بەپەلە

كۆرتكرنا رێكێ ؟

عەلی ئۆرەماری - 10-03-2018 - 993 جار خوێندراوەتەوە

لبەر چاڤ وەرگرتنا سایكلۆجیەتا تاك تێدا دەربازدبیت  تایبەت ل وەلاتەكێ مینا هەرێما كوردستانێ  گەلەك گرنگە ،  بەلكی ئێك ژ رێكێن سەركەفتنێ ئەوە  ژینگەها تاك تێدا دژیت زانستیانە بێتە خاندن و شروڤە و ڤەكۆلینێن زانستیێن  بەرفرە لسەر بێنەكرن ، كۆ زێدەتر ژ چارسالانە ئەگەر نەبێژین بدرێژیا بیست و حەفت سالێن حۆكمرانیا كوردی ،  فشارێن سیاسی –كارگێری – یاسایی و ژهەمیان مەزنتر قەیرانا ئابۆریا دەستكرد تەنگێن خۆیێن  سەر ژیانا ئێك ب ئێكێن تاكێ كورد شداندین  ، و دنەبوونا چ پرۆژەیێن عەقلانەیێن دەربازكرنێ بتایبەت ژلایێ وان هێزێن خۆ بخودانێ بریارێن سیاسی و ئابۆری دزانن  بدرێژیا ڤان چار سالان دیسان هەم بێ ئۆمێدیەك پەیداكریە و هەم ژی تۆرەبوونەك ژ هەمی كریاریا سیاسی دهەرێمێدا سەرهلدایە .

برەنگەكی وەك كاچەوان دسالێن نۆوەتاندا هەلگرتنا چەكی ببۆ دیاردەكا بالكێش  و پاشان پشتی دەربازبوونا زێدەتر ژ بیست سالان دنهۆدا ئەوێن چەكی ل ناڤا بازاری دهەلگرن چ وەك بخۆزانین یان وەك مۆدەكا جۆانیێ ب كەسێن ناموو بكەسێن پاشڤەمایی تێنە لقەلەم دان ،  ئاهۆسانژی دنهۆدا كریاریێن رێكخستنەكا كلاسیك و بحزبیكرنا جڤاكی ومایتێكرنێن حزبیانە دهەمی دەمارێن ژیانا خەلكی  و  فشارێن بناڤێ فۆرما حزبی و سزایێن سیاسی و حزبیكرنا هەمی لڤینێن خەلكی ژ نەریت و كارو رەفتارێن دەستهەلاتەك كلاسیك و  حزبی یە وئەف  جۆرە رەفتارە  دڤی سەردەمیدا كە هەركەس تۆرەیە و هەر بزاڤ و پێنگاڤەكا بێتە هاڤێتن ژبۆ لجهێ سایكلۆجیەتا خەلكی لبەر جاڤ وەربگریت و  پرس گرێكێن خەلكی چارەسەربكەن ئەف جۆرە كارورەفتارە پتر كەربێ پەیدادكەت وێڤەترهەرتشتێ دەستهەلات بكەت كرێت تێتەخاندن و ب پوچی تێنەوەرگرتن . 

ئەو زێدەگاڤیێن  تێن هاڤێتن و دڤێن بزوری خەلكێ  بێدەنگ بكەن ژ كارێن بخەلەت خاندنا رەوشا دەروونیا خەلكی یە و دێ باجێن مەزن لسەر هەبن  وئەگەر  ئەف زێدەگاڤیە نەئێنە راوەستاندن دێ باندورێن خراب ژی  هەبن و هند سیناریوویێن مەترسیدار تێن چاڤەرێكرن  ، جڤاكناسێ فەرەنسی مونتسیكۆ دگوتنەكا خۆدا هۆسا دبێژە " هەردەستهەلاتەكا بزوری بزاڤێ بكەت رێیێ ل زمانی بگریت دەربرینا خۆیا ئازاد بكەت ، بنەجاری دێ پەنا بۆ زەڤلەكان (هێزێ ) ئێتە هاڤێتن و دبێژیت ئەڤە دەست پێكێن سەرهلدانا شۆرەشا گەلانە " ئەف كارورەفتارێن  نهۆ ژی ل دژی پەیدابوونا هێزێن تازە و پروژەیێن تازە تێنە هاڤێتن  و بزاڤ ژبۆ ترساندنا خەلكی ژبلی هندێ كۆ ژكارورەفتارێن وان هێزانە یێن لهەمبەر داهێنان و ئافراندنا تشتێن تازە ڤالاماینە و رێكخستنێن كەڤنار و كلاسیكن و ئەو جۆرە رەفتار  لنك خەلكی بكارێن كەڤنەشووپ و رەفتارێن دەم بسەرڤە چووی تێنە نیاسین ، دهەمان دەمدا سیاربوونا بەروڤاژی یا پێلێن گۆرانكاریانە كە دنهۆدا  دەم دەما گۆرانكاریانە.

سەردەم سەردەمێ  تێپەراندنا فۆرما حزبی و كارورەفتارێن كلاسیكە ، دڤێ قۆناغا هەرێم تێدا دەربازدبیت خەلكی پێویستی بشێوازەكێ جۆدایێ خەباتێ هەیە برەنگەكی هەم فۆرما حزبی و ئایدلوجیەتێ دەربازبەك و  رومەتا تاكی بێتە پاراستن و  هەمژی تاكێن هەرێمێ لسەر پڕوژەیەكێ عەقلانی و لسەر بەشداریكرنا هەمیان ددپرۆژەیەكێ هەڤبەشێ دەربازكرنەكا نەرم و عەقلانی  ژكارێن سەركەفتی دبیت ، ڤێ قوناغێ پێویستیا ب پروژەیەكێ هەیە هەم میكانیزمەكا نەرم بژارەبكەت و هەم ژی ئارمانج دیاربیت و ئارمانج برەنگەكی هات بیتە دارشتن هیڤیێن خەلكی تێدا بێنە هنگافتن و گۆتارا وی پڕوژەیی ژی دەبیت گۆتارەكا ناڤەراستا نەرم بیت و سایكلۆجیەتا خەلكی لبەر چاڤ وەربگریت  ، و تا ئەو پڕوژە نەبیت بەشەك ژ خەلكی و خەلكی بمولكێ خۆ نەزانیت نكاریت ژی سەربكەڤیت و دهەمان دەمدا ژی  سەركێشێ وی پڕوژەی ژی گرنگە كەسەكێ تاقیكری بیت و خەلك دكەسایەتی و سەربورێن ویدا گڕەنتیا سوبەهیا خۆ ببینیتن .

 

ئەم وتارە دەربڕی رای نوسەر خۆیەتی

Copyright © 2016 Xendan.org all rights reserved

designed and developed by AVESTA GROUP