بەپەلە

کۆتایی خۆشاردنەوە لە پشتی کەرکوکەوە

عوسمان گوڵپی - 8-06-2018 - 3774 جار خوێندراوەتەوە

هەرێمی کوردستان و عێراق بە دۆخێکی تایبەتدا تێدەپەڕێت لە دوای ئاشکرابونی تەزویرە زەبەلاحەکەی ۱۲ی ٥وە، لەو ڕۆژەوە حیزب و سیاسیەکانی عێراق بونەتە دوو ئاراستە، ئاراستەیەك پشتیوانی لە تێپەڕبونی ساختەکاری و کارکردن بە دەرئەنجامەکانی ئەم ساختەکاریە، ئاراستەکەی تریش تێپەڕ نەبونی ئەم ساختەکاریە کە پێیان وایە ئەمە تەنها بردنی کورسیەکانی ئەوان نیە بەڵکو شێواندنی پرۆسەی دیموکراسی و بێ بایەخ کردنی هەڵبژاردن و گەڕانەوە بۆ دەنگی خەڵکە بۆیە بەڵێنیاندا هەموو هەوڵەکانیان بۆ گێڕانەوەی دەنگی خەڵك و متمانەبێ بۆ هەڵبژاردن.

لە ئیستادا هەوڵەکانی هێزە دەنگ دزراوەکان بەڕوونی دەرکەوتون و توانیان لە ڕێگە جیاوازەکانەوە بەتایبەت ئەنجومەنی نوێنەرانی عێراق، تەزویرکردنی دەنگی خەڵك بکەنە هۆکاری چەندین بڕیاری گرنگ کە هەموویان بە زیانی حیزبە ساختەکارەکانن.

ئەوەی ڕوونە فەزاحەتی گەورەی ساختەکاریە لە هەرێمی کوردستان و ئەو تەزویرەی لێرە کراوە پێویستی بە بەڵگە و نمونە هێنانەوە نیە و تەواوی کۆمەڵگە لەوە تێگەشت کە کێن ئەو هێزانەی دەیانەوێت بە تەزویر و شێواندنی پرۆسەی هەڵبژاردن و دیموکراسی درێژە بە تەمەنی خۆیان بدەن و هیچ فاکتەرێکی مانەوەیان بەدەستەوە نەماوە تەزویر نەبێ چونکە ئەوان بە سیاسەت و حکومڕانی ڕابردوو شکستیان خوارد و لەوە تێگەشتن کە ئیتر سەردەمی دەسەڵاتیان کۆتایی هات و شکستی خوارد.

بۆیە چەند ڕۆژێکە دەیانەوێ لە ڕێگەی جوڵاندنی هەستی هاوڵاتیانەوە و لە ژێر ناوی کەرکوك و کوردایەتیەوە شکستی خۆیان و عەیبەی تەزویر بشارنەوە، بەڵام چیتر خەڵکی کەرکوك ناهێڵن ناوی شارەکەیان بەکار بێت بۆ داپۆشین و کارە ئابڕوبەرەکانی هیچ هێز و سیاسیەك و ئیتر خۆیان دەڵێن ئێمە و ئێوە دوو ڕێگای جیاوازین
ئەوان پێیان وایە دەتوانن بەناوی دڵسۆزی بۆ کەرکوك و کوردایەتیەوە پاساو بۆ تەزویر و ئابروچونەکانیان بهێننەوە.

بۆیە پێموایە سەردەمی خۆشاردنەوە لە پشتی دروشمی نەتەوەیی و دڵسۆزی بۆ خاك کۆتایی هاتوە و خەڵکی کەرکوك لەوە تێگەشتن کە ناو و سنوری جوگرافی و نەوت و کوردایەتی بوەتە هۆی دەوڵەمەندبون و بەدەستهێنانی پۆست و بەرپرسیارێتی بۆ ژمارەیەك حیزب و لە نێو حیزبەکانیشدا ژمارەیەك کەس. کەرکوکیەکان و خەڵکی کوردستان لەوە تێدەگەن ئەوانەی کەرکوکیان بەڕاستی فرۆشت ناتوانن بەدرۆ بیگێڕنەوە.

حیزبە ساختەکارەکان دەیانەوێت بە ناوی دڵسۆزی بۆ پێشمەرگە و کەرکوك و پیرۆزی و جوانیەکانەوە پاساو بۆ ناشیرینیەکانی خۆیان بهێننەوە و تەزویر و گەندەڵی و تاڵانکردنی وڵات بشارنەوە.

بۆ ئەمەش دەیانەوێت لە ڕەمزی بەگژاچونەوەی ساختەکاری و هەموو ئەوانە بدەن کە دەیانەوێ هاوڵاتیان خۆیان خاوەن بڕیاربن و چیتر دروشمی نەتەوەیی و قەزیەی کەرکوك بۆ گیرفان پڕکردن و شاردنەوەی ناشیرینیەکان بەکار نەیەت، لە ئیستاو داهاتوشدا ئەو ئیرادەیە دەبێت سەرکەوێ کە دەیەوێت خەڵك بڕیاردەر و هەڵبژاردن و دەسەڵات ببێتە هۆی خزمەتکردنی خەڵك، بۆیە درێژە بەو ڕێگایە دەدەین کە گرتومانە بۆ کۆتایی هێنان بە ستەم و نادادپەروەری و تەواوی توانامان دەخەینەگەڕ بۆ گێڕانەوەی شکۆ بۆ هەڵبژاردن و دیموکراسی و دەنگی خەڵك ئیتر گرنگ نیە کێ و چ حیزبێك زەرەر مەند دەبێت گرنگ ئەوەیە هەموو هەوڵەکانمان بەدڵسۆزی لە پێناو خزمەتی گشتی و خەڵکی هەرێمی کوردستان بەناوچە کوردستانیەکان و کەرکوکی شاری کوردان و حکومڕانیەکی باش و داهاتویەکی ڕوونە.


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP