هەرئێستا

لە دەنگی ساختەوە بۆ ئاوی سیاسی

دەلیل جەمال - 5-06-2018 - 1566 جار خوێندراوەتەوە

مژارەکان ئێستا زیاتر دەربارەی گرتنەوەی ئاوو بەزاندنی سنوری کوردستان لەلایەن وڵاتانی دراوسێوە،ڕاستە دیوە ئاشناو دیارەکەی ئەوەیە ئەم وڵاتە ولاتێکی دەسەمۆو سیخناخ بە دەستی دراوسێ بەجۆرێک دیوێک نادۆزیتەوە کە کاریگەری وڵاتانی دراوسێ و نێودەوڵەتی بەسەرەوە نەبێت، دروستیشە بڵێین لاوازی قیادەی کوردو عێراق لەبەرانبەر ئەم هێزانە.

بەجۆرێک مەنفەزێک نابینی تا پێچەوانەی خواستی وڵاتان بین و بەئاراستەی خواستی هەرێم و عێراق بین. هەربۆیە هەرکات بیانەوێت فشار بۆسەر هەرێم دروست دەکەن هەر لەفشاری ئابووری سەربازی سیاسی ،لەکاتێکدا ئەم فشارانە زۆرجار لەیاساو ڕێسا نێودەوڵەتییەکان دەردەچن ،دواجاریش ئەم فشارانە لە کرۆکدا شەڕی دەروونییە لەگەڵ خەڵکی کوردستان .

لە۱۲/ئایار بێدەنگی ئەم وڵاتانە لەبەرانبەر بە دزینی دەنگی خەڵکی کوردستان و ئەتککردنی دیموکراسی و بەجۆرێکیش نەک هەر بێدەنگ بوون بگرە بەشێکیش بوون لەم دەنگدزین و شکانی ئیرادەو خواستی تاکی دەنگدەر،بەئاراستەی هاوئاوازو خزمەتکارەکانیان، دەبینین ئێستاش فشاری هێنانی هێز بۆسنوری کوردستان و گرتنەوەی ئاوی ژیان و ژیاری خەڵک کەمن پێموایە هێشتا فشاری دیکە ماوە و دەبێت چاوەڕێ بین

کورد هەتاخاوەنی ئەم سەرکردایەتیە لەرزۆک و شکست خواردوەبێت هەتا خاوەنی ئەم دەسەڵاتە گەندەڵ و تاسەر ئێسقان فشۆڵ و بێ ئیدراک و کورت بین و بێ ستتراتیژەبێت دەبێت هەر ڕۆژەو چاوەڕێی شەڕی دەرونی و بەزاندنی سنورو خیانەتی گەورەبین لەدەرو دراوسێ ،کە بەقەولی ئەوان دۆست و پشتیوانی کوردن.

هەمیشە تاکی کورد دەبێت بگاتە ئەوڕاستییەی نائاگاو بێ خواستی خۆی دراوەتە دەست قەدەری یاریەکانی ئەوان ،دراوەتە دەست ڕێککەوتن و سەفقە ژێربەژێرەکانی دەسەڵات لەگەڵ ولاتان خۆ ئەم ڕووداوانە ئەوەمان پێدەڵێن سیاسەت و سەردان و پەیوەندی و ڕێککەوتنەکانیان لەخزمەتی خۆیان و بنەماڵەو گروپە بازرگانەکانیانن، نەک لەپێناوی کوردو دۆزو مافەکانی

ئەوەی باسمکرد دیوێکی دیارو ڕوونی ئەم یاری و فشارانەن بەڵام پێموایە دیوی دوەمی ئەم فشارانە لادانی چاوەکانە لەسەر پرسە گرنگ و هەستیارەکەیە ئەویش مەسەلەی هەڵبژاردن و ئەوفەزاحەت و ساختەکارییەیە کە ئێستا گەلی کوردو عێراق چاوەڕێی دەرئەنجامەکان دەکات

دوای دەرکەوتنی ڕاستی و دروستی ساختەکارییەکەو دەرکەوتنی ئەو فەزاحەتەی کە کردیان ئێستا دۆستەکانیان وەک پیشەیان هەوڵدەدەن خەڵک و میدیاو تەواوی چاوەکان ئاراستەیان بگۆڕن بۆمەسەلەی ئاو و هاتنی هێزی تورکیا بۆ سنوری کوردستان،هەڵبەت دەکرێ و ڕێشی تێدەچێت ڕێککەتن هەبێت بۆ خولقانی ئەن ڕووداوانە گرتنەوەی ئاو بۆ هاتنی هێزی تورکیاو سبەی دەکرێ سوپای پاسدارانیش مانۆڕێک لەژێر ناوێکەوە دەست پێبکات.

هیچ مەحاڵ نییە کاتێک دەسەڵاتداران بێدەنگن و دوای خەڵک و جیهان ئەگەر توانییان ئیدانەیەکی دەکەن.
بۆیە دروست ئەن ڕووداوانە بۆ لادانی ئاراستەی ڕەخنەو گلەیی خەڵکە بۆ لادانی چاوی میدیایە لەسەر ڕووداوەکانی پەرلەمانی عێراق و سکاڵاو تانەی لایەنە دەنگ دزراوەکان،خولقاندنی فەزایەکی نائارام و پڕلە مەدلولی نالۆژیکییە لە هەرێمی کوردستان و عێراق

دیوێکی دیکەی فشارو نمایشی وڵاتانە بۆ حوکمەتی ئایندەی عێراق و پشک و سیناریۆی ئەوانە بۆ بەشداری دۆست و هاوئاوازەکانییانە لە حوکمەتی ئایندەی عێراق

لەگەڵ ئەمانەشدا دەبێت ئەوە بزانین هێزگەلێکی دیکە هەن و چاوی تورکیاو ئێرانیان لەسەرە نەدۆخەکە لە مەسڵەحەتی ئەوانەو نە رێککەوتنە ژێربە ژێرەکانی دەسەڵاتی هەرێم ژیان و ئارامیان دەپارێزێت،دورنییە ئەوانیش نەکرێنەئامانج و قوربانی ئەم سیناریۆو یارییانەی کە گومانم نییە دەسەڵاتی هەرێم و حیزبە دەسەڵاتدارەکان ئاگاداری ئەم فشارانەن

بۆئەوانیش قازانجە کە چاوەکان لەسەر فەزاحەت وساختەکارییەکانیان دورخرێتەوە،چونکە ئێستا فشارەکان چڕتر بوونەتەوە بۆ ئەنجامی کۆتایی و دەرکەوتنی ڕاستییەکان کەچۆن هاولاتی دەنگی دزراوە..لەم یاری و سیناریۆیانەدا هەم میدیا هەمیش هاوڵاتی دەبێت وریاو بەئاگابێت لەو ئاڵوگۆڕە لەئاراستەی ڕوداوەکان....

ئەم وتارە دەربڕی رای نوسەر خۆیەتی و خەندان لێی بەرپرسیار نییە

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP