بەپەلە

دکتۆر بەرهەم چارەسەرە نەک کێشە

بەهرۆز جەعفەر - 27-03-2019 - 2464 جار خوێندراوەتەوە

دوو لەو گریمانانەی کە نزیکەی دوو ساڵە د. بەرهەم ساڵح سەرۆک کۆماری عێراقی فیدراڵ سیاسەتی خۆی لەسەر بیناکردووە، ئەکرێت ببێتە کلیلی چارەسەری گرفتەکانی نێوان هەرێم و بەغدا، یەکێکیان ئەوەیە کە نابێت هەرگیز ناکۆکیە ناوخۆییەکان لەسەر حیسابی پشک پشکێنە قووڵتر بکرێتەوەو ئەو وەک کاراکتەرێک ببێتە باعیزی قووڵبونەوەی ناکۆکیە ناوخۆییەکان. ئەوەکەی تریش ئەوەیە کە « چارەسەری پرسی کورد هەرچی و چۆنێک بێت لە ئەنقەرەو تاران و واشنتۆن نییه بەڵکو لە بەغدایە».

بۆچی ئەم کاراکتەرە دەرفەتی نەدرێتێ و پاڵپشتی نەکرێت تا بزانین ئاخۆ کارەکانی خۆی بە زیادەوە ئەکات یان نا

 

ئیمڕۆکە ناکرێت نوسەرێک لە ئەفریکا گەواهی ئەوە بدات کە بەرهەم ساڵح فاکتەری سەقامگیریی و ئاوەدانکردنەوەی عێراقە، بیرمەندێکی وەک فۆکۆیاما داوا بکات واشنتۆن گوێ لە بەرهەم ساڵح بگرێت. شەقامی عێراقی وەک ئومێدێک تەماشای وەها سیاسیەک بکەن، بە زۆرینەی ڕەهای دەنگی عێراقیەکان لەپەرلەمانەوە پۆستێکی بەرپرسیارێتیەکی گەورەی پێ سپێردرابێت،  بەشێکی زۆر لە ئێمەومانانیش لە ماوەی ئەم چەند ساڵەی ڕابردودا دەیان جار بە ڕێگای جیاجیا داوای پاڵپشتی لێکردنی بەرهەم ساڵح بکەن. لە هەمان کاتدا لەم ڕۆژگارەی کە ڕۆژهەڵاتی ناوەڕاست تووشی یەکتربڕینی سیستەمی نوێی هەرێمایەتی و جیهانی بۆتەوە، کورد لە عێراق دونیایەک گرفتی قووڵی جۆراوجۆری چارەسەر نەکراوی لە بەغدا هەبێت. هەموو لایەکیش دان بەوەدا ئەنێن کە لە خولی ڕابردوودا لە غیابی تاڵەبانی ڕەوشی هەرێم و بەرژەوەندییەکانی تووشی مەترسی بۆتەوە. کەچی هەرجارەی گروپێک یان حیزبێکی کوردی قووت بێتەوە لەمپەر بۆ ئەم ڕۆڵەیەی خۆی دروست بکات!. بۆچی ئەم کاراکتەرە دەرفەتی نەدرێتێ و پاڵپشتی نەکرێت تا بزانین ئاخۆ کارەکانی خۆی بە زیادەوە ئەکات یان نا؟!.

بەرهەم ساڵح بکرێت کەسێک نییه بیر لە تۆخکردنەوەی ململانێی تایەفی و ئیتنی بکاتەوە

 

ئەلحەقی هەرچەند لێی بکۆڵیتەوە بیانویەک نییه بۆ ئەوەی لە ئێستادا دژایەتی بەرهەم ساڵح بکرێت، ئەو کەسێک نییه بیر لە تۆخکردنەوەی ململانێی تایەفی و ئیتنی بکاتەوە، کەسێکی وەها نە ناسراو نییه لە گۆڕەپانی ڕای گشتی جیهانی و ناوەندە دیبلۆماسیەکاندا تا دەربەستی شکۆی سیاسی خۆی نەیات، تەنێکی نامۆ نییه بۆ هاونیشتیمانیانی کوردستان، بەتایبەتی خاوەنی دەیان پرۆژەو ئایدیای سەرکەوتوو بووە. لێی ووردبەرەوە بەشێک نییه لە حیقدو بوغزی بنەماڵەگەری و ململانێکانی شەست حەفتا ساڵی ڕابردووی کورد. 

کوردستانێکی بەهێز بە درێژەدان بە ناکۆکیە ناوخۆییەکان نایەتەدی

 

هیچی تێ ناچێت کە لە هەرێمی کوردستانەوە بەرهەم ساڵح بکرێتە بەشێک لە نەخشەڕێگای بەیەک گەیشتنەوەی نێوماڵی کورد و گرەنتیەک بۆ مافەکانی کورد لە بەغدا...ئیمڕۆکە ناوچەی سولەیمانی لەهەر کاتێک پتر پەرتبونی پێوە دیارە، بێ شک خزمەت و یەکگرتنەوەی گەرەکە. پارتی دیموکراتی کوردستان دروشمی « کوردستانێکی بەهێز» ی بەرزکردۆتەوە، کوردستانێکی بەهێزیش بە درێژەدان بە ناکۆکیە ناوخۆییەکان نایەتەدی، بە لەقبونی سەقفی داواکارییەکانی کورد لەبەغدا بەرجەستە نابێت. 

تاکە ترسێک لە کاراکتەر بەرهەم ساڵح ئەوەیە کەسێتییەکی بەهێزی دیبلۆماسی و ئیداری هەیە

 

ئەوەی پێویستە بیر بهێنرێتەوە، ئەوەیە تاکە ترسێک لەم کاراکتەرە ئەوەیە کەسێتییەکی بەهێزی دیبلۆماسی و ئیداری هەیە، هەربۆیە کاتی خۆی ئێمە شایەتی حاڵ بوین ویستی هەموو هێزە ئۆپۆزسیۆنەکان یەک بخات و، بیانکات بە یەکدەنگ و یەک سەنگ، گفتی ئەوەشی دا ئەو تەنها بانگەشەو هاوکارییان ئەکا و هیچی ناوێت، بەڵام لەبەرئەوەی ترسیان هەبو کەسێتی بەرهەم ساڵەح ئەوان قووت بدات، ڕازی نەبون پێی. ئیمڕۆکەش چ لەناو یەکێتی چ لەناو پارتی دیموکراتی کوردستان و بزوتنەوەی گۆڕان هەن ترازان و دەنگەدەنگ و پەلاماردانیان پێ خۆشترێکە، بۆیە هەموو شتێک لەسەر ئەم کاراکتەرە حیساب ئەکەن. تەنانەت ڕای نوسەرو ڕاوێژکارو دەوروبەرێکی هاکەزایی بەرهەم ساڵەح ئەکەنە بیانوو، تەنانەت بیانوو لە کەسێتی دەوروبەرەکانیشی ئەدۆزنەوە بۆ ئەوەی نەگەنە ڕێککەوتن و پاڵپشتی کردنی سەرکەوتنی مەسەلەی کوردو کەرکوک لەبەغدا. کرمانجەکان لە باکور پەندێکیان هەیە ئەڵێن « ئەز نەتیجە دخوازام خەدیجە ناخوازم» ئەوە یائەڵڵای ئەکرد ئەم پیاوە هەموو شێتەکانی شاری دەبردە بەغداو ڕۆڵی پێ ئەسپاردن، ئێمە ئەم پیاوە ئەناسین و بانگەشەی چی کردووە ئەوەمان لێ ئەوێت، ئەوەش بە پاڵپشتی لایەنە کوردییەکان و هەماهەنگی هەموو لایەک دێتە دی، ئیمڕۆکە سیاسەتکردن و فەرمانڕەوایەتی و ڕاگرتنی باڵانس ئەرکێکی هێندە قورسە، ئەوەندە دۆخی عێراق و ناوچەکە هەستیارە، مەعلوم نییه بە هەموو کورد یان هەموو عێراق پێکەوە بتوانن شتێک بکەن، چ جای پەرت پەرت بن و سەرقاڵی سەرقاڵکردنی یەکتر بن. 


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP