکدا لەدەستان دەرچووەو هیچ لەبابەتی پارتی ناگۆڕێت ،بگرە پارتی پێتان دەڵێت( ئەوە عەرزو ئەوە گەز).

عەیبەیەکی گەورەیە لەئێستادا خۆت کاندید بکەیت لەناو پەرلەمان بۆسەرۆکی هەرێم دژی کاندیدی پارتی حەق نییە خۆتان و خەڵکیش لەگێلی بدەن بەناوی چالاکی دژی پارتی، بونی کاندید لەم پەرلەمانەو بۆ سەرۆکی هەرێم نەزانییەو کات کوشتنە، پێمان خۆشبێت یان نا پەرلەمان لەڕێگەی زۆرینەوکەمینەوە تەنها بۆپارتی ڕۆژی خۆیەتی ، باشترین ڕێگاش سازان و تەوافوقە لەم قۆناغەدا.

کەسی ژیرو سیاسی ناچێتە ناو فەزای پۆپۆلیستی و سورەی میدیایی و بۆناوهێنان کەسی ژێر یان لایەنی سیاسی بەبەرنامەو ڕوئیای ڕوون لەئاوێکدا مەلەناکات دڵنیابێت لەخنکان ،ئەم قۆناغە باتێ پەڕێت و قۆناغێک هاتەپێش و توانیتان یان بچوکترین هیوا هەبوو بۆسەرکەوتن ئەوکات ڕێکبکەون لەبری ڕێککەوتن ودانیشتن لەسەر کاندید بۆسەرۆکی هەرێم حەتا سەرۆکی حوکمەتیش فەرموون ڕێککەون لەسەر بەرنامەو کاری هاوبەش .ئەم بابەتە سۆزو قسەی لابەلاو ڕق نییە بەڵکوو پەیامێکی ڕاست وحەقە باتاڵیش بێت.

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP