هەرئێستا

دواجار دڵە گەورەکەی هاورێی هەژاران لە لێدان کەوت...!

شۆڕش خالید ئاژگەیی - 9-08-2018 - 57004 جار خوێندراوەتەوە


ئەو دڵەی بۆ حاڵی بێ حاڵان بێ وچان لێی دەدا و ترپەی دەهات... سەرەنجام لە لێدان کەوت...
ئەو دڵەی بەردەوام بوو لە هەوڵدان بۆ ڕوناک کردنەوەی ماڵە تاریکەکەی هەژاران، دواجار وەستا...
ئەو دڵەی هەمیشە لە خەمی داگیرساندنی چرای ڕوناکی ماڵە هەژارەکاندا بوو، بەرگەی سەختی و ناهەمواریەکانی نەگرت و پەکی کەوت...
ئە زاتەی لە شەوانی گەرمای تاقەت پرۆکێنی هاوینان و سەرماو سۆڵەی زستانە ساردو سڕو بەفراویەکاندا هەموومانی بە بێ جیاوازی بەسەر دەکردەوە، بەداخەوە بەرگەی نەگرت و کۆڵی دا و جێمانی هێشت...


هاورێی هەژاران سەربە هیچ قۆتابخانەیەکی فکری دیاریکراوەوە نەبوو...

لە ژیانی ڕۆژانە و شێوازی مامەڵە کردنی لەگەڵ حەشامات و دەورووبەرەوە هەڵگری بیری سۆسیالیزم و لە شێوازی کار کردنی هەڵگری بیری لیبرالیزم و لە چالاکیەکانیدا پێڕەوکاری قوتابخانەی کۆنسێرڤاتیزم و لە دابەشکردنی خێرو بێردا، سەرقافڵەی کاروانی بیری دادپەروەری و سۆسیالیزمی گەل و لە ئاییندا بەخشندە و هەڵگری ڕەوتی  خزمەتگوزاری گەل و نیشتیمان و خاک گەرایی و دژی خۆپەرەستی و لە سیاسەتی ڕۆژانەدا دژی دووڕوویی و فتنەگێڕی و لە ڕووی ڕاگەیاندندا دژی درۆو دەلەسەی ڕاگەیاندن و چەواشەکاری و لە خشتەبردن و بازارگەرمی و ژەنینی زوڕنای درۆی شاخدار بوو.

ئەو هەم نیشتیماپەروەر بوو هەمیش بیری لای گەڕەک و ماڵ و شار و ئاوەدانی و خەمی هەژاران بوو...بەڵام تا سەر ئێسقان دژی ناوچەگەرێتی و خزم خزمێنەو خێڵ پەرەستی و خیانەت و خاکفرۆشی و بازرگانی و بینە بەردەی سیاسی و ژێربەژێر و بن پەردەو ڕێکەوتنە گوماناوەیەکان بوو. 

لای ئەو گەل و گەڕەک و نیشتیمان و کۆڵ نەدان و نەسرەوتن کۆمەڵێک پڕەنسیپی جێگر و گونجاوو نەگۆڕ و پایەدار و ئەبەدی بوون...
نە ماستاوچی بوو...نە ماست فرۆش و خۆفرۆش...نە چاوەشی بەردەرکی خواپێداوان بوو...نە مەداح و پان کەرەوەی مرۆڤە نەشیاوەکان بوو...

ئەو لە پێناوی  روناک کردنەوەی ماڵە تاریکەکاندا سەری نایەوە... بۆ ساتێکیش عەوداڵ و وێڵی سەروەت و سامان کۆ کردنەوەو خۆ پڕ کردن نەبوو..هاوسۆزی هەمووان بوو و بە کردەوەش ئەم پڕەنسیپەی خستبووە واری جێ بەجێ کردن و قەت نان و پیازی بە درووشمە باق و بریقەدارەکان و ماندوو بوون و خەباتی ئەوانی ترەوە نەدەخوارد... 

ئەو جیاوازی لە نێوان چین و توێژەکانی کۆمەڵگادا نەدەکرد و تا سەر ئێسقان دژی جیاکاری کۆمەڵایەتی بوو...

هەرچەندە بێوچان  و شەوو ڕۆژ لە کارو چالاکی وتێکۆشان و هەوڵداندا بوو، لێ خەڵکیتر بە ناوی ئەوەوەو لە جیاتی ئەو، پارەیان لە ماڵەکانی گەڕەک وەردەگرت و ئەم زۆر جار لەبەر خۆیەوە دەیگوت:
" ماڵی وێرانم...کێ دەیکا...کێ دەیخوا...!"

...بە داخ و پەژارەیەکی زۆر و ئاه و حەسرەت و ناڵەوە...دوێنێ دڵە گەورەکەی، وێڕای هەوڵی جدی وەستای گەڕەک و تێکردنی گازوائیلی نایاب و دانسقە و عەیار بیست و چواری پاکی یەکێک لە بیرە حەیاتەکانەوە، چیتر بەرگەی بێدادی فشارو زێدەڕۆیی و داواکاریەکانی گەڕەکی نەگرت و بەو پەڕی شکۆمەندیەوە ماڵئاوایی لە هەموومان کرد و بۆ خەمان جێی هێشتین و هەموومانی خستە ناو تاریکەیەکی قوڵ و گەرماو ئارەقەیەکی زۆرو خەمێکی پر لە تاسە و داماویەوە...

بە داخەوە دوێنێ شەو موەلیدەکەی گەڕەکمان پەکی کەوت:-(
 

ئەم وتارە دەربڕی رای نوسەر خۆیەتی و خەندان لێی بەرپرسیار نییە

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP