مایەپوچی لە ئەخلاقدا
مۆدێلی حوکمڕانی کوردستان بەنمونە

سالار مه‌حمود - 1-04-2018 - 2423 جار خوێندراوەتەوە

سالار مەحمود

لەکاتی ناڕەزایی و خۆپیشاندانی هاوڵاتیاندا هەندێک جار حکومەت بۆ رووبەڕووبونەوەی خۆپیشاندانی هاوڵاتیان پەنا دەباتە بەر (خۆپیشاندانی پێچەوانە)و هێزی مرۆیی خۆی دەخاتە سەر شەقام، ئەوەش بەکێ؟ بەفەرمانبەران و مووچەخۆرو کارمەندانی حکومەت  خۆی، لە خۆپیشاندانەکانی ئەم دواییەی ئێراندا کۆماری ئیسلامی پەنای بردە بەر خۆپیشاندانی پشتیوانی فەرمانبەرانی دەوڵەت بۆ بەرپەرچدانەوەی مانگرتن و خۆپیشاندانی هاوڵاتیان.

رووداوی لەم جۆرە حکومەتەکان لە قەیرانەکاندا پەنای بۆ دەبەن،  هەرچەندە ئەوەش کردەی دەسەڵاتە ستەمکارو چەواشەکارەکانەو ئاکامی نەبووەو نابێ.

هاوکێشەکە لە کوردستاندا بۆ حکومەتی شکستخواردووی هەرێم دژوارترە،  چونکە ئەوانەی لەسەر شەقامن زۆرتر فەرمانبەران و مووچەخۆری حکومەتن.

ئەخلاق لە فەلسەفەی کۆنی یۆنانەوە تا ئەمڕۆ واتە بوێریی و دلێریی، دلێریی بۆ خزمەتی گشتی و بوێریش لە داوای مافدا، سوقرات دەڵێ چۆن پزیشکێک دەبێ شارەزا بێت لە زانستی چارەسەری نەخۆشدا ئینجا دەبێ پزیشکی بکا، ئاواش فەرمانڕەوا دەبێ شارەزابێ لە هونەری بەڕێوەبردن و سیاسەتدا ئینجا خۆ بەشایستە دابنێ. کوردستان ئەمڕۆ وەک کەشتیەک وایە بەدەست کەسانێک شایستەی کەشتیوانی نین و لێی نازانن! 

هەر لەبەر ئەوەشە شکست بە دوای شکست و قەیران بە دوای قەیران کوردستان و خەڵکەکەی تووشی هەژاریی و بێکاری و بێدادیی لە رادەبەدەر بووەتەوە، کەواتە مایە پووچی تەنیا لە رووی مووچەو مادەوە جێی باس و خواست نین، بەڵکو گران و قورسترین مایەپووچی مەعنەوییەو پەیوەستە بە ئاکاری سیاسیەوە ئەویش لەدەسەتدانی شەرعیەت و هێزی رەواییە. ئایا حکومەتی شکستخواردوو بیری کردۆتەوە لەوەی کە ئەوانەی خۆپیشاندان دەکەن مامۆستان، فەرمانبەری حکومەتن، مووچەخۆری دەوڵەتن؟. ئەی بێ مووچەو هاوڵاتیەکانی تر دەبێ چەن ناڕەزاو توڕە بن؟ ئەم خۆپیشاندانانە دەرخەری ئەوەیە ئەم حکومەتە بە تەواوی ئیفلاسی کردوەو شکستی هێناوە لەهەموو کایەیەکی مادیی و مەعنەویی.

 ئەمەی لە کوردستان روو دەدات هەڵگری زۆر مانای سیاسیی و مەعریفی و مەعنەوی ترە، بچوک ناکرێتەوە لە داخوازی قوت و  بەناو پاشەکەوتی مووچە، ئەم هەرێمە بە دەست کێشەو قەیرانی قووڵی ئاکارییەوە دەرگیر بووە، کە بەها نەما لەلای دەسەڵاتەوە ئەشێ چاوەڕوانی کارەساتی چاوەڕوان نەکراویش بکرێ.

دۆخەکە مەترسیدارەو گوتارو شێوازی پەرچەکرداری دەسەڵات بەرامبەر ناڕەزایی هاونیشتمانیان دەرخەری ئەوجی بێباکیانە، ئەوەش لەبەرچاو بگیرێ کە ستەمکار بەسانایی بارگاوی دەبێ بە بەرژەوەندی ستەمکاری ترو بۆ خۆپارێزیی و مانەوە هاوپەیمانی دەکەن لەپێناو پاراستنی کۆمپانیاو بەرژەوەندیە زەوەندەکانیاندا، نمونەی شەقهەڵدان لە مامۆستایان لە پەروەردەکاران و ناساندنیان بە ئاژاوەگێڕ، ئاماژەی روونی نامۆبوونی ئەم حکومڕانییەیە بەبەهاکانی کوردەواریی و ئەوجی داماڵرانە لە ئاکاری سیاسیی، بۆیە کارەسات و مەترسی پێشبینیکراوی گەورەتر لە سایە شڕەکەی ئەم مۆدێلەدا ئەگەرێکی چاوەڕوانکراوە.

بۆ دەربازبوون و دوورخستنەوەی ئەو ئەگەرە لەبەرامبەر هاوپەیمانی گەندەڵکاراندا بەردەوامی ناڕەزاییە نیشتمانیەکانی هاوڵاتیانە کە دوو دەڤەری سڕیەوەو یەک گوتاری دروستکردوە، ئەخلاقی بەرز لای خەڵک بەرجەستەیە، دلێریی و بوێرییان لەسەر داکۆکی لەماف و ئازادییان نمونەی بەرزی ئاکارییانە، رەنگدانەوەی هەڵوێستی گرنگ و دەستەبەرکردنی ئایندەیەکی نوێ و  تێپەڕاندنی ئەم قۆناغەیە، خۆپیشاندان لەلایەک  بۆ گێڕانەوەی ماف بۆ مافخوراوان و، ئینجا پارێزگاریکردن لە هەرێمی کوردستان نەوەکا لە ترسی هاوڵاتیەکانیداو لە پێناو مانەوەی خۆیاندا، بەتەواوەتی رادەستی داگیرکەران بکرێت.


ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP