مردنی ویژدان و مرۆڤ بوون

شۆڕش خالید ئاژگەیی - 19-10-2018 - 9692 جار خوێندراوەتەوە


دەبێ لەوە بترسێین کاتێک هێشتا لەو دونیایە ئالۆزو پڕلە کێشمەکێشەیەدا دەژین، شتێک لە ناخماندا بە ناوی مرۆڤایەتی بمرێت و ئاسەواریشی نەمێنێت...

کەم نین ئەو بە ناو مرۆڤانەی بە مانای وشە نامرۆڤن و بە رواڵەت و لە رووکەشدا ئینسانن..دەخۆن، دەخۆنەوە، ئەخەون، هەناسە دەدەن، دەئاخڤن و وەچە دەنێنەوە...لێ هەڵگری هیچ کام لە خەسڵەتە رۆحی ومەعنەویەکانی ئینسان بوون نین و لە مەرجەکانی مرۆڤ بوون دوور کەوتوونەتەوە...

هەندێکیان خۆیان بۆ پارە و پۆست و پلەوە دۆڕاندووە، کۆمەڵێکیان نقومی نێو لەزەتەکانی دونیا بوونەو تاقمێکێش بە هۆی تێوەگڵانیان لە ناو دەریای بێ بن و بێ چوارچێوەی سیاسەت و بەتاڵ بوونەوە لە چەمکەکانی ڕاستگۆیی و مۆڕاڵ و خوو گرتن بە پەتای تەڵەکابازی و درۆو دەلەسەوە، لە گشت پێوەر و تایبەتمەندی و پیرۆزیەکی مرۆڤ بوون داشۆراون و لە مەعنەویەت و ویژدان سالاری خاڵی بوونەتەوە...

ئەمانە گەر نۆرەی مردنیشیان بێت، رەنگە ئەگەر بۆیان بلوێ، بەرتیلی زیندوو مانەوەی هەمیشەیی بخەنە بەردەم پەیامهێنەری مەرگەوە و هەوڵ بدەن بە نەمری تا ساتەوەختی کۆتایی دونیا بمێننەوە...

بۆ دڵنیا بوون لە زیندوێتی کەسەکان، شەرەف و کەرامەت و ویژدان و جۆری کاراکتەریان ھەڵسەنگێن نەک ژماردنی لێدانەکانی دڵ و هەناسەدانەکانیانەوە...

لە پرۆسەی پڕ لە هەڵبەزو دابەزی ژیان و هەورازو نشێوەکانی، مرۆڤی ئەزمونگەرا فێری زۆر شت دەبێ، بەڵام جاری واهەیە لە نێو ئاپۆرای حەشاماتدا ون دەبێ و توانای لێک جیاکردنەوەی مرۆڤ و نامرۆڤەکانی نامێنێ... 

با ویژدانەکانمان زیندوو راگرین و هەوڵ بدەین لە لوتکەی ئینسانی بووندا بمێنینەوە...بێ بەهاترین و کەم نرخترین شانازی ئەوەیە، شانازی بەو شتانەوە بکەین بوونەتە هۆکاری بەختەوەری ئێمە و بەدبەختی و ماڵوێرانی و سەرگەردانی ئەوانی ترەوە...

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP