پێویستی بە شهادە نیە

عوسمان گوڵپی - 9-05-2019 - 3400 جار خوێندراوەتەوە


یەكێك لە كێشەكانی ئەم هەرێمە ئەوەیە كەنازانین چیمان دەوێ و لەسەر چی بەدەنگ بێین، بۆیە هیچ ئامانجێكمان نەپێكاوە

دوو ڕۆژە نەبونی بڕوانامە تەواوی تۆڕی كۆمەڵایەتی و تیڤیەكانی داپۆشیوە، وەك بڵێی تاوانێكی گەورە و شتێكی سەیرو سەمەرە ڕووی دابێ
لە ڕاستیدا هەر پۆستێكی سیاسی كە ئیختیساسی نەبێت هیچ پێویستی بە مەرجی شهادە نیە چونكە گەورە و بچوكی پۆستەكان مەرجی بونی شهادە نین بەڵكو زەرویەتی كارەكە ئەوە واجب دەكات، بۆ نمونە بەڕێوبەری ناحیە پێویستە هەڵگری بڕوانامەی یاسا بێت ، بەڵام قایمقام هەرچەن لە ڕووی ئیداریەوە باڵاترە بەڵام ئەو مەرجەی نیە ، دەسەڵاتی تەشریعی كە پەرلەمانە بڕوانامەی نەكردۆتە مەرج كە من ئەوەیان بەگرنگتر دەزانم بۆ مەرجی بڕوانامە چونكە یاسا دانانە.
ئەم بابەتەی من پێوەندی بە بەرگری كردنەوە نیە بەو یاسایەی دوێنێ و سەرۆكی هەرێمەوە چونكە ئەوەی لای من گرنگە لەو پۆستە باڵایانەدا بونی شەهادە نیە

 

ئەم بابەتەی من پێوەندی بە بەرگری كردنەوە نیە بەو یاسایەی دوێنێ و سەرۆكی هەرێمەوە چونكە ئەوەی لای من گرنگە لەو پۆستە باڵایانەدا بونی شەهادە نیە، خۆ گەر هەشبێ ئاساییە، هەر بەڕاست هاوڵاتیان شهادەی سەرۆكی هەرێم چی لێ بكەن ؟ چ سودێكی هەیە؟ گریمان شهادەی هەبوو ئەندازیار بوو، چی لە مەسەلەكە دەگۆڕێ ؟.

من دەڵێم بەڵێ پێویست بە بونی شهادە ناكا و تەنها خاوەنی ویژدانێكی ساغبێ بەسە ، هیچ پسپۆڕیەكی پێویست نیە، تەنها عادلبێ بەسە، سیاسەتێكی دروستی هەبێ و بە ئەخلاقەوە مامەڵە بكات هیچیتری ناوێ ، مرۆڤێكی دەستپاكبێ بەسە، سەرۆك ڕێزی خەڵك و خاك و پێگەكەی بگرێ شهادەی بۆ چیە، مەرجی هەر هەنگاو و بڕیارێكی بەرژەوەندی خەڵكبێ ئەوە گرنگە.
ئەگەر مەرجی شهادە هەبێ ئەوە بۆ ئەوانەی دەیانەوێ ببن بە سەرۆك زۆر ئاسانە، چونكە زۆر سەرۆكی زانكۆ هەن تەنها لەبەر خاتری بینینێكیان چ شهادەیەكیان بوێ بۆیان ئیمزا دەكەن

 

ئەگەر مەرجی شهادە هەبێ ئەوە بۆ ئەوانەی دەیانەوێ ببن بە سەرۆك زۆر ئاسانە، چونكە زۆر سەرۆكی زانكۆ هەن تەنها لەبەر خاتری بینینێكیان چ شهادەیەكیان بوێ بۆیان ئیمزا دەكەن، كەمن ئەو مەكتەب سیاسیانەی بونەتە خاوەن بڕوانامە بەبێ دەوام و غیابات و سەعی كردن، كەمن ئەو دكتۆرانەی زانكۆ بە ڕێگەی لار و لوێر و واستەی بەرپرسە بێ شهادەكان پلەی زانستیان وەرگرتوە، چەند عەمیدی زانكۆ بە حەقی خۆیان عەمیدن، لەگەڵ ڕێزم بۆ ماندوانی ڕێگەی زانست و مامۆستاكانمان كە شەونخونیان بۆ بەدەستهێنانی ئاستێكی باڵای خوێندن كێشاوە ، شهادە و خوێندن و بەدەست هێنانی بڕوانامەی باڵا گرنگە بەڵام هموشت نیە
 من سەرۆكێكم دەوێ تەنها بزانێ بخوێنێتەوە و باش بنوسێ و گوێ بگرێ بەسە

 

بەڵێ من سەرۆكێكم دەوێ تەنها بزانێ بخوێنێتەوە و باش بنوسێ و گوێ بگرێ بەسە، بەومەرجەی وڵات لە سایەیدا ئارامبێ و خۆشگوزەرانی هەبێت، ئێمە كەی باجی نەبونی شهادە دەدەین، مەرجیش نیە هەركەس شهادەی نەبوو ڕۆشنبیر نەبێ یان خوێندەوار نەبێ، ئاخر گەندەڵی چ حەقی بەسەر شهادەوە هەیە؟ ئێمە باجی گەندەڵی دەدەین.
سەدان خاوەن شهادە قوربانی ئەو بێ شهادەیە بن كە لە خۆپیشاندانێكدا هاوار لە پێناو مافەكانیدا دەكات

 

سەدان خاوەن شهادە قوربانی ئەو بێ شهادەیە بن كە لە خۆپیشاندانێكدا هاوار لە پێناو مافەكانیدا دەكات، لە خۆپیشاندانەكانی مامۆستایاندا چایچیەك كە شهادەی نەبوو لەگەل من و چەندین مامۆستایتر دەستگیركرابوو لەسەر بەردەوامی ناڕەزایی ! كەچی چەندین خاوەن شهادەی بەرز تەماشایان دەكردین لە كاتێكدا داوای موچە و مافی ئەویشمان دەكرد و وەزیری پەروەردەش دكتۆر بوو ! كاری باش و سەرخستن و هەڵوێست وهەنگاونان بۆ بەدەستهێنانی ماف شهادەی ناوێ تەنها مرڤێكی ساغی دەوێ بۆیە شتی زۆر گرنگ هەیە لەسەری بوەستین و بیری لێ بكەینەوە ، چونكە تا نەزانین لەسەر چی دەوەستین و كێشەكانمان چین و چیمان دەوێ ناتوانین هیچ هەنگاوێكی دروست بنێین و داهاتوش بە نادیاری دەمێنێتەوە و سەرئێشەی بێ مانا بۆ كۆمەڵگە دروست دەكەین

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP