هاوڵاتى كوردو هه‌ڕه‌مى ماسلۆ

عومه‌ر عه‌لی محه‌مه‌د - 23-02-2019 - 885 جار خوێندراوەتەوە

ئه‌گه‌ر له‌ ڕوانگه‌ى هه‌ره‌مى ماسلۆوه‌ سه‌یرى كۆمه‌ڵگه‌ى كوردى بكه‌ین، بپرسین، ئایا هاوڵاتیانى كوردستان له‌كوێى ئه‌م هه‌ره‌مه‌دان‌و پلان چیه‌ بۆ ئه‌وه‌ى گه‌شه‌ى كۆمه‌ڵگه‌ى كوردى له‌ئاستێكى چه‌ق به‌ستوودا نه‌مێنێته‌وه‌و بچێته‌ ئاستى كۆمه‌ڵگه‌ پێشكه‌وتوو خۆشگوزه‌رانه‌كانه‌وه‌؟، كه‌ ئه‌مه‌ش خه‌ونى هه‌موو كه‌سێكى دڵسۆزو نیشتمان په‌روه‌رو كه‌سێكه‌ كه‌ ئینتمایه‌كى به‌هێزى هه‌یه‌ بۆ شوناسى كورد بوون‌و كوردستانى بوون.

ئه‌گه‌ر سه‌یرى پارته‌ سیاسیه‌كانى كوردستان بكه‌ین به‌گشتى، نه‌یانتوانیوه‌ پلانێكى ستراتیجى وا بخه‌نه‌ڕوو كه‌ ڕه‌نگدانه‌وه‌ى خه‌ون‌و ویسته‌كانى هاوڵاتى بێت، ده‌سه‌ڵاتیش ئه‌وه‌نده‌ى ده‌یه‌وێت وه‌ك حیزب‌و هێزى باڵاده‌ست بمێنێته‌وه‌، ئه‌وه‌نده‌ نه‌چۆته‌ ناو كێشه‌كانى هاوڵاتیانى كوردو هه‌تا به‌رنامه‌یه‌كى ئه‌وتۆیان بۆ دابنێت كه‌ له‌قه‌یرانه‌ جۆر به‌جۆره‌كانی بێ كارى بێ كاره‌بایى ونه‌بوونى شوێنى نیشته‌جێبوون‌و نه‌بوونى خواردن‌و ئاوى پاك‌و حاڵه‌تى بێ هاوسه‌رى گه‌نجان، رزگاریان بكات.
پارته‌ سیاسیه‌كانى كوردستان نه‌یانتوانیوه‌ پلانێكى ستراتیجى بخه‌نه‌ڕوو کە ڕه‌نگدانه‌وه‌ى خه‌ون‌و ویسته‌كانى هاوڵاتى بێت

ئه‌وه‌ى ئێستا میدیاى كوردى و پارته‌ سیاسیه‌كان پێوه‌ى سه‌رقاڵن كۆمه‌ڵه‌ شێكه‌ كه‌ زۆر به‌لاى هاوڵاتییه‌كى سه‌رشه‌قامه‌‌وه‌ جێگه‌ى گرنگكى ئه‌وتۆ نییه‌، زۆربه‌ى پارته‌ سیاسیه‌كان و له‌ ئێستادا ئه‌و پارته‌ش كه‌ ده‌یه‌وێت حكومه‌ت دروست بكات ،ته‌نها باسه‌ له‌وه‌ى ئایا پۆسته‌ سیادیه‌كان بۆ كێیه‌؟، شێوازى مامه‌ڵه‌ى پارتى باڵاده‌ست له‌گه‌ڵ پارته‌كانى تر بۆ چۆنه‌؟ پارته‌كان ده‌بێت چۆن مامه‌ڵه‌ بكه‌ن له‌ناو حكومه‌تى داهاتوو؟ ئایا ده‌ستورو یاساى سه‌رۆكایه‌تى ده‌گه‌ڕێته‌وه‌ په‌رله‌مان؟...هتد.

له‌كاتێكدا هه‌موو ئه‌م بابه‌تانه‌ هه‌ڵقوڵاوى سیماى پارته‌ كوردیه‌كانه‌و له‌م رێگه‌یه‌وه‌شه‌وه‌ هه‌ریه‌كه‌یان ده‌گه‌ڕێت بۆ زیاتر ده‌سكه‌وتنى پۆست‌و ئیمتیازات.. هه‌ر له‌به‌ر ئه‌م هۆكارانه‌ش ده‌بینین رۆژ به‌رۆژ هاوڵاتى كورد له‌ سیاسه‌ت‌و حیزبایه‌تى بێزار ده‌بێت‌و له‌ سیاسه‌ت دوور ده‌كه‌وێته‌وه‌، ئه‌و ده‌نگۆیانه‌ش كه‌ باس له‌ چۆنیه‌تى پێكهێنانى حكومه‌ت‌و ده‌ستور‌و شتى له‌وجۆره‌ ده‌كات، گرنگیه‌كى ئه‌وتۆى نییه‌ به‌لایه‌وه‌، له‌ڕاستیدا ئه‌م هه‌ڵوێستانه‌ى خه‌ڵك بووه‌ هۆى ئه‌وه‌ى كه‌ زۆرینه‌یان به‌شدارى له‌هه‌ڵبژاردنه‌كانى په‌رله‌مانى كوردستاندا نه‌كه‌ن‌و په‌رله‌مانیش گرنگیه‌كى ئه‌وتۆى نه‌بێت به‌لایه‌وه‌.
رۆژ به‌رۆژ هاوڵاتى كورد له‌ سیاسه‌ت‌و حیزبایه‌تى بێزار ده‌بێت‌و له‌ سیاسه‌ت دوور ده‌كه‌وێته‌وه‌

دوور كه‌وتنه‌وه‌ى پارته‌ سیاسیه‌كان‌و ده‌سه‌ڵات له‌ویست‌و خواسته‌كانى خه‌ڵك ئه‌و دۆخه‌ى دروست كردووه‌.

ئه‌مه‌ش ئه‌گه‌ر به‌پێى هه‌ره‌مى ماسلۆ چاودێرى دۆخه‌كه‌ بكه‌ین دووركه‌وتنه‌وه‌یه‌ له‌ویست‌و خواست‌و پێداویستیه‌كانى مرۆڤى كوردوستان، پارته‌ سیاسییه‌كانى كوردستان ئه‌گه‌ر ده‌یانه‌وێت بگه‌ڕێنه‌وه‌ بۆ ناو خه‌ڵك، ده‌بێت پێداویستیه‌كانى خه‌ڵك بكه‌نه‌ گه‌وره‌ترین پرۆژه‌و ئامانجى سیاسى بۆ ئه‌وه‌ى خه‌باتى بۆ بكه‌ن كه‌ بۆى بێته‌دى.

ماسلۆ له‌ هه‌ره‌مه‌كه‌یدا پێنج ئاستى پێداویستى مرۆڤ دیارى ده‌كات كه‌ یه‌كه‌میان خۆى ده‌بینێته‌وه‌ له‌پێداویستیه‌ فسیۆلۆجیه‌كان، كه‌ بریتین له‌ (خواردن‌و خواردنه‌وه‌و جل‌و به‌رگ‌و هاوسه‌رگیرى) ئه‌م پێداویستیانه‌ به‌ بنچینه‌یى‌و سه‌ره‌كى داده‌نرێن، له‌به‌ر ئه‌وه‌ ئه‌ركى سه‌رشانى حكومه‌ته‌ كه‌ پاش ئه‌وه‌ى خه‌ڵك متمانه‌ى پێ ده‌به‌خشێت له‌رێگه‌ى په‌رله‌مانه‌وه‌، په‌رله‌مانیش به‌ ئه‌ركى سه‌رشانى هه‌ڵبسێت‌و چاودێرى حكومه‌ت بكات بۆ دابینكردنى ئه‌م پێداویستیانه‌، به‌ڵام به‌داخه‌وه‌ ئه‌وه‌ى له‌حكومه‌تى هه‌رێمى كوردستاندا بینیمان حكومه‌ت نه‌ك پرۆژه‌ى نه‌بوو بۆ دابینكردنى ئه‌م پێداویستیانه‌، به‌ڵكو له‌رێگه‌ى سه‌پاندنی پاشه‌كه‌وتى مووچه‌وه‌، ئه‌وه‌ش كه‌ هاووڵاتى هه‌یبوو له‌ده‌ستى داو له‌و ئاستانه‌شدا هاته‌ نزمترین ئاست‌و خراپترین دۆخ، تێكدانى گوزه‌رانی خه‌ڵك‌و برسى كردن‌و هێنانه‌خواره‌وه‌ى ئاستى خزمه‌ت كردنى كه‌رته‌كانى ته‌ندروستى‌و په‌روه‌رده‌و كاره‌باو ئاو، گرانى یه‌كه‌كانى نیشته‌جێبوون، تا وای كرد كه‌ حكومه‌ت له‌سیمایى دیموكراتى‌و مه‌ده‌نیبون‌و سیماكانى حكومه‌ت چاك، بچێته‌ چوارچێوه‌ى جۆرێكى تر له‌حكومه‌ت كه‌ له‌پێناو برسیكردن‌و وێرانكردنى گه‌شه‌پێداندا كار بكات‌و كۆمه‌ڵگه‌ توشى چه‌ق به‌ستوویى‌و نائومێدى بكات.

ئه‌م ئاستى یه‌كه‌مه‌ كه‌ ماسلۆ دیارى ده‌كات بنه‌ماو بنچینه‌یه‌ بۆ كۆمه‌ڵگه‌یه‌كى گه‌شه‌كردوو، چونكه‌ ئه‌گه‌ر هاوڵاتى له‌ ئه‌م ئاسته‌دا تێر نه‌بێت ناچێته‌ قۆناغه‌كانى تر.
له‌ئێستادا هاوڵاتى كورد به‌تایبه‌تى كه‌ زۆرینه‌یان فه‌رمانبه‌رن ئه‌وه‌نده‌ شه‌كه‌ت بوون به‌ ده‌ست دۆخى پاشه‌كه‌وتى موچه‌و خراپى گوزه‌ران‌و خزمه‌تگوزاریه‌كان، تاكه‌ ئامانجى ئه‌وه‌یه‌ ته‌نها موچه‌كه‌ بدرێت‌و موچه‌كه‌ش له‌كاتى خۆیدا بێت.
هاوڵاتى كورد كه‌ زۆرینه‌یان فه‌رمانبه‌رن شه‌كه‌ت بون به‌ ده‌ست دۆخى پاشه‌كه‌وتى موچه‌و خراپى گوزه‌ران‌و خزمه‌تگوزاریه‌كان


له‌مه‌وه‌ بۆمان ده‌رده‌كه‌وێت كه‌ حكومه‌ت زۆر له‌ئاستێكى نزمدا هه‌ست به‌ به‌رپرسیارێتى ده‌كات به‌رامبه‌ر به‌ ژیان‌و گوزه‌رانى هاوڵاتیان، هه‌ر به‌هۆى ئه‌مه‌شه‌وه‌ خاوه‌نى هیچ پلانێك نیه‌ بۆ پێشخستنى بواره‌كانى گه‌شه‌پێدان له‌كوردستان، به‌تایبه‌تیش له‌بوارى په‌وررده‌و پاشان بوارى ئابورى‌و كشتوكالأ‌و ته‌ندروستى‌و...هتد.

حكومه‌ت زۆر له‌ئاستێكى نزمدا هه‌ست به‌ به‌رپرسیارێتى ده‌كات به‌رامبه‌ر به‌ ژیان‌و گوزه‌رانى هاوڵاتیان

 

ئاستى دووه‌مى هه‌ره‌مى ماسلۆ ئارامى‌و ئاسایشه‌ له‌ڕووى (جه‌سته‌و پیشه‌و ده‌رامه‌ت‌و مالأ‌و سامان‌و خێزان).

له‌م ره‌وه‌شه‌وه‌ راسته‌ كه‌ دۆخه‌كه‌ له‌ڕووى ئاسایشه‌وه‌ پارێزراوه‌ و جیاوازه‌ له‌ناوچه‌كاتى ترى عێراق، به‌ڵام هه‌تا ئێستاش هاوڵاتى له‌ دوو دڵى‌و نا ئارامیدا ده‌ژى له‌رووى ئاسایشى خۆراك‌و ته‌ندروستى‌و پیشه‌و ماڵ و سامان‌و زۆرجاریش بوونى تیرۆرو هه‌ڕه‌شه‌ له‌سه‌ر ئازادى رۆژنامه‌نوس‌و سیاسى، وایكردووه‌ كه‌ هاوڵاتى هه‌ست به‌ ئارامى نه‌كات.
هاوڵاتى له‌ دوو دڵى‌و نا ئارامیدا ده‌ژى له‌روى ئاسایشى خۆراك‌و ته‌ندروستى‌و پیشه‌و ماڵ و سامان‌


پێداویستى سێهه‌م بریتییه‌ له‌پێداویستى كۆمه‌ڵایه‌تى كه‌ بریتین له‌ (هاوڕێیه‌تى، په‌یوه‌ندى خێزان‌و بارى سۆزدارى) ئه‌مه‌ش له‌كاتێكدا لاى تاك گه‌شه‌ ده‌كات كه‌ دوو پێداویستیه‌كه‌ى تر هاتبنه‌دى‌و پارێزراو بن.

پێداویستى چواره‌میش كه‌ ئاستێكى پێگه‌یشتووه‌ له‌ پێداویستیه‌كانى هاووڵاتى، بریتین له‌ (رێزگرتنى خود، متمانه‌، داهێنان، رێزگرتنى به‌رامبه‌ر) له‌م قۆناغه‌دا مرۆڤ هه‌ست به‌بوونى خۆى ده‌كات، ده‌یه‌وێت بوونى خۆى بسه‌لمێنێت‌و خاوه‌نى شوناسێكى تایبه‌ت بێت به‌خۆى له‌ڕووى پیشه‌و كارو كه‌سایه‌تیه‌وه‌.

له‌قۆناغى پێنجه‌م‌و كۆتاییدا، هه‌وڵده‌دات كه‌ خۆى بسه‌لمێنێت‌و داهێنانى هه‌بێت‌و بكه‌وێته‌ شوێن راستیه‌كان، لێره‌دا هاوڵاتى ئه‌و هوشیاریه‌ى بۆ دروست ده‌بێت كه‌ پێویسته‌ خاوه‌نى حكومه‌تى چاك‌و دیموكراسیه‌تى گه‌شه‌كردوو سیستمێكى سیاسى دادپه‌روه‌ر‌و ئازادیه‌كانى تاك‌و كۆمه‌ڵگه‌‌و چه‌سپاندنى مافه‌كانى هاوڵاتى بێت.

رژێمه‌ عه‌سكه‌ر تارو سته‌مكارو تاكڕه‌وه‌كان هه‌رگیز ناهێڵن هاوڵاتى له‌ئاستى یه‌كه‌مدا تێپه‌ڕ بێت‌و به‌رده‌وام سه‌رقاڵى ده‌كه‌ن به‌ گه‌ڕان به‌ شوێن پێداویستیه‌ فسیۆلۆجیه‌كان، حكومه‌ت بۆ ئه‌م ئاسته‌ش هیچ هاوكارییه‌كى هاووڵاتى  ناكات، ئه‌و جۆره‌ رژێمانه‌ له‌سه‌ر چه‌مكێكى ته‌قلیدى كار ده‌كه‌ن كه‌ ده‌ڵێت: (سه‌گه‌كه‌ت برسى بكه‌ شوێنت ده‌كه‌وێت).

رژێمه‌ عه‌ره‌بیه‌كانى وه‌ك (میسرو یه‌مه‌ن‌و لیبیاو سوریاو تونس) له‌سه‌ر ئه‌و سیاسه‌ته‌ رۆیشتن، به‌ڵام دوواجار ئه‌و سه‌گه‌ برسیه‌ قاچى گرتن‌و به‌ره‌و زبڵدانى مێژوو چوون. 


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP