سەرۆک شارەوانی داماوو شوانی حەپەساو

شۆڕش خالید ئاژگەیی - 25-08-2018 - 4217 جار خوێندراوەتەوە


 (١)
ئەوەی لە توانامدا بوو کردم....

چۆلەکەیەکی هیلاک و ماندوو و بە قەوارە بچووکی حەپەساو، زۆر بە خێرایی لە ئاگرێک نزیک دەبووەو بە پەلە دوور دەکەوتەوەو دەگەرایەوە...!
لێیان پرسی:
" ئەوە تۆ بە چیەوە سەرقاڵی؟ ئەوە پەلەقاژەی چیتە؟"
چۆلەکە گوتی:
" لەم نزیکانە کانیاوێک هەیە بە دەنووکم ئاوی لێ هەڵدەهێنجم و دەچم بەئاگرەکەی دادەکەم...
وتیان:
" قەوارەی ئاگرە بڵێسەدارەکە زۆر لەو ئاوەی تۆ بە دەنووکی بچووکتەوە دەیهێنی زیاتر و گەورەترە و گەرمترە و ئەو ئاو هێنان و هیلاکی و هاتوچۆیەی تۆ بێ سوودە و ئاوپڕژاندنی تۆ بە سەر ئاگرەکە هیچ لە تینی سووتێنەری ئاگرەکە و گەورەییەوە ناگۆڕێ و بە خۆرایی خۆت هیلاک و ماندوو دەکەی....
چۆلەکە وەڵامێکی زۆر فەلسەفیانەی دایەوەو گوتی:
" راستە رەنگە کوژاندنەوە یا دامرکاندنەوەی ئەم ئاگرە ماڵوێرانکەرە لە سنووری دەسەڵات و توانا و توانست و هێزی چۆلەکەیەکی وەک مندا نەبێ...بەڵام کاتێک لە دوارۆژ ویژدانم پرسیاری لێکردم بۆ کوژاندنەوەی ئاگری بڵێسەداری هاورێکەت چیت کرد؟
لە وەڵامدا دەڵێم:
" هەرچی لە توانامدا بوو بۆ دامرکاندنەوەی گڕی سووتێنەری ئاگرەکە خستمە روو و بەوپەری دڵسۆزیەوە بە هیچ شێوەیەک درێغیم لە یارمەتیدانی هاورێم نەکردو کەمتەر خەمیم نەنواند...! 

(٢)
سەرۆک شارەوانی داماو...
لە سەرۆک شارەوانیەکیان پرسی:
قەوارەی زێدەرۆییەکان لە سنووری دەسەڵاتی جەنابت چەندە؟

وەڵامی دایەوە:
دەسەڵاتی من...!!! بە ساقەتان بم کوا من دەسەڵاتم هەیە!!!

قەوارەکە بەقەد کێوێکە...! هەڵبەتە ئەوەندەی من ئاگاداری بم....لەپاڵ من و بە بێ ئاگاداری من و بەدەر لە سەروەری یاساو رێساش چی کراوە و چۆن کراوە بەخوا ئاگاداری نیم....
پرسیار:
بیرت لە لە رووخاندن یا دەسکاری کردن یا کێوماڵکردنی زێدەرۆییەکان نەکردۆتەوە؟

وەڵام:
نەخێر...ناوێرم....چونکە ترسم لەوەیە نیشتیمانێک بەھۆیەوە دارمێت....!

(٣)
شوانی حەپەساو
لە شوانێکیان پرسی: کاکە شوانی کۆڵنەدەر تۆ چی دەربارەی روژگارەوە دەزانی ؟ 
تۆ ساردی و گەرمی رۆژگارت زۆر چەشتووەو گەرمێن و کوێستانیشت زۆر کردووە هەورازو نشێوی زۆریشت بڕیوە ؟
شوانەکە گوتی: وەڵا من ھیچ شتێک دەربارەی رۆژگارەوە نازانم و ئاگاداری نیم.
بەڵام ئەورۆ دوای بڕینەوەی خوری مەرەکانم، بەداخەوە بۆم دەرکەوت نیوەیان گورگ بوون…!

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP