هەواڵی ئەمڕۆ

لەیادی ٣/٥ دا، ڕانیە ناونیشانە گەورەکەیە

کاوسێن بابەکر - 26-02-2019 - 1861 جار خوێندراوەتەوە


ئێستا کەیادی 28ساڵەی ئەو ڕاپەڕینە شکۆدارە دەکەینەوە، لەلایەک بەڵایەکی مرۆڤ خۆر بەناوی ئیسلامەوە بەرۆکی گرتووین وشەڕێکی خوێناوی لەگەڵ هەڵگیرساندووین، بەڵام لەسەردەستی پێشمەرگەو شەڕڤانان بەچۆکداهاتووەو دواچرکەکانی ژیانی دەژمێرێ! لەلایەکی تر غیابی  جەنابی مام جەلالە، ئەو پیاوەی پێش هەمووکەس مژدەی روخانی رژێم ودەستپێکردنی راپەڕینی راگەیاندو هەر ئەویش پێش داگیرکردنی کوێت پێشبینی سەرەڕۆییەکی ئاوای لەڕژیمی سەددام کردبوو!

ئەوێ ڕۆژێ،داگیرکاری وەک دێوەزمەیەک بەسەرسینگی نیشتمانەوە چڕنوکەکانی گیردەکردو هەررۆژەی برینێکی لەجەستەی هەلاهەلای دەکرد، رۆژێک بۆ رۆڵەکانی و رۆژێک بۆ کیژۆڵەکانی فرمێسکی دەباراندو شینی دەکرد. کاتێ زۆرداری رژێمی لەناوچوو گەیشتە دوا سنورەکانی خۆی، بەئاگرو ئاسن بەگژ هەر ئاماژەیەک،هەر دیاردەیەکدا دەهاتنەوە کەبۆن ورەنگی نارەزایەتی لێ هاتبا،ئەوێ رۆژێ پێکەنین مایەی قەستی سەربوو، شیعر لەناو لەپی مەقەستداو گۆرانی لەژێر گڕی دەستەڵاتا  هەڵدەپڕوزا.  نوایەک نەبووبۆ زمان و پەسیوێک نەبوو بۆ گفتوگۆ، رۆژگار هەتیو هەتیوتێدەپەڕی وژیان لەقۆزاخەی بێ ئومێدێدا گینگڵی دەدا.تاقەتروسکاییەک لەچیاکانەوە بەخوێنی پێشمەرگە کزکز دەسوتا بەڵام وورگی شەوەزەنگی دەدڕی ومەرگی نیشانی دوژمن دەدا.

گەلیش رۆژ بەرۆژ قینی پیرۆزی ئەستورترو وورە و هاواری بەرزتر دەبوو. هەتا بروسکەکانی ئازار پتربن رق وداهێنان لەناوەوە بەهێزترو ئەستورتر دەبن، هەتاناڵەی چەوساندنەوەو هاواری رزگاری گەل لەگەڵ نرکەی پێشمەرگەو دەنگی رادوێی گەلی کوردستان، جامی توڕەبونیان رژان ودۆزەخی تۆڵەیان داگیرساند.

یەکەم بروسکەی راپەڕین لە رانیە چەخماخەی داو،بووبە گڕکان وچوار قوڕنەو حاجی ئاواودەڤەرەکە، لە شەوو رۆژێکدا تەقیەوەگڕی ناخی دایکانی جگەرسوتاو لاوانی واهاندابوو سنگیان بەگووللەی دوژمنەوە دەنا، کچ وکوڕ پیرو گەنج مەرگیان راودەناو زەمینیان لەژێر پێی داگیرکەراندا دەلەرزان و هەرزوو بەچۆکداهاتن و لەسێبەری خۆیان هەڵدەهاتن!پارتەسیاسیەکان کەهەلومەرجەکەیان هەڵسەنگاندبووخۆشیان بۆئەرکەکە ئامادەکردبوو. بەرەی کوردستانی کەسەرجەم پارتەسیاسیەکانی لەخۆیدا جێکردبۆوە بەرهەمی ئەو ئامادەکاریەبوو، وەڵامگۆیەکی باشی هەل ومەرجەکەبوو.یەکێتی نیشتمانی و هێندێک لەپارتەکان توانیبوویان هێندێک لەکادیرەکانیان بخزێننە نێو جەماوەرو کاربکەن بۆ ئامادەکاری وسازدانی جەماوەری وەتەنگهاتوو دژی رژێمی لەناوچوو.
بۆیە لەگەڵ یەکەم هەنگاوی راپەڕین پێشمەرگەش تێکەڵاوی جەماوەری خرۆشاوبوو. لێرەدا جێی خۆیەتی کەباس لە راپەڕینی ٥/٣دەکرێ نێوی شەهید عەلی نەبی وهەڤاڵەکانی بهێنرێ جونکە ئەورۆژە وا لەگەڵ ناوی ئەو پیاوە تێکەڵاوو لێکهاڵاوە جوداناکرێتەوە. ئەوێ رۆژێ ماڵێ عەلی نەبی بووبوو بە پەنای تێکۆشەران وناڕازی وراکردوانی دەستی رژێم، سەرەڕاش هەر لە٥/٣ داچیتر خۆی پێنەگیراو هاتەنێو بازاڕی رانیەو دەستی کرد بەتەقەکردن وهێرشی کردە سەربارەگای بەعسی رانیە و ئیدی خەڵکی تێکۆشەری رانیە کە لەبێنویەک دەگەڕان رقی پەنگخواردوی خۆیان بەسەر دڕندەکانی بەعسدا بڕێژن رژانە سەر شەقامەکان، هێرشیان کردە سەر بارەگاو مۆڵگەکانیان.
راپەرین بەخوێنی چەندین ئازیز و چەندین رۆڵەی بەئەمەکی ئەم گەلە و بەهیممەتی پێشمەرگە و میللەت سەرکەوت

 

راپەرین بەخوێنی چەندین ئازیز چەندین رۆڵەی بەئەمەگی ئەم گەلە بەهیممەتی پێشمەرگەو میللەت سەرکەوت، بەم سەرکەوتنەش، رانیە دەروازەکانی ئازاری داخست،وقۆناغی داگیرکاری وژێر دەستەیی ودواکەوتوویی پێچرایەوە و قۆناغێکی نوێ لەژیانی سیاسی وئیداری خەڵکی کوردستان دەستی پێکرد، کە گەلی کوردستان و پارتەسیاسیەکان دەبوایە کاروبارەکانیان بەتایبەت دوای ئەوەی رژێم ئیداراتی لەکوردستان کشاندەوە، رێکبەخەنەوە. دەستەڵاتی سیاسی کەشەرعیەتی لە شۆڕش وراپەرین وەرگرتبوو دەبوایە بۆ پرۆسەی هەڵبژاردن ولەرێگەی سندوقەکانی دەنگدانەوە بیگۆڕێ.بۆیە تەنها ساڵێک دوای راپەڕین ولەساڵی١٩٩٢دا یەکەمین هەڵبژاردن، کەیەکەمین هەڵبژاردنی ئازادانەش بوو لەمێژووی پڕ چەوساندنەوەی خەڵکی عێراق جێبەجێکراو،رۆژی هەڵبژاردن زیاتر لە جەژن وخۆپێشاندان دەچوو،ئەورۆژە دونیا لەشاشەی تی ڤیەکانەوە  ئەوخەڵکەووروژاوو تینووەی دەبینی تینوو بۆ ئازادی، تینوو بۆ قانوون و کۆمەڵگایەکی مەدەنی چۆن هەڵپەیان بووبۆ سەر سندووقەکانی دەنگدان.

ئەورۆژە سەرەتای وەرچەرخانێکی گرنگ وگەورەبوولەژیانی سیاسی گەلەکەماندا.ئیدی ئەو هەڵبژاردنە بووبەو پێپیلکانەیەی سەرکردایەتی سیسی وگەلەکەمان بەگشتی پێ بەپێی مێژوو بەسەریدا هەڵدەگەڕێن وبەرەو پێش دەچن بەرەوپێش لەحکومەت ودام ودەزگاکانی وچەسپاندنی قانوون ورێکخستنی هێزی پێشمەرگەودابینکردنی ئەمن وئاسایش،کەوای کردووە لەو عێڕاقە گڕگرتووەدا ئەمن و ئامان ترین ناوچەیەو لەهەموودونیاوە خەڵك رووی تێ دەکەن.

ئێستا نەک حکومەتی خۆماڵی و پەرلەمانی هەڵبژێراو دام ودەزگای دادوەری ورێکخراوە مەدەنیەکان و راگەیاندنی سەربەخۆمان هەیە وسەرەڕای هەرەشە عیراقی وئیقلیمیەکان بەرەو دەرچوون لەدەڵەمەیی دەچین و وزەمینەسازی هێزو توانا سەربازی وئابوری ودیپلۆماسیەکان دەکەین کەدەبنە بناغەی دەوڵەتێکی سەربەخۆ لەئایندەدا، خەریکە لەخەم دەڕەخسێین وچرای ئومێدێک لەسەر مێزی پلاندانانی سەرکردایەتی کورد هەڵکراوە بۆگفتوگۆی جدی لەسەر پێکهێنانی دەوڵەتی کوردی، لەلایەک و بەخەمبوون بۆ پارچەکانی تری کوردستان بەتایبەت رۆژئاوای کوردستان کە لەنێو گڕکانی راپەڕیندا رژێمی دیکتاتۆری سوریایان بەرەو لێواری مەرگ هەڵچنیوەو داعشیان بەدەردێک بردووە کە هەموو دونیا سەرسامن بە قاڕەمانی وئازایەتی کوڕان و کچانی شەڕڤان. دەسەڵاتی سیاسی وحکومەتی هەرێم ئۆباڵێکی مێژووی و ئاکاریان لەسەر شانە بەرانبەر بەباقی گەلەکەمان لەپارچەکانی تردا کە بەشیوەیەکی ئەقڵانی و بابەتی هەوڵ وخەباتی خۆیان یەکاڵای هەوڵەنێودەوڵەتیەکان بکەن بۆ رزگارکردنیان لەژێردەستەیی وبێمافی،دوور لەکاری سەرچڵی سۆزداری کەببێتەهۆی لاوازی هەرێمی کوردستان کەتاقە ئومێدو پشتو پەنایەکی دڵسۆزوبێمنەت وبێبەرانبەری نەتەوەکەمانە لەدونیادا لەو بوارەشدا یەکێتی نیشتمانی درێغی نەکردوەو هەوڵەکانی جەنابی مام جەلال لەکەس شاراوەنین بۆ کۆتاییهێنان بەشەڕی کوردستانی باکورو لێکنزیکردنەوەی حکومەتی تورکیاو نوێنەرانی کورد،وەفدەکانی یەکێتیش بەدەنگی بەرز وبەوپەڕی بەرپرسیارێتی نەتەوەیی وئینسانیەوە داوای ئاشتی وبرایەتیان کردوەو دیالۆگیان وەک تاقەچارەسەری کێشەکان پێشاندا.

کاتی ئەوە هاتوە بەرپرسان ڕانیە لە ئیدارەیەکی بێ خزمەتەوە بکەن بەپارێزگا تەنیا بۆ دەنگ پەیداکردن و دروشمی سیاسی بەکارینەهێنن 

 

ئێستا کەیادی ٢٣ساڵەی راپەرینە مەزنەکەی گەلەکەمان دەکەینەوەو ئاوڕ لەهەنگاوەکانیشمان دەدەینەوە دەبینینین زۆر لەخەونەکانمان هاتوونەتەدی و لەزۆربەی بوارەکاندا هەنگاوەکان چەسپیون، بەڵام هێشتا زۆرخەون وخولیامان ماون، هێشتا زۆر دیاردەی ناشیرینیش بوونەتە لەکە بەسەر دەستەڵات و حکومەتەکەمانەوە. لەم بۆنەپیرۆزەدا داوادەکەم چیتر خەونەکانمان نەژاکێنن. کاتی ئەوەش هاتووە چیتر سەرکردەکان بەڵێنیکردنی ڕانیە بەپارێزگا بۆ دەنگ پەیداکردن ودروشمی سیاسی بەکار نەهێنن و ئیدی ڕاستگۆیانە وەک وەفایەک بۆ خوێنی شەهیدانی ڕاپەڕین و یەکەم چەخماخەو یەکەم بانگەوازی ڕاپەڕینی ژنان وپیاوان ومنداڵانی ڕانیە، ڕانیە لەئیدارەیەکی بێ خزمەتەوە بکەین بەپارێزگا، لەسەر ئاستی عێراقیش با سەرکردایەتی سیاسی کورد بۆ چارەسەری کێشەکان بەپێداگریەکی زیاترەوە لەگەڵ سەرانی عێراق گفتو گۆ بکات وکاتی ئەوە هاتوە هیچیتر کارە هەڵپەسێرراوەکان؛بەتایبەت مادەی ١٤٠،کێشەی پێشمەرگە،کێشەکانی نەوت پشتگوێنەخرێن.هێزولایەنەکان یەکڕیزی ناوماڵی کورد پتەوبکەنەوە وحکومەتێکی بەهێز وبەڕێککەوتنی سیاسی پێکبهێنن حکومەتێک لەئاست داواوخەونی خەڵکی کوردستاندابێ وهەموو کێشەکانی ژیان وموچە وبێکاری..هتد حکومەتی ئێستاچارەسەر بکات.


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP