ئەنفالی دیوارنشینان

شۆڕش خالید ئاژگەیی - 12-01-2018 - 1704 جار خوێندراوەتەوە

ئەگێڕنەوە ئەلێن لایەنە پەیوەندیدارە سیاسیەکانی هەرێم و لێژنە جۆراوجۆرەکانی بەرەنگاربوونەوەو دژایەتی ( دەست پاکی!!!) و ڕاوەدوونان و دەرپەڕاندن و شاربەدەرکردنی دەست پاکەکان و کۆمیتەکانی نان بڕین و نان ڕفێن ( نان ڕفاندن) و نان سڕین ( سڕکردن) و برسی کردن و کۆگاکانی دابەشکردنی بەشە خۆراکی دۆخە نائاسایی و نایاسایی و هەلومەرجە تەنگەتاویەکان، سەرقاڵی دۆزینەوەی جۆرە دەرمانێکن ( دژە نەخۆشی)، تا کو لە رێگەی دابەش کردنی بەسەر ناوەندەکانی گەندەڵی و بێدادی و جیاکاری و فرت و فێڵ و ( ببە و مەهێنەوە) وە، چارەسەرێکی بنەڕەتی، ڕیشەیی و ڕادیکاڵی بۆ پرسی کوشندەی خەو زڕێنی گەندەڵی و تەفرو توونا کردنی سامانی گشتی  بدۆزنەوە.

چونکە بەداخ و پەژارەیەکی گران و دڵێکی پڕ لە ئاه و حەسرەت و خوێناویەوە، ئەزمونی ساڵانی ڕابردوو و داتاکانی ( وەزارەتی ئامار و سەرژمێری نائاسایی!!!)،  سەلماندوویانە ، هیچ کام لە پڕۆژە و پاکێجەکانی چارەسەرکردنی گەندەڵی و کۆبوونەوە قۆڵ قۆڵێنەکانی لایەنە سیاسیەکان لە ڕابردوودا نەیانتوانی چارەسەری ئەم دەردە ئابوریە کۆمەڵایەتیە کوشندە ماڵوێرانکەرە بکەن، کەوا بە شاهیدی دۆست ونەیار، پالە وجوتیار، بۆتە جێی سەرسووڕمانی پزیشکان، توێژەرەوان، پسپۆڕان و ناوەندەکانی لێکۆڵینەوەی پزیشکی و دەرمان سازی و تەنانەت ئابوریناسیش لە ئاستی جیهاندا.

جێی وەبیر هێنانەوەیە ئەم ناوەندانە پێشتر لە ڕاپۆرتێکدا ئەم ڕاستیەیان خستبووە ڕوو کەوا گەندەڵی بە داروکوتەک و دەمارگیری و  مست و پێلاقە و زەبروزەنگ و تووندوو تیژی و قامچی و تێهەڵدان و شاپ شاپێن و بینە بەردە و دەمەقاڵێوە، ناهێتە چارەسەرکردن، بەڵکو ئەم حاڵەتە دیاردەیەکی قێزەوەنی کۆمەڵایەتیە و تا ڕادەیەکی بەرچاو پەیوەندی بە هەڵوێست و مۆڕاڵ و ناخ وباری دەروونی و دۆخی سایکۆلۆژی و لایەنە کولتوری و ئایینیەکانەوە هەیە و دەکرێ تاوو لەرزی گەندەڵی لە رێگەی یاساو ڕێساوە ( کەم) بکرێتەوە، نەك ( بنەبڕ) بکرێت. 

شامی شەریف بەڕێوەیە!!!
دوا هەنگاوی جدیش لە بواری  قەڵاچۆکردنی گەندەڵی و تەفرووتوناکردنی ئاسەوارە نەرێنیەکانی و دەستگیرکردنی گەندەڵکارانی بێ ویژدان و تێرنەخۆر و چاوچنۆک و پەلکیش کردنیان بۆ بەردەم دادگاکان و سووک و ڕیسوا کردنیان لەبەردەم دەزگاکانی ڕاگەیاندن و  دەست بەسەرا گرتنی موڵک و ماڵی گشتیی بە ناحەق براو و خوراو رفێنراوو داگیرکراوەوە، دەست پێکردنی پڕۆسەی ئەنفالی خانەنشینە ( گوایە) نایاسایی و نائاساییەکانە.

چونکە ئەم توێژە ساڵەهای ساڵە، سەرەڕای رووخاندنی زۆربەی هەرە زۆری دیوارە کۆنکرێتیەکانی نێوان بەرپرسان و جەماوەرەوە!!!، سەرقاڵی تەراتێنن لە بن دیوارەوە بۆ سەر دیوار، لە سەر دیوارەوە بۆ سەربان و لەوێشەوە دیسان بۆ بن دیوارەوە و بە داخەوە تا کو ئێستا وێڕای هەوڵ و ماندوو بوون  و شەونخوونی تفت و تاڵ و تاقەت پڕۆکێنی لایەنە دڵسۆزە( پەیوەندی دار بەدەستەکان) و گیان لە دەست دانی زۆرێک لە ئەندامانی تیمەکانی بەرەنگار بوونەوەی گەندەڵی و تیمەکانی دژە چاوچارکێن و خۆ شاردنەوە، بە هۆی نەبوونی کارەبای نیشتیمانی و شەوە تاریکەکانەوە، نەتوانراوە دەستگیر بکرێن و بخرێنە زیندانەوە....بەڵام شوکر ئەم جارە دوا هەناسە و برستیان لێ دەبڕن و ناچاریان دەکەن بە ئاهی سارد و چاوی پڕ لە گریانەوە بەدیار هەواڵە بە پەلەکانی دابەش کردنی موچە مەجازیە لە دەست چووە کەوە دابنیشن. 
 

ئەم وتارە دەربڕی رای نوسەر خۆیەتی

بابەتەکانی نوسەر

Copyright © 2016 Xendan.org all rights reserved

designed and developed by AVESTA GROUP