هەواڵی ئەمڕۆ

فاکتەرەکانی پشت دواکەوتنی پێکهێنانی کابینەی نۆیەم

هەکاری فەقێ گۆمەشینی - 10-02-2019 - 837 جار خوێندراوەتەوە

تا ئێستاش هەنگاوەکانی پێکهێنانی کابینەی نوێی حکومەتی هەرێم هەر ڕۆژەو بە جۆرێک قسەی لەسەر دەکرێت و لایەنە سەرەکیەکانی حکومەت کە یەکێتی و پارتین هەر لایەو بە پاکێجی خۆیان دانوستان دەکەن، ڕەنگە ئەوان وەکو دوو حزب ئامادەیی ئەوەیان تێدابێ لەسەر چەند هێڵێکی گشتی بگەنە ڕێککەوتن، بەڵام ئەوەی بۆتە هۆی بە ئاکام نەگەیشتنی ئەم هەنگاوانە چەند فاکتەرێکن کە پەیوەندیان بە کێشە ناوخۆییەکانی پارتیەوە هەیە و ئەو ئاماژانەش بەڕونی دیارن، لەم نێوەندەدا دوو فاکتەری پەیوەست بە پارتیەوە ڕۆلیان هەیە لەم دۆخەی کوردستان،

پارتی لەهەوڵی ئەوەدایە بەهەر جۆرێک بێ تۆڵەی شکستەکەی لە یەکێتی و سەرۆک کۆمار بکاتەوە

یەکەم: پارتی لە دوای شکستهێنانی لە دەرچواندنی کاندیدەکەی بۆ سەرۆکایەتی کۆمار لە هەوڵی ئەوەدایە کە بەهەر جۆرێک بێ تۆڵەی شکستەکەی لە یەکێتی و سەرۆک کۆمار بکاتەوە،دەیەوێ بۆ بەهێزکردنەوەی پێگەکەی لەڕێگەی بێ بەش کردنی یەکێتی لە وەزارەتێکی حکومەتی عێراق پەیامێک بداتە خەڵکی کوردستان کە پارتی هێشتا دەتوانێ لە هەولێرەوە و لەسەرووی سەرۆک کۆمارەوە کاریگەری لەسەر بڕیارەکانی بەغدا هەبێت، ئەمەش تەنها لەپیناو دژایەتی کردنی خودی سەرۆک کۆمار و یەکێتیە ئەگەرنا خۆشیان دەزانن ئەم عینادییە زێتر لە زەرەری کوردە نەوەک یەکێتی سەرۆک کۆماری عێڕاق، بۆ سەلماندنی ئەو راستیەش لێدوان و قسەی بەرپرسانی پارتی بەسە کە بە ئاشکرا باسی ڕێگەنەدان بە سەردانی سەرۆک کۆمار بۆ هەولێر دەکەن، وە لە نوێترین هەوڵیشیان بۆ ئەم مەبەستە سەردانەکەی نێجیرڤان بارزانیە بۆ لای سەرۆکی حکومەتی عێڕاق کە بە ڕاشکاوی داوایان کردووە کەسێک لەدەرەوەی کاندیدی حزب بۆ وەزیری داد کاندید بکات.

دواخستنی کابینەی نۆ خۆی لە پڕۆژەیەکی سیاسی دوور مەودادا دەبینێتەوە

دووەم: گۆڕانی تەرازوی هێز و پێگەی دوو کارەکتەری سەرەکی نێو پارتیە، کە ئەوانیش  مەسرور بارزانی و نێچیرڤان بارزانین، ئێستا بە کاندید کردنی مەسرور بارزانی بۆ پۆستی سەرۆکی حکومەت و مانەوەی کاک مەسعود وەک سەرۆکی پارتی داهاتوی سیاسی نێچیرڤان بارزانی زۆر ڕون نیە، بۆ نێچیرڤان بارزانی هەوڵەکانی چڕکردۆتەوە تا هەژمونی خۆی بەسەر حکومەتی داهاتودا بسەپێنێت و ڕێگربێت لە زوو پێکهێنانی ئەم کابینەیە تا دەسەڵاتەکانی سەرۆکی هەرێم بەو ڕەهاییەی پێشترەوە مسۆگەر بکات، بۆیە ئەگەر بە دیقەتەوە سەیری لێدوانی ئەو بەرپرسانەی پارتی بکەین کە نزیکن لە نێچیرڤان بارزانی بونەتە هۆی دروست کردنی لەمپەر لەبەردەم زوو پێکهێنانی کابینەکە.
سەبارەت بە یەکێتی و هۆکارەکانی بۆ دواخستنی کابینەی نۆ خۆی لە پڕۆژەیەکی سیاسی دوور مەودادا دەبینێتەوە تا لەگەڵ پارتی هەر ڕۆژەو لەسەر مەسەلەیەک توشی تەشەنوجی سیاسی نەبنەوە، ڕێککەوتنێک کە چیتر وەکو ساڵانی رابردوو یەکێتی بە تەنیا تیایدا زەرەر مەند نەبێ بەڵکو پڕۆژەیەک بێ کە چەتری کۆکەرەوەی بەرژەوەندی خەلک بێ ئەمە لەلایەک، لە لایەکی تریشەوە یەکێتی کە لە دوای ڕیفراندۆم دوو گرەوی زۆر گەورەی بردوەتەوە نایەوێ لەدەستیان بدات، گرەوی یەکەم ڕزگارکردنی شاری کەرکوک بوو لە وێرانکاری و تەسلیم نەکردنی بە قەدەرێکی نادیار و مەترسیدار، 
گرەوی دووەمیش تەسلیم کردنی عێراق و سەرۆکایەتی کۆمار بوو بە کەسایەتێکی کاریزمایی وەکو دکتۆر بەرهەم کە ئێستا ڕۆڵ و پێگەو کاریگەری عێراقی لەناوچەکەو جیهان بەهێزتر کردووە، بۆیە یەکێتیش نایەوێ لە پێناو پەلە کردن لە پێکهێنانی کابینەی نۆیەمی حکومەت موجازەفە بەم دەسکەوتە گرنگانەوە بکات.


ئەم وتارە دەربڕی رای نوسەر خۆیەتی و خەندان لێی بەرپرسیار نییە

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP