بەپەلە

دەنگدان ئەرکى نیشتمانى و ئاینى یە

چیا ئیسماعیل عوسمان - 2-05-2018 - 1456 جار خوێندراوەتەوە

لە هەناوى ئەو بارودۆخە نەخوازراوە ئابورى و کۆمەڵایەتى و سیاسى و یاسایى و ئیداریەى ئەمڕۆى کوردستان ، قەیرانێک کۆتایى نایەت یەکێکى تر دەست پێ دەکات.

گەندەڵى لە هەمو جومگەکاندا گەیشتوەتە ترۆپک، کێشەکان بە بنبەست گەیشتون، تاکی کوردی متمانەی بە دەسەڵاتى کوردی نەماوە بۆ چاکسازى لە حکومڕانى وباشکردنى گوزەرانى خەڵک ودابین کردنى لانى کەمى ژیانیان .

هەندێک پێیان وایە دەنگ نەدان و بێ دەنگى باشترین بژاردەیە، چونکە گوایە دەنگ بدەن یان نا، دەسەڵاتداران جۆرەها ڕێگە دەگرنە بەر بۆ تەزویر کردن ، وەک هەندێک بەرپرس ڕایانگەیاندوە کە گۆڕەپانى سیاسى چۆڵ ناکەن ئەگەر تاکە کورسیەکیش بە دەست بهێنن.

بە پێویستى دەزانم هاوڵاتیان ئاگادارى ئەوە بن کە ئەم بۆچونە تەواو نیەو لەبەرئەوەى دەنگ نەدان بێ هەڵوێستى یەو ڕازى بونە بەو هەمو ستەم و نا دادیەى کە ساڵانێکە دەسەڵاتى شکست خواردو بەرامبەر هاونیشتمانیان دەیکات، وە ناگونجێت لەگەڵ مرۆڤ بوندا چونکە مرۆڤ خاوەنى ئیرادەیەو هەڵوێستیش وابەستەى ئیرادەیە، کاتێک هەڵوێست نەبێت واتە ئیرادە بونى نیە و ئەمەش مرۆڤ بون دەخاتە ژێر پرسیارەوە.

هەر بۆیە گرنگە بزانیت کە دەنگ نەدانت واتاى هێشتنەوەى ئەو لایەنانەیە کە تۆ ناڕازیت لێیان، پێویستە دەنگ بدەیت بە نوێنەرى ڕاستەقینەى خۆت، کەسانێک هەڵبژێریت بە تواناو لێهاتو و بوێر بن، دەست پاک و ڕابردو پاک بن و بتوانن نوێنەرایەتى کورد بکەن بە شێوەیەکى دروست، وە داکۆکیکارى سەرسەختى مافە ڕەواکانت بن.

ئێستا کاتى ئەوە هاتوە سزاى دەسەڵات بدەیت بە ڕێگایەکى شارستانى و لە سەر سندوقى دەنگ دان.

کاتێتى کۆتایى بە حوکمى قۆرخکارى و پاوانخوازى بهێنیت.

دەنگ دانت دەبێتە هەوێنى چاکسازى لە سیستەمى حوکمڕانى و بە دیهێنانى گەشەى ئابورى و پێشکەوتن و چەسپاندنى دیموکراسى و دادپەروەرى.

هاوڵاتى بەڕێز دەنگ دانت جگە لەوەى کە ئەرکێکى نیشتمانى و ڕاپەڕینێکى مەدەنیە، لە هەمان کاتیشدا ئەرکێکى شەرعیە، خواى گەورە فەرمویەتى ( ان الله لا یغیر ما بقوم حتى یغیروا ما بأنفسهم) (الرعد -11-)، واتە خواى گەورە هیچ گۆڕانکاریەک ناهێنێتە کایەوە بۆ هیچ هۆز و نەتەوەیەک هەتا خۆیان گۆڕانکارى بەرپا نەکەن.

ساڵانێکە هەردو حیزبى دەسەڵاتدار خەباتى شاخ و مێژو بەم میللەتە بەش مەینەتە دەفرۆشنەوە، ئێمە ڕێز لە مێژو خەباتى هەمو لایەک دەگرین بەڵام تا ئێرە و بەس، تا کەى سەروەت و سامانى ئەم کوردستانە بە تاڵان بەرن و خەڵکیش بێ دەنگ بێت؟

تا کەى بە شایستەى مافە سەرەتایى یەکانى خۆمانمان نەزانن و هێشتاش داواى متمانە لە خەڵکى بکەن.

ئیتر با هەمومان بە یەک دەنگ بڵێین نەخێر بۆ گەندەڵى نەخێر بۆ پاوانخوازى، بەڵێ بۆ چاکسازى و داد پەروەرى بەڵێ بۆ دیموکراسى و ئاوەدانى.

بەڵێ بۆ هێنانە کایەى حوکمڕانى تەندروست کە هەموان لە سایەیدا بە مافە ڕەواکانیان بگەن، هەموان لەبەردەم یاسادا یەکسان بن ، گەل خۆى خاوەن بڕیار بێت و بەشدار بێت لە فەرمانڕەواییدا، شەفافیەت هەبێت لە داهات و خەرجیدا.

با هەمومان بە دەنگەکانمان بەشدار بین لە بونیاتنانى کوردستانێکى بەهێز لە ڕوى دوژمن و بەسۆز بە هاوڵاتیانى خۆى، کوردستانێک پێگەى ژن و گەنج تیایدا ڕێز لێگیراو بێت .

پێکەوە بە جیاوازى ئاین و ئایدیاو نەتەوەو هەمو دەنگ و ڕەنگەکانەوە، دەنگ بدەین بۆ کوردستانێکى ئاوەدان کە شکۆ و ڕێزمان تیایدا پارێزراو بێت .

بە دەنگەکانمان کەسى شیاو بخەینە شوێنى شیاو، ئایندەمان بنیات بنێین.

چیا اسماعیل عوسمان/ پارێزەر و خوێندکارى دکتۆرا لەیاساى گشتى

ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP