هەواڵی ئەمڕۆ

بەپەلە

لەپێناو مەرامی حیزبیدا با لەمە زیاتر پیرۆزییەكان نەشێوێندرێن

حەسەن بارام - 9-06-2018 - 2995 جار خوێندراوەتەوە


ژیانی سیاسی ئەم هەرێمە پڕی لەشتی سەیروسەمەرەیە ، بەشێك لە هێزە سیاسییەكان لەداهێنانی نەریت ناڕاست ونادروستدا دەستێكی باڵایان هەیە وهیچ كاتێك لە هەڵەكان پەند وعیبرەت وەرناگرن وهەمیشە دووبارەی دەكەنەوە وهەندێك جاریش شانازی پێوە دەكەن .

ئێمە دەزانین پێشمەرگە وشەهید وخاك ونەتەوە وئاڵا موڵكی هەموو كوردە وبۆ كەس نییە  بەتەنها بەموڵكی خۆی بزانێت وچون بخوازێت ئاوها مامەڵەی پێوە بكات وبەكەیفی خۆی هەڕاجی بكات ، ئەم هێزانە بۆ شاردنەوەی عەیب وعار وهەڵە بەردەوامەكانیان هەمیشە دەست بۆ ئەم پیرۆزییانە دەبن ودەكارن لەم ڕێگایەوە بەرانبەری پێ عەیبدار بكەن وبەڕاست وچەپدا بەخائین وخۆفرۆش لەقەڵەمی بدەن۰

ئاخر ساختەكاری لەهەڵبژاردنەكان وبێ موچەكردنی پێشمەرگە وگێڕانەوەی ئەم هەرێمە بۆ خاڵی سفر لەئەستوی دەسەڵاتدایە ، یان لەئەستۆی ئۆپۆزسیون؟ ئاخر دەكرێت تا قەرەی قیامەت خۆڵ بكەنە چاوی ئەم میللەتە خێر لەخۆ نەدیوە؟.

باشە داكۆكیكردن بۆ وەرگرتنەوەی دەنگی دزراوی هاوڵاتیانی ئەم هەرێمە بۆ خیانەت وخۆفرۆشتن بێت؟ پاشان كێ باسی پێشمەرگە قارەمانەكانی كوردستانی كردووە ، ئەوان سیمبول وڕەمزی ئازایەتی وجوامێرین بۆ دەبێت تێكەڵ بەهەندێك بابەت بكرێن۰۰با لەبری ئەوە موچەكانیان بۆ دابین بكەن وژیانی باش بۆ خۆیان وخانەوادەكانیان بڕەخسێنن ، نەك بیانگلێنن بەكێشە ناوخۆییەكانەوە ، پێشمەرگە لای هاوپەیمانی هێزی بەئەمەك وجوامێری كوردستانن وبەموڵكی هەموو كوردی دەزانین۰۰ ئیتر ڕەوا نیە پیرۆزییەكانی ئەم نەتەوەیە لەلایەن ئەم دەسەڵاتەوە قۆرخ بكرێت وموزایەدەی پێوە بكرێت۰

ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP