هەواڵی ئەمڕۆ

کێ ڕیکۆردەکەی شکاند؟

سلێمان عەبدوڵا یونس - 20-01-2019 - 55049 جار خوێندراوەتەوە

ھێشتا لەمانگی یەکەمی ساڵی نوێداین کەچی ترافیکی دیبلۆماسی بۆ بەغداد و ھەولێر ڕیکۆردی قەرەباڵغی شکاند!

گرنگە کە دەبینرێت ئەندازیارانی ئەو ترافیکە دیبلۆماسیە چڕەی ڕوی لە بەغداد و ھەولێر کردوە، سیاسی و دبلۆماسکارە کوردەکانن، چونکە ئەمە دەرفەتیان دەداتێ دوای شکستێکی کاتی، توانای خۆیان بەدەوروبەر و جیھان نیشان بدەنەوە!

ساڵی ڕابردو بارزانی کورسی سەرۆکایەتی بەجێھێشت، بەڵام لەواقعی ساڵی نوێدا ئەوەتا بەبێ کورسی ئەو وەکو سەرۆک دەرکەوتەوە، بەتایبەت ئەوکاتانەی لەئاستی بەرزی ناوچەیی و جیھانی، جوڵە دیبلۆماسیە گەرمەکان، بەستەڵەکی  سیاسی ھەرێمیان بڕی و وایانکرد، فەڕشی سوری سەردانە فەڕمیەکان لەپیرمام و ھەولێر ڕابخرێنەوە.  

لەبەغدادیش سەرکۆمارێکی کورد ڕەونەق دەبەخشێتەوە پۆستێکی ڕەمزی و بەموگناتیسی ئەزمونێکی جیاواز ئەو وردە ئاسنانەی بەڕێوەبردنی عێراق ڕاکێش دەکات، کەدەسەڵاتە ڕەمزیە نوسراوەکەی پێی نەداون. لەم نێوەندەدا ئەگەر یەکێتی و پارتی بتوانن سەردەمی زێڕینی نێوانیان بگەڕێننەوە، ئەوا کورد دووشەشی گرتوە و جارێکی تر ڕۆژیەتی و ریکۆردی لەبایەخی دیبلۆماسی، ئەم ناوچە ئاڵۆزەدا شکاندوە! 
 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP