ئاوێک بەم ئاگرەدا بکەن

حەسەن بارام - 10-06-2018 - 4152 جار خوێندراوەتەوە


دیمەنی ئێستا عێراق بەکوردستانیشەوە کۆمەڵێک ئاماژەی مەترسیداری لەهەناوی خۆیدا هەڵگرتووە وزوربەی ئاماژە وپێشهاتەکان پێمان دەڵێن ناوچەکە وعێراق لەبەر ئەنجامی ململانێ ناوخویی وهەرێمایەتی ونێودەڵەتیدا  مەحکومە بەوەی گۆڕانکاری ڕوو دەدەن ۰۰پێ ناچێت ئەم گۆڕانکارییانە کاری سەرپێی وهاکەزایی بن ، بەڵکو ئاماژەکان پتر بە ئاراستەی ئەگەری هەڵایسانی شەڕ وپیکدادان هەنگاو دەنێن ، ئەمەشیان ئەگەر ڕوو بدات سەرەڕای بەربونی خوێنێکی زۆر وتێکشکانی وزەی ئابوری ومرۆیی ، پێ ئەچێت نەخشەی ناوچەکە وعێراقیش گۆڕانکاری ڕیشەیی بەسەردا بێت۰

وەک دیارە هەنوکە ململانێ نیودەوڵەتی وهەرێمایەتی وناخۆیی شیعە بەشیعە وسونە بەشیعە وکورد بەشیعە وکورد بەکورد وهەروەها زەقبونەوەی داعش ، هەموو ئەمانە پیکەوەڕا ئاماژەی مەترسیدارن ونزیک یا دوور ئاگری شەڕ خۆش دەکەن ، كوردیش وەک نەتەوە وەکو خاوەن قەوارەیەکی سیاسی لەنێو ئەم هەموو هاوکێشەیەدا دۆخەکەی لەبەردەم مەترسی وهەڕەشەدایە ، بەتایبەتی لەئێستادا کورد لەهەموو کات پەرتەوازە وناکۆکە لەنێو خۆیدا ،  بەدیاریکراویش دوای ئەو ساختەکارییەی کە لەهەڵبژاردنەکەی ٥/۱۲ ڕوویدا  دوو هێندە ڕیزی هێزە کوردییەکانی پەرتەوازە ودژ بەیەک کردووە ، تەنانەت ئاشتی سیاسی وکومەڵایەتی بەئەندازەیەکی خراپ تێکچووە .

بویە لەئێستادا سەرەڕای ئەوەی گرنگە بەحیکمەت ولێبوردەیەوە لەڕێگای یاساوە چارەسەری دۆخی هەڵبژاردن بکرێت ودڵی هەمووان ڕازی بکرێت وکێرڤی ئەو هەڵچون وناکۆکییانە داببەزرێنرێت وئاوێک بەم ئاگرەدا بکرێت ومافی خوراو بو هەموو هێزە سیاسییەکان بگەڕێندرێتەوە ، بەمەش هەم ئاشتی سیاسی وکومەڵایەتی دەپارێزرێت ، هەمیش کورد پیکەوەڕا  خۆی بۆ ئەگەر وپیشهاتەکان بەیەک دەنگی ویەک ڕیزی ئامادە بکات ، چونکە مێژوو ڕەحم بەکەس ناکات وبێگومان بەپلەی یەکەمیش هێزە دەسەڵاتدارەکان ئەم بەرپرسیاریتییە ئەکەوێتە ئەستۆیان۰۰تکایە ئیتر مێژووی هەڵەی باوباپیران دووبارە مەکەنەوە۰

ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP