بایەخی بەیاساییکردنی کێشەی ژنانی ئازادکراوی ئێزیدییەکان

دانا بەهادین - 8-04-2019 - 2763 جار خوێندراوەتەوە

ئەمڕۆ لە دۆخێکداین ململانێى سیاسى لە پێناوى بەرژەوەندى دەستەیەک یان گروپێکدا جێگەى بە ئاوڕدانەوە لە باشکردنى گوزەرانى هاوڵاتیان چۆڵکردووە. ئەوەی لە سەنتەری بایەخداندا بووە بەرژەوەندی و ئارەزوی دەستە و تاقمی سیاسی بچوک بون، زۆرینەی خەڵکی بێدەستەڵات و کەمینە کۆمەڵایەتییەکان و توێژە جیاوازەکانی کۆمەڵگە پەراوێزخراون. ئەرکی سەرکردەی سیاسی زۆر شتە، بەڵام لە گرنگترینیان ئاوڕدانەوەیە لەم کەمینە کۆمەڵایەتییە فەرامۆشکراوانە. 

ئێزیدییەکان لە ریزی ئەو کەمینە کۆمەڵایەتییانەن کە زۆرترین زیانیان بەرکەوت و کەمترین جار لە یاساکانی وڵاتدا جێی داخوازییەکانیان کراوەتەوە

 

ئێزیدییەکان لە ریزی ئەو کەمینە کۆمەڵایەتییانەن کە زۆرترین زیانیان بەرکەوت و کەمترین جار لە یاساکانی وڵاتدا جێی داخوازییەکانیان کراوەتەوە و مەینەتییەکانیان ساڕێژکراوە. ئەوان بە دڕندانەترین شێوە کەوتنە بەر شاڵاوى وەحشیگەرانەى داعش، لەلایەک بە هۆى ئاینى تایبەتیانەوە قەتڵ و عامکران، لەلایەکى دیکەشەوە بەهۆى  ڕەچەڵکى کوردبونیانەوە بەرەو مەترسى ڕەشبگیر و تواندنەوە کران.

لەناو ئەم هەموو نا ئومێدى و  گێژاوە سیاسییەدا ئەم یاسایە دەبێت بە ڕۆشناییەکی پرشنگدار کە بەشێک لە ئازار و ئەشکەنجەکانى کورد ساڕێژدەکات

 

ئامادەکردنی پرۆژە یاسایەک بۆ ژنانى ئێزدى ئازادکراو لە ژێر دەستى داعش و پێشکەشکردنی بە پەرلەمان هەنگاوێکی بەنرخە لەم روەوە. لەناو ئەم هەموو نا ئومێدى و  گێژاوە سیاسییەدا ئەم یاسایە دەبێت بە ڕۆشناییەکی پرشنگدار کە بەشێک لە ئازار و ئەشکەنجەکانى کورد ساڕێژدەکات و مژدەى ژیانێکى گونجاو وجیاوازتر لەم دۆخە سەختە دەخاتە ڕوو.

دیاریکردنى ڕۆژى جیهانیی ژنان ( 8/3) ى هەموو ساڵێک تایبەتکراوە بە بەرزنرخاندنى ئازادکردنیان لە زیندانەکانى داعشدا

 

لەناو پرۆژە یاساکەى ژنانى ئازادکراوى ئێزیدییەکاندا چەندین خاڵى گرنگ خراوەتە ڕوو. بە نمونە دیاریکردنى ڕۆژى جیهانیی ژنان ( 8/3) ى هەموو ساڵێک تایبەتکراوە بە بەرزنرخاندنى ئازادکردنیان لە زیندانەکانى داعشدا، ئەمەش دەبێتە یادەوەرییەک کە لە هزرى هەر تاکێکى کوردا تا ساڵگارێکى دوریش کاڵ نەبێتەوە. ئەمەش هێشتا کەمترین خزمەتێکە بە ئێزیدییەکان بکرێت. 

لە برى ئەوەى پارتێکى سیاسى دیاریکراو ببێتە کوێخاى بەدەمەوەچونى ژیانیان (کە نەشچون)، ئەوا لە ڕێگەى فەرمانگەیەکى حکومى تایبەتەوە بەرپرسیارێتى یاسایى دەگیرێتە ئەستۆ

 

خۆشبەختانە، جگە لە پێشنیارکردنی پێدانى موچەى شایستە و دابینکردنى پارچەزەوى بۆیان، لە پرۆژەکەدا داواکراوە بەڕێوەبەرایتییەکى گشتیان بۆ دروستبکرێت بەمەبەستى دابینکردنى مافەکانیان و بە دەنگەوە هاتنى کێشە ئابورى و کۆمەڵایەتیەکانیان، ئەم داواکارییانەش زۆر مەدەنیانەن، چونکە لە برى ئەوەى پارتێکى سیاسى دیاریکراو ببێتە کوێخاى بەدەمەوەچونى ژیانیان (کە نەشچون)، ئەوا لە ڕێگەى فەرمانگەیەکى حکومى تایبەتەوە بەرپرسیارێتى یاسایى دەگیرێتە ئەستۆ.

ئومێدم لەسەر کەسایەتی د.بەرهەم هەڵچنیوە. تا ئەو شوێنەی ئەو مۆدێلێکی نوێ لە سیاسەتکردن پێشکەش بکات، دەستەڵاتی خۆی بۆ بەرگریکردن لە مافی کەمینەکان و خەڵکی بەشخوراو بەکاربهێنێت

 

وەک کەسایەتییەکی لیبڕاڵ و دیموکراسخواز، پرۆژەى لەم چەشنەش لەلایەن بەڕێز دکتۆر بەرهەم ساڵحەوە چاوەڕوانکراوە. من لەسەر چەند هەڵوێستێکی لەم چەشنەیە ئومێدم لەسەر کەسایەتی د.بەرهەم هەڵچنیوە. تا ئەو شوێنەی ئەو مۆدێلێکی نوێ لە سیاسەتکردن پێشکەش بکات، دەستەڵاتی خۆی بۆ بەرگریکردن لە مافی کەمینەکان و خەڵکی بەشخوراو بەکاربهێنێت، ئەوا نەک شایستەی دەستخۆشی بەڵکو پشتگیریکردن و هەڵبژاردنی سەنگەرەکەشێتی. بە واتایەکی دیکە، ئەگەر قسە لەسەر خەسڵەتەکانی سەرکردەیەکی کاریگەر و جیاوازە، ئەوا ئەرکی سەرکردەکە ئەوەیە پشت نەکاتە میللەتەکەی خۆی کە دەیان ساڵ لە جەنگ و ناڕەحەتییدا ژیاوە و ئەرکی خەڵکی بەشخوراویش پشتیوانیکردنی ئەم مۆدێلەیە لە سیاسەتکردن و سەرکردایەتی. هەر خزمەتێکی خەڵکی ستەملێکراو لە هەرێمی کوردستاندا نەک منەتی تیادا نییە، بەڵکو ئەرکیشە. بەڵام لە هەر هەڵوێستێکی سیاسی دڵخۆشکەریشدا پێزانین جێی خۆیەتی.   

جێی داخە دەبینین و دەبیستین سەرۆکایەتى هەرێمى کوردستان بۆ قەرەبووکردنەوەى نەهامەتى ئێزیدییەکان بەشێوەیەکی یاسایی تا ئێستاش هەر بێدەنگى هەڵبژاردووە. یەکێک لە گرنگییەکانی پرۆژە یاساکەى سەرۆکایەتى کۆمارى عێراق پێدەچێت شکاندنی ئەم بێدەنگییە بێت .

پێویستە ئەندامانى پەرلەمانى کوردستان لەبەرامبەر ئەم پرۆژە یاسا پڕبایەخەدا کۆدەنگى  بکەن بۆ چەسپاندنی،  نەک بخرێتە پەراوێزى بەرژەوەندییە کەسى و حزبییەکانەوە

 

ئەم پرۆژەیە هەڵگری خەسڵەتێکی دیموکراسییە بەو مانایەی  کە خەباتە بۆ هێنانەدى سیستەمێک کە تیایدا مرۆڤ ڕووبەڕووى هیچ جۆرە چەوسانەوەیەکى ڕەگەزى و ئاینى و مەزهەبى نەبێتەوە، نیشتمانپەرانەشە  لەبەرئەوەى دەیەوێت ئەو کارەسات و تراژیدییایانەى کە بەسەر گەلى کوردا هاتون لە ڕێگەی یاساوە ڕێگرییان لێبکرێت و چیتر کورد هەڕەشەى ئاسیمیلاسیۆن(تواندنەوە)ى نەتەوەى لەسەر نەمێنێت.
زۆر پێویستە ئەندامانى پەرلەمانى کوردستان لەبەرامبەر ئەم پرۆژە یاسا پڕبایەخەدا کۆدەنگى  بکەن بۆ چەسپاندنی،  نەک بخرێتە پەراوێزى بەرژەوەندییە کەسى و حزبییەکانەوە، چونکە پەرلەمان  کارى سەرەکى هەوڵدانە بۆ بەیاسایکردن و گەڕانەوەى ئیرادەى یاسایى دامەزراوەکانى حکومەت، نەک گۆڕەپانێک بێت بۆ چڕکردنەوەى ململانێى پارتە سیاسییەکان.


ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP