خێڵ و خوێن گرفتی پەروەردە و پێکەوە ژیان

پەیکار عوسمان - 28-04-2019 - 2303 جار خوێندراوەتەوە

خێزان لە تاکی ئازادەوە، کۆمەڵگاو سیاسەتیش لە خێزانی مەدەنییەوە دیموکراتیزە ئەکرێن، لەناو کولتوری (خێڵەکی دینی)شدا، تاك هەر مەوزوع نیەو  یارییەکە یەکسەر لە خێزانەوە دەستێئەکات!.
لە غیابی تاکیشدا، خێزان دامەزراوەیەك نیە سەربە ئازادی

 

لە غیابی تاکیشدا، خێزان دامەزراوەیەك نیە سەربە ئازادی، بەڵکو سەربە جەبری کۆمەڵگایەو  کۆمەڵگاکەش پیاوسالارە، ئیتر خێزانیش دامەزراوەی باوك و کوڕە.

ئا لێرەوەیە کە حیزبی ئێمە، لەبری سەرۆك (باوکی سیاسی) هەیەو دواتریش ئەبێ بە هی کوڕ. 

 عەقڵیەتی خەڵکیش ئامادەیە بۆ هەزمکردنی  ئەو حاڵەتە، چونکە شتێکی نائاسایی ڕووینەداوە

 
ئا لێرەوەیە کە عەقڵیەتی خەڵکیش ئامادەیە بۆ هەزمکردنی  ئەو حاڵەتە، چونکە شتێکی نائاسایی ڕووینەداوە، هەر ئەوەیە ڕوویداوە کە ڕەنگدانەوەی واقعی کۆمەڵگایە!. (جا بۆئەوەی ئەو واقعە سیاسییە بگۆڕین، ئەبێ واقعە کۆمەڵایەتییەکە بگۆڕین.)

کۆمەڵگای دیموکرات تاکەکانی ڕابیتەی هاوڵاتیبوون پێکیانەوە ئەبەستێ و یاسا حەکەمە

 
کۆمەڵگای دیموکرات تاکەکانی ڕابیتەی هاوڵاتیبوون پێکیانەوە ئەبەستێ و یاسا حەکەمە، کۆمەڵگای خێڵەکی ڕابیتەی خوێن پێکیانەوە ئەبەستێ و نەریت حەکەمە، تا پاشەکشێ بە نەریت نەکرێ لەبەرژەوەندی یاسا، هاوڵاتیبوون و دیموکراسی نایەتە گۆڕێ.  

تۆ کە بەمدەس چەك ئەبەخشیتەوەو بەودەس خێڵ ئەبوژێنیتەوە، ئەم دووانە کۆکەرەوە ڕێك ئەکاتە کوشتن و دوژمنداری! چونکە لە نەریتی خێڵدا پەنابردن بۆ یاسا لاوازیی و عەیبەیەو کاری دروست و نەریتیی ئەوەیە کە بە دەستی خۆت تۆڵەی خۆت بکەیتەوە. (یەعنی خێڵ و سەروەری یاسا پێکەوە ناگونجێن و تۆ ئەبێ یەکێکیان سەروەرکەیت.)

خێڵ و خوێن یەکێکە لە ئەستورترین دەمارەکانی دەمارگیری

 
خێڵ و خوێن یەکێکە لە ئەستورترین دەمارەکانی دەمارگیری، پێکەوەژیانیش یەعنی خاوکردنەوەو کاڵکردنەوەی ئەم دەمارو حەساسیەت و ئینتیما بچوکانە لەبەرژەوەندی پێکەوەژیان و  ئینتیمای گەورەتری نەتەوەیی نیشتمانیی ئینسانی گەردوونی.

تۆ کە ئەو دەمارە  تۆخئەکەیتەوە، ئیتر پێکەوەژیان ئەکەیت بە نوکتە! (یەعنی خێڵخوازی و پێکەوەژیان، پێکەوە ناگونجێن و تۆ ئەبێ یەکێکیان هەڵبژێریت.)

دیموکراسی پێشئەوەی پرۆسەیەکی سیاسی بێت، پرۆسەیەکی کۆمەڵایەتییە، کاتێ دیموکراسی لە هەڵبژاردندا کورت ئەکرێتەوە، ئیتر دیموکراسی ئەبێتە درۆ

 

دیموکراسی پێشئەوەی پرۆسەیەکی سیاسی بێت، پرۆسەیەکی کۆمەڵایەتییە، کاتێ دیموکراسی لە هەڵبژاردندا کورت ئەکرێتەوە، ئیتر دیموکراسی ئەبێتە درۆ.
هەڵبژاردن نەتیجەو تەحسیڵ حاسڵە، کە خوارەوە دیموکراتیزەکرا، لەسەرەوە دەساودەس و هەڵبژاردن ئەبێ بە زەرورەت و خۆی ڕووئەدا.. بەڵام کە کاری خوارەوە نەکرابوو، ئیتر هەڵبژاردن ئەبێتە کەڤەری دیموکراسی و واقعێکی نادیموکراتی لەپشتەوە ئەشاردرێتەوە.

(تاك لە پەروەردەوە دەسکاری ئەکرێ و خێزان لە قانونی ئەحوال شەخسییەوە) تاکو دین لە پەروەردەو یاسا دەرنەهێنرێ، کۆمەڵگای دیموکرات دروست نابێ.

ناکرێ خێزان دینیی بێ و دەوڵەت مەدەنی بێت، ناکرێ پەروەردە دینیی بێ و تاك ئازادبێت، ناکرێ کۆمەڵگا خێڵەکی بێ و سیاسەت دیموکرات بێت.. 

ئەگەر چی فرەحیزبیمان هەیەو هەمووشی هەر لافی دیموکراسی لێئەدا، بەڵام ئێمە هێشتا حیزبی دیموکراتمان نیە

 
جا ئەگەرچی فرەحیزبیمان هەیەو هەمووشی هەر لافی دیموکراسی لێئەدا، بەڵام ئێمە هێشتا حیزبی دیموکراتمان نیە، چونکە حیزبێکمان نیە کار بۆ تاك بکات، هەمووی کار بۆ قەرەباڵغی ئەکات! حیزبێکمان نیە باسی دەسکاریکردنی پەروەردەو خێزان و دەستوری مەدەنی بکات، هەمووی هەر خەریکی موجامەلەی مەلاو خێڵە، بەمەش هەر کولتوری نادیموکراتی قووڵئەکەنەوە!

دیموکراسی لە دەسکاریکردنی عەقڵەوە دەستپێئەکات نەك لە دەسکاریکردنی دەسەڵاتەوە، دەسکاریکردنی عەقڵیش دەسبردنە بۆ ئەو شتانەی کە کۆمەڵگا دەقی لەسەرگرتووە، نەك دەستپێوەگرتنی لەپێناو کۆکردنەوەی حەشامەت!.

حیزبی ئێمە هەموویان ستایشی موقەدەسەکانی ناو دۆخی مەوجود ئەکەن

 
حیزبی ئێمە هەموویان ستایشی موقەدەسەکانی ناو دۆخی مەوجود ئەکەن،  گۆڕانکاریش لە خستنە ژێرپرسیاری ئەم موقەدەسە نەریتییانەوە دێتە گۆڕێ.. ئیتر هەمووشیان حیزبی مانەوەی دۆخەکەن نەك حیزبی گۆڕانی دۆخەکە، حیزبی دەسەڵاتخوازین نەك پێشکەوتنخوازی.

ئەگەرچی فەساد ئێمەی هیلاککردوە، بەڵام ئەمە ڕەگ نیەو  پەلی کێشەکەیە

 
ئەگەرچی فەساد ئێمەی هیلاککردوە، بەڵام ئەمە ڕەگ نیەو  پەلی کێشەکەیە، کۆکردنەوەی هەموو گۆڕانکاریی لە دژایەتی فەسادی ئیداری و ماڵیدا خۆی لەخۆیدا فەسادە!. گۆڕانکاری ئەوەیە کە لە ڕەگەوە لە فەسادبدرێ، ڕەگی فەسادیش عەقڵی نەریتییە، تا لەو ڕەگە نەدرێ دەوڵەتی یاساو هاوڵاتی دروستنابێ. 

دژی ژنکوژیین، ژنکوشتنیش نەریتێکی کۆمەڵگای پیاوسالارییە، پیاوسالاریش هێز لە خێڵ و تێگەیشتنە باوەکەی دینەوە ئەهێنێ

 
سەیرکە ئێمە دژی ژنکوژیین، ژنکوشتنیش نەریتێکی کۆمەڵگای پیاوسالارییە، پیاوسالاریش هێز لە خێڵ و تێگەیشتنە باوەکەی دینەوە ئەهێنێ، دەی تۆ کە بەردەوام ستایشی مەلاو خێڵ بکەیت، ئیتر درۆیە دژی ژنکوژیی بیت!.

ئەمەی باسی ئەکەم ڕەتکردنەوەو سڕینەوەی دین و خێڵ نیە، بەڵکو دانانی بناغەیەکە بۆ یەکترقبوڵکردن کە دواتر خودی دین و خیڵیش لێ ی بەهرەمەند ئەبن. نەك دۆخەکەی ئێستا،  کە نەریتی خستۆتە مەوقیفی سڕینەوەوە بەرامبەر دیدەکانی تر، دیدەکانی تریشی خستۆتە سەنگەری سڕێنەوە بەرامبەر نەریت!.

لە خێزانا باوك هەیەو لە خێڵدا باوك هەیەو لە حیزبا باوك هەیە. کاری پەروەردە پووچکردنەوەی ئەم باوک سالاریە

 

لە خێزانا باوك هەیەو لە خێڵدا باوك هەیەو لە حیزبا باوك هەیە.. کاری پەروەردە پووچکردنەوەی ئەم باوکسالاریە، نەك ئەوەی خودی مامۆستاش باوکێکی تربێ و پەروەردە باوکسالارییەکە قووڵبکاتەوە!. کاری پەروەردە فێرکردن نیە، ئازادکردنە، ئەوەی لە پەروەردەی وەرئەگریت پێش زانست، ئەبێ ئازادیی بێت.

پەروەردە ئەبێ پرسیار دروستکەربێت نەك وەڵام تێخەر، پەروەردە فێری پرسیارت نەکات، دواتر ناتوانی شتەکان بخەیتە ژێر پرسیارەوە!.

پەروەردە فێری گومانت نەکات، دواتر هەمیشە پێتوایە ئەویتر گەمژەیە، قەت گومانێك لە گەمژەیی خۆت ناکەیت، لێرەشەوە تا خوێنەوارتربیت دەمارگیرترئەبیت!.

پەروەردە فێری حیوارت نەکات، ئیتر فێری پێکەوەژیان نابێت، چونکە وائەزانیت جیاوازیی لادانەو ئەویتر لادەرە.

پەروەردە ئەبێ ترسشکێن بێت، نەك ئەوەی خۆی "دوای خێزان" دامەزراوەی دووەمی دەمکوتکردن بێت. 

پەروەردە بتشکێنێ ئیتر ناتوانی دەسکاری ستەمکاریی بکەیت و بەردەوامیش بەرهەمی ئەهێنیتەوە، چونکە ستەمکاری بەرهەمی مرۆڤی شکێنراوە.
 
پەروەردە ئەبێ خودی گەشەپێدانی مرۆیی بێت، گەشەپێدانی مرۆیی ڕاستەقینە، نەك ڤێرژنە تازەکەی "بانگخوازیی" ئەوەی کە دوای پێچەبەدەورەیەك دیسان شتەکە ئەباتەوە بۆ لای دین!.
 
پەروەردەو گەشەپێدان و مرۆڤسازی.. هەموو شتەکان و لەناویا دینیش ئەباتەوە بۆ لای عەقڵ و ژیان و تۆلێرانس و ناجیاکاریی.          

پەروەردە بە شێوازی ئینزیباتی و سەربازیی و وەعزو تەڵقین.. خۆی لەخۆیدا بۆمبی چەمانەوەیە

 

پەروەردە بە شێوازی ئینزیباتی و سەربازیی و وەعزو تەڵقین.. خۆی لەخۆیدا بۆمبی چەمانەوەیە، کەچی لەناویدا لوغمێکی تری چەمانەوەش دانراوە کە دینە!.

ئیتر لەوێدا  "بیگ بانگ"ێکی بڤەو پرسیارنەکردن و ترساندن و بیرنەکردنەوە.. بە مناڵێکی بچوکدا ئەتەقێتەوەو  تەواوی داهاتووی بە ئاقارکی خراپدا ئەبات و ئەیکاتە مرۆڤێکی تەسلیمبووی کولتور، نەك مرۆڤێکی بەرهەمهێن و دەسکاریکەری کولتور.

مناڵ کە ئەم لوغم و بۆمبانەی پەروەردەی پیاتەقییەوە، دواتر ناتوانێ لە دەرەوەی پەروەردە لوغمەکانی تری چەمانەوە

 

مناڵ کە ئەم لوغم و بۆمبانەی پەروەردەی پیاتەقییەوە، دواتر ناتوانێ لە دەرەوەی پەروەردە لوغمەکانی تری چەمانەوە، لەبابەتی خێڵ و حیزب و ئایدۆلۆژیا.. پوچبکاتەوە، بەڵکو تەسلیمیان ئەبێ و ڕادێ لەسەر کۆیلەبوون. 

دەرهێنانی ئەم لوغمە لە پەروەردەدا دژایەتی دین نیە، دین هیچ خەتەرێکی لەسەر نیەو تۆ کە لە پەروەردەدا بەر دین نەکەویت، دواتر لە کۆمەڵگادا هەر بەری ئەکەویت، بەڵام ئەوکات بە (بیرێکی فروانەوە) بەریئەکەویت، کە ئەمەش باشترین بەرکەوتنە!!.

چونکە خوایەکی گەورەو گران و شتێکی گرنگ و کاریگەری وەکو دین، ناکرێ لە ڕێگەی تەسك و داخراوەوە بۆی بڕۆیت، ئەبێ لە ڕێگەی کراوەو فروانەوە بۆی بچی، ڕێ ی کراوەو فروانیش تەنیا لە بیری فرواندایە، بیری فراوانیش تەنیا لەو عەقڵەدایە کە لەسەرەتادا لێ ی نەدراوە، سەرەتاکەش پەروەردەیە.


ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP